Ñwaè' Maêk 4

1À ka' kèr ba à nfè' mò', Jisòs à kɛ' a ce yɛ'ni bèe àwǎa rò. Ku' bèe àŋgoo se a vʉ a sir ye a tarte, e niŋ mbe keŋ a cu mbo. Bèe anà a tɛɛtè nje wǎa rò. 2E yɛ'nì wowèe buu magòr à mŋgàa. E m làa nè wowèe enɛ̂, 3“Yu' nè, ŋwɛ̀ mò' à m ce dù à rbyè buu, 4a ka' ce byè, ŋgʉ̀ buu mò' à gweŋgèr àwǎa nduunjì, bsiŋ vi vʉ̂, a ye. 5Ŋgʉ̀ buu mò' à gweŋgèr mbendù nshe ce e m ba mbendù ryɛɛ, nshe anà à ba mbo gòr ka'. E m yàŋse a fʉʉ njobè' e m niŋ njep nshè gòr ka'. 6Nyʉ̀ à ka' saŋ, a tôo, e yoprì njobè' mŋgàŋ vi m niŋ njep nshè bòŋboŋ ka'. 7Mò' à m gwèŋger à mʉ̀ msini. Msini anà mi ku', a kur, e ke' gee ŋgʉ̀ ka'. 8Ŋgʉ̀ buu mò' à gweŋgèr mbe nshe mbòŋmboŋ a fʉʉ, a ku' a gee ŋgʉ̀. Mò' à gee mntaar, mò' à gee mntuunfu, mò' rjèe.” 9Jisòs à laa nè wowèe enɛ̂, “Ŋwɛ̀ ce e ka' tʉr btù', ŋgàŋ yu'.”

10E ka' ba mimŋgi' bèe ce ncòp-baa-à-rrʉ̀ʉ ba bèe mo' a vʉ̂, a laa nè ye enɛ e suŋ wowèe mbùu efa ŋgàa ca. 11E laa nè wowèe enɛ̂, “Buu ce àde' bèe a riŋ kuu kʉʉ Nyʉ̀ ka' nà, Nyʉ̀ à gèe wèe à rîŋ. À ka' ba yi àmbò bèe ce a yu yìsèe bèe ka' nà, a ce suŋ wowèe buu wɛɛwɛ ba à mŋgàa. 12Yi yu wa'a,

tɛ wowèe a ce kè' kèr kè', yɛ ka',

a ce yu'shi ce yu' ka',

fà dì' a bo kupse, mà' yàp buu bbebep

tɛ Nyʉ̀ foosi wowèe ka'.”

13Jisòs à laa nè wowèe enɛ̂, “Wèe yi mbùu efa ŋgàa ca ka' a? Wèe à ka' tɛ yi ka', banɛ àde' wèe gee wee kɛ ka' yi mbùu efa mŋgàa wɛɛwɛ? 14Yuu ce ŋwɛ̀ mbyè buu ca ce byè, yu nlàa Nyʉ̀. 15Ŋgʉ̀ buu ce e m gwèŋger àwǎa nduunjì nà, yu bèe ce a yu' nlàa Nyʉ̀, Satàn ku vʉ fʉr enjep wǎp ntee. 16Ŋgʉ̀ buu ce e m gwèŋger mbendù nshe ce e m ba mbendù ryɛɛ nà yu bèe ce a ke yu' nlàa Nyʉ̀, ku yu' rbòŋ àgho sê, 17geewa'a vi ke' taa mŋgàŋ njep wowèe ka', ku cu ba nfè' mʉcàr. E ba à nfè' bèe a ce fa wowèe ŋgɛ', kɛ̀ buu vi ba btatap nè wowèe njo' nlàa anà, wowèe a ku kʉti njìnjì. 18Ŋgʉ̀ buu ce e m gwèŋger à mʉ̀ msini nà, yu bèe ce a yu' nlàa Nyʉ̀, 19mlù ce à buu enjep ŋgòŋ na, ba broŋ buu, ba ntee ce bèe a ke tʉr à buu mò', vi kur blàa anà, yi ke' gee ŋgʉ̀ ka'. 20Yì ce e m gwèŋger mbe nshe mbòŋmboŋ tɛɛ àtu bèe ce a yu' nlàa Nyʉ̀, byemi, yi gee ŋgʉ̀, mò' ba mntaar, mò' ba mntuunfu, mò' ba rjèe.”

