Ñwaè' Mfaè' Ñgaâa Ntuu Jisoès 6

1À m ba à mnòŋ ca ce ŋgoo ŋgǎa yɛ'ni buu Jisòs à m ce kù', bèe ce a m ce làa li Grěk a m làaŋger a kuu bèe ce a m ce làa li Hibrù njobè' a m ce gàpshi buu nè bèe à mnòŋ wɛɛwɛ, a ce fa byepkʉʉ wap ka'. 2Bèe ce ncòp-baa-à-rrʉ̀ʉ a kɛ' ŋgǎa yɛ'ni buu Jisòs, a laa nè wowèe enɛ̂, “Yi yu yɛɛnì enɛ wèr borni efa rfè'shi blǎa Nyʉ̀ ce gàpshi ba buu nè bèe ka'. 3Bfʉr wêr, banɛ wèe fʉr mmbaŋrù sàambâ, efa wěe mʉ ce yap ŋgèe yi yu yɛɛnì, wowèe a ruusì nè Yʉ' Rara, a ker riŋ buu, tɛ wèr bo fa rfà' ca mbe wǎp mmbò, 4lòr yèr nfè' ce gèe rloo, kèr ce fè'shi blǎa Nyʉ̀.”

5Yuu ce a m làa, yi m bòŋ bèe wɛɛwɛ, wowèe a ce Stɛfàn ce e m byemi sê, a ker ruusi nè Yʉ' Rara, ba Felêp, ba Pukorùs, ba Nikanò, ba Timʉ̀n, ba Pɛmɛnàs, ba Nikòlàs ŋwɛ̌ à rla' Antìyòk, ce e m lò a byemi nè Nyʉ̀ bèe Jûs. 6Wowèe a m lòr bèe ca a tɛr njeptii ŋgǎa ntuu, wowèe a loo, a lɛ map mmbo mbe wǎp ndù.

7Blǎa Nyʉ̀ vi m dù kùntombì, ŋgoo bèe ce a m ce dù àmbùu Jisòs à rla' Jɛ̀rusalɛ̀m à ku' sê. Ŋgǎa taŋshi taŋshì ce a m yu' blǎa rbyemì ca a byemi, a m ba gòr.

8Stɛfàn à m tʉr rbǒŋ Nyʉ̀ ba ŋger Nyʉ̀ sê, a gee buu bghagha' ba buu bbɛ̀ɛ à mʉ̀ bèe. 9Yi ka' ba wa'a, bèe mo' ce a m ba bèe embe ndap rloo ce a m ce too enɛ ndap rloo bèe ce a bii fà' bkwàa ka', ce à m ba běe à rla' Sàiren ba à rla' Àlɛ̀ksandà ker ba běe à ŋgǒŋ Sìlesìyà ba Ɛshà a m ce sɛr mnsɛr a Stɛfàn wèe. 10Yap ŋger mnsɛr à Stɛfàn wèe yi m sɛ̀ njobè' Stɛfàn à m ce làa ba nè bfee ba ŋger Yʉ' Rara ce Nyʉ̀ à m fa ye. 11Wowèe a du embenjì a cepshi bèe mo' enɛ wowèe a nya' mnde' mbe tu Stɛfàn. Wowèe a kɛ' a laa enɛ̂, “Wèr à yu' àmbò e ce nya' mnde' a ce bepsi rlii Musìs ba Nyʉ̀.” 12Ca yi m gèe mntee bèe ba mntee bleebèe ba mntee ŋgǎa yɛ'ni bèe mncir, vi yɛɛŋgèr, wowèe a vʉ mbendù Stɛfàn, a koo ye a du àgho mbe kansùr.

13A ka' dù àgho, a vʉ nè bèe enɛ a vʉ tɛɛ njìnsa' mnàŋ, laa enɛ̂, “Ŋwɛ̀ ca à be buu efa rlàa yuu bebep àmbò dǐ' rara ca ba mncir Musìs ka'. 14Wèr a yu' àmbò e ce làa enɛ Jisòs ce à rla' Nasarɛ̀t be sà'si dì' ca kèr kupse ndèe to' ce Musìs à m fa nè sèe.” 15Bèe wɛɛwɛ embe kansùr a ka' fyɛ' bsii Stɛfàn, a yɛ vi ba àmbò bsii ncìndap Nyʉ̀ wa'a.

Currently Selected:

Ñwaè' Mfaè' Ñgaâa Ntuu Jisoès 6: LNT

Highlight

Copy