Ñwaè' Mfaè' Ñgaâa Ntuu Jisoès 4

1Pità ba Jǒn a ka' kù bii ce làa nè bèe, ŋgǎa taŋshi taŋshì ba ŋwɛ̀ ce e m ba tu nè bèe ce a m ce kè'ni Ndap Nyʉ̀, ker ba bèe Sadùsî, a vʉsè. 2Ntee yi bep wowèe sê, njobè' Pità ba Jǒn à m ce yɛ'ni bèe enɛ Jisòs à m fʉʉ efa rkwe, yi ce dùŋshi enɛ bèe ce a kweŋger a be fʉʉ efa rkwe. 3A m koo Pità ba Jǒn a li' mbe ndàp, a lɛ wowèe mbo caar tʉ̀' à raa, njobè' nyʉ̀ à m coo. 4Geewa'a, bèe magòr ce a m yu' yuu ce wowèe a m làa a m byemi. Bèe ce a m byemi a m bà' sè'ni àmbò ncʉ̀kì ta wa'a.

5Tʉ̀' à ka' raa, bèe ce a m ce sa' to' ba bleebèe, ker ba ŋgǎa ryɛ'ni mncir, a vʉsè àbee à rla' Jɛ̀rusalɛ̀m. 6Anàs ce e m ba tu nè ŋgǎa taŋshi taŋshì, ba Kaifàs, ba Jǒn ba Àlɛ̀ksandà, ker ba bèe embe ndʉ̀' ŋgǎa taŋshi taŋshì, a m ba àfo foŋ. 7A m fʉr wowèe embe ndàp, a tɛr mbe wǎp tar, a kɛ' a ce bipshi nè wowèe enɛ̂, “Wèe à gèe ca ba à ŋger nda? Wèe à gèe ba à rlii nda?” 8Pità à ruu nè Yʉ' Rara à nfè' anà, a laa nè wowèe enɛ̂, “Ŋgǎa sa' to' ker ba bleebèe! 9Wèe à ka' ce bipshi buu nè wèr kuu yuu bòŋboŋ ce wèr à gèe nè ŋwɛ̀ ce e kepŋger na, enɛ e gèe ekɛ a ka' ce jɛ̀r lɛ, 10banɛ wèe ker ba běe à to' Isrɛ̀l wɛɛwɛ, à ba rìŋ enɛ ŋwɛ̀ ca à jɛ̀r bòŋboŋ ba à rlii Jisos Krǎis ce à rla' Nasarɛ̀t. Jisòs ca yu ŋwɛ̀ ce wèe à m taa mbe kìntaa, Nyʉ̀ à fʉr ye efa rkwe nà. 11E yu àmbò lùr ce wěe ŋgǎa mboo mndap à m mà', à ka' ba sè'ni, e kʉtì ba à lǔr à rbuu ndap. 12Ŋwɛ̀ mò' ker ba ce àde' e gee bèe a luŋ ka', njobè' Nyʉ̀ à ker fa ŋwɛ̀ mò' njep ŋgòŋ na ce àde' sèe luŋ à li rlii ka'.”

13Wowèe a ka' yɛ njɛ̀ɛ ntee ce Pità ba Jǒn a m tʉr, a bɛɛŋger sê, njobè' wowèe a m ku ba běe àtɛ̀r, a riŋ ŋwà' ka'. Wowèe a m rìŋ à nfè' anà enɛ Pità ba Jǒn a m ba a Jisòs wèe nè mini-ŋwɛ̀. 14Yi ka' ba wa'a, wowèe a ker tʉr yuu làa ka' njobè' wowèe à m yɛ àmbò ŋwɛ̀ ce e m kepŋger anà tɛɛ àgee Pità ba Jǒn. 15A m làa nè wowèe enɛ wowèe a fʉʉ embe kansùr. Wowèe a ka' fʉʉ, ŋgǎa kansùr a kɛ' a ce sèesi yuu ce a be gèe nè wowèe. 16Wowèe a m làa enɛ̂, “Sèe be gèe seekɛ nè bèe ca? Bèe wɛɛwɛ à rla' Jɛ̀rusalɛ̀m a rìŋ enɛ wowèe a gèe yuu bɛ̀ɛ sê. Àde' sèe kanì ka'. 17Ka' yi yu wa'a, sèe laa nè wowèe enɛ a fa kèr làa yuu mo' nè ŋwɛ̀ mò' à rlii Jisòs ka', fà dì' ryɛ'nì ca li bo kèr dù ntombì ka'.” 18A m kɛ' wowèe a laa nè wowèe enɛ a fa ker làa yuu mo', kèr yɛ'ni yuu mo' à rlii Jisòs ka'.

