Ñwaè' Mfaè' Ñgaâa Ntuu Jisoès 5

1Ŋwɛ̀ mò' à m ba yi ce a m ce too li rlii enɛ Ànàniyàs. E m tʉr ŋgwa, rlii ŋgwa yì li ba enɛ Sàferèyà. A ŋgwa a m fyèni yap nsuu mo'. 2Wowèe a ka' fyèni, nduu yì a gapnì mbàa efa gho, a lor bɛr a du àgho a lɛ njeptii ŋgǎa ntuu Jisòs. Ŋgwa yì à m rìŋ enjo foŋ. 3Yi ka' ba wa'a, Pità à laa enɛ̂, “Ànàniyàs, Satàn à ruusi yo ntee, a gee wɛ̀ nya' mnde' nè Yʉ' Nyʉ̀, a gapni mbàa nsuu ce wɛ̀ mʉ fyeni njokɛ? 4Nsuu ca à m ku ba yo nsuu tɛ à ka' kè fyèni, wɛ̀ ka' fyèni mbàa efa gho à ba yo mbàa. Wɛ̀ kwà'shi à rgèe njɛ̀ɛ yuu ca njokɛ? Wɛ̀ nya' mnde' ba nè bèe ka', wɛ̀ nya' mnde' ba nè Nyʉ̀” 5Ànàniyàs à ka' yu', a gwe à nshè a kwe. Bèe ce a m yu' yuu ce yi m koni anà, a m wɛp sê. 6Boo mnsùnsù a m vʉ̀, a kur yi gʉ̀ʉ nè bcɛ̀', a byɛ' a du àgho, a tuŋ.

7Awà vi ka' càa àmbǒ btaar, ŋgwa yì a vʉ̂, a ke' riŋ yuu ce yi ba koni ka'. 8Pità à laa nè ye enɛ̂, “Suŋ ka mɛ̀ lɛ̂, wà' ca yu mbàa nsuu ce wèe à mʉ fyeni nà a?” E beesì enɛ̂, “Ɛ̀no, a yi.” 9Pità à làa nè ye enɛ̂, “Wèe nduu wò à kwà'shi a byemi enɛ wèe be mòoshi Yʉ' Tata Nyʉ̀ njokɛ? Yɛ̂! Mkùu bèe ce a tuŋ nduu wò mi yu kù ncʉ̀ʉndʉ̀'. Wowèe a be byɛ̀' wɛ̀ fʉʉ àgho foŋ.” 10Ye ye à gwe njeptii Pità, a kwe. Boo mnsùnsù a ka' vʉ̀, a yɛ àmbò e kwe, wowèe a byɛ', a du àgho, a tuŋ àgee nduu yì. 11Cor nsìp ker ba bèe wɛɛwɛ ce a m yu' buu ce vi m koni na a m wɛp sê.

12Ŋgǎa ntuu Jisòs a m gèe ku' buu bbɛ̀ɛ ba buu bghagha' à mʉ̀ bèe. Ŋgǎa rbyemì wɛɛwɛ a m ce vʉ̀ àbee mbe njì baaki ŋkʉʉ Solomʉ̀n. 13Ŋwɛ̀ mò' à m ker vʉ yi yu a kyese nyor a wǎp mʉ ka', ka' bèe wɛɛwɛ a m lòr wowèe à běe bbòŋboŋ se wa'a. 14Ku' mmbaŋrù ba bbyèŋge a m ce byemi nè Tatâ. 15Ca yi m gèe bèe a byɛ' ŋgǎa byaŋ foŋ a vʉ àgho a lɛ mbe bkuu ba mbe mwàa àwǎa nduunjì enɛ Pità ka' ce càa tɛ li rlèŋshi li bo càa mbendù bèe mo' efa wǎp mʉ. 16Bèe à m kaari à mʉ mla' ce mi m ba àgee rla' Jɛ̀rusalɛ̀m, a vʉ nè yàp bèe ce a m ce yaŋse, ker ba bèe ce byʉ' bbebep vi m ce fa wowèe ŋgɛ', Pità wèe a gee wowèe wɛɛwɛ a lûŋ.