21E m ker laa nè wowèe foŋ enɛ̂, “Àde' ŋwɛ̀ cʉ' lâm, lor ghee kʉpshi àgho, kɛ̀ tɛr mbà kàasi a? Àmbò e be tɛr ba mbe dì' ce lam e ke tɛɛ a? 22Rìŋ nè enɛ yuu ce a sʉ̀ti, yi be kè yɛɛti àwaŋ, tɛ yuu ce a tɛ'shi yi yɛɛti àwaŋ foŋ. 23Ŋwɛ̀ ce e ka' tʉr btù', ŋgàŋ yu'.”

24E m ker laa nè wowèe enɛ̂, “Yu' nè buu ce a suŋ wèe bòŋboŋ. Nfè' ce wɛ̀ fè' yuu njo, ku ba yì ce Nyʉ̀ be kè fè' njo fa nè wɛ̀, fè' càase embo. 25Ŋwɛ̀ ce e ka' tʉr yuu, banɛ a be fa ye buu mò'. Ŋwɛ̀ ce e ka' tɛ tʉr yuu ka' banɛ a be koo ka' mʉ yì ce e ce kwà'shi enɛ e tʉr nà ese ye.”

26E m ker laa enɛ̂, “Kʉʉ Nyʉ̀ yi yu à njɛ̀ɛ enɛ̂, yi yu àmbò ŋwɛ̀ ce e m byè kwaa à mʉ̀ nsuu. 27E m ku ce nòŋ, tʉ̀' ce raa, nyʉ̀ ce coo. Kwaa ce e m byè nà à fʉʉ a ce kù', e ke' yi àmbò e gèe a ka' ce kù' ka'. 28Yu ba nshe ce e ke gèe kwaa ku', bate. Yuu entòmbì e ke ba ncèe, e lò embenjìmo sop mʉ sà' ka' bate. 29E ka' bi, banɛ e be kep njobè' nfè' rkep à ghɛɛ.”

30E m làa nè wowèe enɛ̂, “Àde' sèe laa seenɛ kʉʉ Nyʉ̀ yi yu àmbò kɛ? Yu njɛ̀ɛ ŋgàa ce efɛ ce àde' sèe ma' ka' riŋ àmbò kʉʉ Nyʉ̀ yi yu? 31Àde' sèe laa seenɛ yi yu àmbò ŋgʉ̀ mostà ce e ŋwɛɛsi sê. 32Geewa'a, a byè e fʉʉ, ku', ntii efa gho ba magòr, ba sè'ni ba à ce ce àde' bsiŋ vi ba'rì mndap mbo.”

33Jisòs à m mà' ku' mŋgàa mo' àmbò bca, a fe'shi nlàa Nyʉ̀ nè wowèe à ndèe ce àde' wowèe a m ba yu'. 34E m làa yuu mo' nè wowèe, buu efa rmà' ba ŋgàa ka', e ba a ŋgǎa yɛ'ni yì buu wèe, sar buu wɛɛwɛ nè wowèe.

35À m ba à nyʉ̀ anà à mbùuŋkùr, Jisòs à laa nè ŋgǎa yɛ'ni yì buu enɛ̂, “Sèe tuu nèŋguu rò.” 36Wowèe a ma'shì ku' bèe ce a wowèe à m ba nà, a niŋ mbe keŋ ce Jisòs à m ba mbo, a wowèe a ce tuu. Bkeŋ mo' vi m ce tuu foŋ. 37Fu' tatap yi kɛ' a ce càa, a doo mdip, mi niŋ mbe keŋ a sɛni ruu mbo. 38Jisòs à m ba mbà njì keŋ, a lɛ yi tu mbe mbuu, a ce buumi. Ŋgǎa yɛ'ni yì buu a yɛɛ ye, a laa nè ye enɛ̂, “Ŋwɛ̀ ryɛ'nì, à ce yɛ wɛnɛ wèr ce kweŋger njep rò na ka' a?” 39E lɛ' efa mmirlò, a waa fu', a laa nè rdip enɛ̂, “Tɛɛ nyaŋ, fa cì'ti ka'.” Fu' yi teetì, ŋgòŋ yi ba nè rfʉtè-ŋwɛ̀. 40E laa nè ŋgǎa yɛ'ni yì buu enɛ̂, “Wèe ce wɛp ba kɛ wa'a? Wèe à be tʉr rbyemì ka' a?” 41Wowèe a wɛp sê, a laa fa wǎp mʉ enɛ, “Ŋwɛ̀ ca a nda sê, ce fu' yi ce yu'ni nè ye, rdip li ce yu'ni nè ye foŋ na?”

Currently Selected:

Ñwaè' Maêk 4: LNT

Highlight

Copy