Ñwaè' Maêk 2

1Jisòs à ka' lò kʉti à rla' Kàpanùm, bèe a yu' enɛ e kʉti. 2Ku' bèe a vʉsè a ruu mbe ndàp, fɛŋ yi ke' ba ka'. E fe'shì blǎa Nyʉ̀ nè wowèe. 3Bèe mo' bèe ŋkyèe, a byɛ' ŋwɛ̀ ce yì ŋgʉ̀' nyor mo' à m kwe, a vʉ àgho. 4Bèe a m ba magòr, wowèe a ke' yi à rcàa nè ŋgàŋ dù yɛ Jisòs ka'. Wowèe a ko' a to' toto mbe tu ndap à ŋkè'nì embe dì' ce Jisòs cu. A ka' to', a suusi ye mbe ndàp njǐ à toto anà mbe kèŋ. 5Jisòs à ka' yɛ lap rbyemì, a laa nè ŋwɛ̀ ce mbèp nyor à m kwe nà enɛ̂, “Muu wà, mɛ̀ fòosi wɛ̀ efa yò buu bbebep.” 6Ŋgǎa ryɛ'nì mncir mo' a m cute àfo, a ce kwà'shi enɛ̂, 7“E làa wa'a njokɛ? E bepsi rlii Nyʉ̀. Ŋwɛ̀ ce àde' e foosì bèe efa buu bbebep caa efa Nyʉ̀, a nda?” 8Jisòs à m ku yi enjep yě ntee enɛ a buu ce wowèe a ce kwà'shi, a laa nè wowèe enɛ̂, “Wèe ce kwà'shi buu ca njokɛ? 9Yuu ce yi yu àtɛ̀r a yì efɛ? Yu ba à rlàa nè ŋwɛ̀ yaŋ ca enɛ, ‘Mɛ̀ fòosi wɛ̀ efa yò buu bbebep’, kɛ à rlàa enɛ, ‘Lo mbekì, lor yo kèŋ, jɛ̂r.’? 10M be dùŋshi wèe mɛnɛ Muu Ŋwɛ̀ tʉr ŋger njep ŋgòŋ na à rfòosi bèe efa yàp buu bbebep.” 11E m làa nè ŋwɛ̀ yaŋ ca enɛ̂, “M ce làa nè wɛ̀ mɛnɛ à nati mbekì, lor yo kèŋ du à là'.” 12E natì mbekì, a lor yi kèŋ a ce fʉʉ àgho. Bèe wɛɛwɛ à ce fyɛ', a bɛɛŋger, a ku'si Nyʉ̀, a ce làa enɛ̂, “Wèr a m be yɛ njɛ̀ɛ yuu ca ka'!”

13Jisòs à m ker du àwǎa rdip rgòr, ku' bèe a vʉ̂, e yɛ'nì wowèe. 14E ka' ce dù, a yɛ Lɛvì ce à m ba muu Alfìyòs àmbò e cu mbe dì' rfà' ce e m ce koo mbàa bàrà'. Jisòs à laa nè ye enɛ̂, “Vʉ̀ fa mɛ̌ mbùu.” E natì a du a yě mbùu.

15Jisòs à m dù a cu mbe ndàp mbe Lɛvì a ce yeŋger. Ŋgǎa ŋkùu mbǎa bàrà', ba ŋgǎa ŋgèe buu bbebep a ce ye byee a ye ba ŋgǎa yɛ'ni yì buu. Ku' njɛ̀ɛ bèe ca a m ce dù a yě mbùu. 16Ŋgàa ryɛ'ni mncir ce a m ba bèe Farìsi a ka' yɛ àmbò e ce ye byee a ŋgǎa ŋgèe buu bbebep, ba ŋgǎa ŋkùu mbǎa bàrà', a bipshi nè ŋgǎa yɛ'ni yì buu enɛ̂, “E ce ye byee a ŋgǎa ŋkùu mbǎa bàrà' ba ŋgǎa ŋgèe buu bbebep njokɛ?” 17E ka' yu' wa'a, a laa nè wowèe enɛ̂, “Bèe ce a ke ròo ŋwɛ̀ ncɛ̀p e ke ba ŋgǎa byaŋ, ke' ba běe btatap ka'. Mɛ̀ vʉ̀ à rkɛ' běe byɛɛnì ka'. Mɛ̀ vʉ̀ à rkɛ' ba ŋgǎa ŋgèe buu bbebep.”