17Yuu ce ŋgǎa ntuu Jisòs à m ce gèe nà yi m cì' ŋwɛ̀ ce e m ba tu nè ŋgǎa taŋshi taŋshì, a ci' yì bèe ce a m ba bèe Sadùsî, wowèe a ko'ndoŋ nè ŋgǎa ntuu Jisòs sê. 18A m koo wowèe a li' mbe shaŋ. 19À ka' ba nètʉ', ncìndap Tata Nyʉ̀ à vʉ̂, a mʉ' bkèŋ shaŋ, a fʉr wowèe embo, a laa enɛ̂, 20“Dù nè mbe Ndàp Nyʉ̀, suŋ bèe buu wɛɛwɛ ce vi kùu ryǒŋ rfi ca.” 21Wowèe a ka' yu' wa'a, tʉ̀' à ka' ce raa, wowèe a du mbe Ndàp Nyʉ̀, a yɛ'ni bèe.

Ŋwɛ̀ ce e m ba tu nè ŋgǎa taŋshi taŋshì ba yì bèe a m kɛ' bleebèe embe kansùr wɛɛwɛ, a tuu bèe enɛ a du fʉr wowèe embe shaŋ vʉ àgho. 22Wowèe a ka' dǔ bà', a yɛ wowèe mbe shaŋ ka', a kʉti a du a suŋ bèe ce a m tuu wowèe nà. A m làa nè wowèe enɛ̂, 23“Wèr à dù a yɛ àmbò a li' shaŋ bòŋboŋ sê, ŋgǎa ncir a tɛɛ njepmbè a ce kè'ni ŋgǎa shaŋ. Wèr à ka' mʉ̀' shaŋ, a yɛ ŋwɛ̀ mbo ka'.” 24Ŋwɛ̀ ce e m ba tu nè ŋgǎa kè'ni Ndap Nyʉ̀, ker ba běe bgòrgòr efa mʉ̀ ŋgǎa taŋshi taŋshì, a ka' yu', bfee vi jep wowèe, wowèe a kɛ' a ce tarni yuu ce àde' yi lo ba. 25Ŋwɛ̀ mò' à vʉ a laa nè wowèe enɛ̂, “Yɛ̂! Bèe ce wèe à mʉ li' mbe shaŋ nà, a yu mbe Ndàp Nyʉ̀, a ce yɛ'ni bèe mbo.” 26Ŋwɛ̀ ce e m ba tu nè ŋgǎa kè'ni Ndap Nyʉ̀ nà, ker ba yì bèe, a m dù a vʉ nè wowèe. A m koo wowèe à ŋger ka', njobè' ŋgǎa taŋshi taŋshì a m ce wɛp enɛ a ka' koo wowèe à ŋger, seemò' bèe a tʉʉshì wowèe nè blùr.

27A ka' vʉ̀ nè wowèe, a tɛr wowèe mbe mʉ̀ kansùr. Ŋwɛ̀ ce e m ba tu nè ŋgǎa taŋshi taŋshì à bipshì buu nè wowèe. 28E m làa enɛ̂, “Wèr à m làa enɛ wèe fa yɛ'ni yuu mo' à rlii ŋwɛ̀ anà ka'. Yɛ là nè yuu ce wèe à gèe. Wèe à gèe le ryɛ'nì li du à mʉ bdì' wɛɛwɛ à rla' Jɛ̀rusalɛ̀m, a koŋ sè'ni à rgèe tɛ yi yɛɛti enɛ bèe ce a m yʉ ŋwɛ̀ ca à m yʉ wèr.” 29Pità ba ŋgǎa ntuu Jisòs a beesì enɛ̂, “Wèr be kù yu'ni ba nè Nyʉ̀ càa ce enɛ wèr yu'ni ba nè ŋwɛ̀. 30Nyʉ̀ visèe btarkʉ à m fʉr Jisòs ce wèe à m kɛ̀ti mbe ce e kwe nà efa rkwe. 31Nyʉ̀ à m nàa ye a cusi a yě bo mà' àmbò ŋwɛ̀ mʉ̀' nduunjì nè bèe, ba ŋwɛ̀ rjà', tɛ e bo fa bèe njì à rkupsè, mà' yàp buu bbebep tɛ Nyʉ̀ bo fòosi wowèe efa yàp buu bbebep. 32A wèr ce wèr ce suŋ bèe buu ca, Yʉ' Rara ce Nyʉ̀ à fa nè bèe ce a ce yu'ni nè ye, yi ce suŋ wowèe foŋ.”

33Wowèe a ka' yu', ntee yi bep wowèe sê, wowèe a kɛ' a ce kwà'shi à ryʉ ŋgǎa ntuu Jisòs. 34Ŋwɛ̀ Farìsi mò' ce a m ce too enɛ Gàmalìyàl, à m nàti mbekì. À m ba ŋwɛ̀ ce e m ce yɛ'ni bèe mncir Nyʉ̀, à ba ŋwɛ̀ ce bèe wɛɛwɛ a m ce yu'ni nè ye. E m làa enɛ a fʉr bèe ca njepmbè tɛ a cu njo nfè' mʉcàr. 35A ka' fʉr, e làa nè wowèe enɛ̂, “Yà bèe Isrɛ̀l, lòr nè nfè' à yuu ce wèe ce kòŋ à rgèe nè bèe ca. 36À m ba mbe nfè' mò' Tǒdàs à nyɛɛ a lor yì nyor à ŋwɛ̌ ŋgòr, mmbaŋrù ce a m ba àmbò mjèe kyèe a du a yě mbùu. A m yʉ ye, mmbaŋrù ce a m ce dù a yě mbùu a da'sè, yuu ce wowèe a m ce kòŋ à rgèe nà yi bʉ à cicì. 37Ca yi ka' càa wɛɛ, Judàs ce e m ba ŋwɛ̌ à ŋgǒŋ Galèle à nyɛɛ mbe nfè' ce a m ce bè' bèe, a sʉŋ bèe mo' à mbèp yì. Ye ye à m kwe, bèe ce a m ce dù a yě mbùu, a da'sè. 38À ka' ba àmbò yi yu sè'ni na, m ce làa nè wèe enɛ wèe fa gèe yuu mo' nè bèe ca ka'. Lɛ̀ nè wowèe nyaŋ njobè' yuu ce wowèe a ce kwà'shi à rgèe na, yi ka' lo ba ese ŋwɛ̀ banɛ yi be gèeti ka'. 39Yi ka' lo ba ese Nyʉ̀, àde' wèe jepsì wowèe ka'. Wèe ka' jepsi wowèe, seemò' yi lo ba enɛ wèe ce mà' bìr wèe Nyʉ̀ wèe.”

40Wowèe a m yu' ncep ce e m fa, a ka' kɛ' ŋgǎa ntuu Jisòs, a lip wowèe, a laa nè wowèe enɛ wowèe a fa kèr làa yuu mo' à rlii Jisòs ka'. A ka' làa wa'a, a ma'shi wowèe enɛ wowèe a dû. 41Wowèe a fʉʉ embe kansùr a ce lu'shi enɛ Nyʉ̀ à yɛ wowèe a ghɛɛtè à bèe ce àde' bèe a coosì njo' rlii Jisòs. 42Wowèe a m ce yɛ'ni a ce fè'shi mbe Ndàp Nyʉ̀ ba à mla' à mnòŋ wɛɛwɛ enɛ Jisòs yu Krǎis anà.

Currently Selected:

Ñwaè' Mfaè' Ñgaâa Ntuu Jisoès 5: LNT

Highlight

Copy