18Ŋgǎa yɛ'ni buu vi Jǒn ba bèe Farìsi a ce jì mdip, awɛ bèe a du a laa nè Jisòs enɛ̂, “Ŋgǎa yɛ'nì buu vi Jǒn ba vǐ bèe Farìsi a ke jì mdip, wo a ke' jì yap ka' njokɛ?” 19Jisòs à beesì nè wowèe enɛ̂, “Àde' bèe ce a dù Ŋkǎ' bgùu a ba à nduu-gùu wèe ker ce jì mdip a? Nduu-gùu à ka' ku ba a wowèe àde' wowèe a ji mdip ka'. 20Geewa'a, nfè' mò' be ba ce a be koo nduu-gùu tɛ wowèe a ji mdip à nfè' anà. 21Àde' ŋwɛ̀ saa cɛ̌' fi tar mbendù cɛ̌' rʉ̀ʉ ka'. E ka' gee wa'a banɛ cɛ̌' fi cà yi be sàa yǐ rʉ̀ʉ tɛ toto raa càa yì entombì nà. 22Àde' ŋwɛ̀ lor mrǔ' mfi foŋ lɛ njep mŋgùp mrù' vǐ brʉ̀ʉ ka'. E ka' gee wa'a banɛ mrǔ' mfi anà mi be lò koo, to'shi mŋgùp mrù' anà, tɛ mrù' mi kʉte à nshè tɛ ŋgùp mrù' anà bʉ à cicì.” Yi ke ba enɛ a lɛ mrǔ' mfi ba njep mŋgùp mrù' vǐ bfi tɛ mi bo kʉ̀te ka', tɛ mŋgùp mrù' vi to'ŋger ka'.

23Jisòs ba ŋgǎa yɛ'ni yì buu a m ce càa à ŋkʉ̀ msaŋ mò' nyʉ̀ mmbomntaa Nyʉ̀, wowèe a ce tee tu msaŋ a ce ye. 24Bèe Farìsi a bipshì nè ye enɛ̂, “Ŋgǎa yɛ'ni yò buu a gèe yuu ce ncir yi kani enɛ ŋwɛ̀ fa gèe nyʉ̀ mmbomntaa nyʉ̀ ka' njokɛ?” 25E beesì nè wowèe enɛ̂, “Wèe à be be' yuu ce Dɛvìd à m gèe à nfè' ce njè à m ce yaŋ ye ker ba bèe ce a wowèe a m ba nà ka' a? 26E m dù mbe Ndàp Nyʉ̀ à nfè' ce Àbìyatà à m ba tu nè ŋgǎa taŋshi taŋshì, a lor brɛ̌d ce a m fa nè Nyʉ̀, a ye, a fa bɛr nè bèe ce a wowèe a m ba. Ncir yi m byemi enɛ ŋwɛ̀ mò' jɛɛ ye caa efa ŋgǎa taŋshi taŋshì ka'.” 27Jisòs à laa nè wowèe enɛ̂, “Nyʉ̀ à m lɛ̀ mi mmbomntaa tɛ mi bo jà' ŋwɛ̀, ke' ba enɛ ŋwɛ̀ ba ŋkwàa nè mmbomntaa ka'. 28Banɛ Muu Ŋwɛ̀ yu Tàr ce e tʉr mmbomntaa Nyʉ̀.”

Currently Selected:

Ñwaè' Maêk 2: LNT

Highlight

Copy