19Pità ba Jǒn a beesì nè wowèe enɛ̂, “Kwà'shi ka nè bòŋboŋ enɛ yi yu yɛɛnì à bsii Nyʉ̀ enɛ wèr yu'ni ba nè wèe kɛ̀ nè Nyʉ̀ lɛ? 20Àde' wèr buu yer yu efa rlàa yuu ce wèr à yɛ a ker yu' ka'.”

21Ŋgǎa Kansùr a m ker wɛpsi wowèe, a ma'shi wowèe. Wowèe a m tʉr njì à rgèe yuu mo' nè Pità wèe ka' njobè' bèe wɛɛwɛ a m ce kù'si Nyʉ̀ à yuu ce yi m koni anà. 22Ŋwɛ̀ ce a m gèe yuu bɛ̀ɛ nè ye, e jɛr anà, à m càa bfè' mŋkyèe.

23A ka' mà'shi wowèe, wowèe a du a yɛ yàp bèe a suŋ wowèe buu wɛɛwɛ ce bèe ce a m ba btu nè ŋgǎa taŋshi taŋshì ba bleebèe a m làa nè wowèe. 24Yàp bèe a ka' yu', a loo àbee enɛ̂, “Tǎr ŋgòr ce e m gèe rbuu ba nshe, ba mdip, ker ba buu wɛɛwɛ ce vi yu à bdì' ca! 25Wɛ̀ m gèe Dɛvìd ce e m ba yò ŋwɛ̀ rfà' à laa à ŋger Yʉ' Rara enɛ̂,

‘Ntee yi m ce yaŋ bèe enje jɛɛ njokɛ?

Bèe a m ce ròo mkùu bèe mo' à cicì njokɛ?

26Bkʉʉ enjep ŋgòŋ a m ba'shi nyor,

a ŋgǎa sa' to' wèe a vʉsè àbee à rmà' bìr a Tata Nyʉ̀,

ker ba yì Krâis.’

27Yi yu nè mini-ŋwɛ̀ enɛ Hɛròd ba Pontiyos Pailɛ̀t a m vʉ̀se àbee à rla' ca a bèe enje jɛɛ wèe, ker ba bèe Isrɛ̀l, a ce ròo mkùu Jisòs, ce e yu yò ŋwɛ̀ rfǎ' nrara ce wɛ̀ m yo'. 28Wowèe a m ku gee ba yuu ce wɛ̀ m kwà'shi a lɛ à yo ŋger enɛ yi be kè koni. 29Tatâ, yɛ là sè'ni àmbò a ce wɛpsi wèr nà, gèe tɛ yò boo mfà' a fe'shi wo blàa nè ntee-ŋwɛ̀, 30nàa yo bo mbekì, gee tɛ bèe a luŋ efa byaŋ, fa wèr ŋger tɛ wèr bo dùŋshi mncòo, gèe buu bghagha' à rlii Jisòs ce e yu yò ŋwɛ̀ rfǎ' nrara.”

31Wowèe a ka' loo, mbe dì' ce wowèe a m ba nà yi ci'tì, wowèe a ruu nè Yʉ' Rara, a ce fè'shi blǎa Nyʉ̀ nè ntee-ŋwɛ̀.

32Ŋgǎa rbyemì ca wɛɛwɛ a m ku tʉr ntěe mo'sir ba rkwà'shǐ rmo'sir. Ŋwɛ̀ mò' à ke' ce làa enɛ buu ce e tʉr ku ba vi cà'cà' ka'. Wowèe a m ku tʉr yàp buu àbee. 33Ŋgǎa ntuu Jisòs ca a m ku ce suŋ nè ŋger-ŋwɛ̀ àmbò nfʉʉ efa rkwe Tata Jisòs. Nyʉ̀ à m gèe wowèe wɛɛwɛ a tʉr ntee bòŋboŋ a wǎp mʉ. 34Ŋwɛ̀ mò' efa wǎp mʉ à ke' ker buu yuu mo' ka'. Bèe ce a m tʉr mŋkʉ̀, kɛ̀ mndap ɛ̀, a m ce fyèni, ce vʉ̀ nè mbàa efa gho, 35ce lɛ̀ njeptii ŋgǎa ntuu Jisòs, wowèe a ce lòr mbàa anà ce gàpshi nè bèe ce a m tʉr yuu ka'. 36Ŋwɛ̀ mò' à m ba fa wǎp mʉ ce a m ce too enɛ Josɛ̀f. Ŋgǎa ntuu Jisòs a m ce too ye enɛ Bànabàs. Mbùu efa rlii ca yu enɛ, ŋwɛ̀ nfa ŋger. E m ba ŋwɛ̀ embe ndʉ̀' Lɛvì, a ba ŋwɛ̀ ce a m bi ba à to' Saipròs. 37E m fyèni yì ŋkʉ̀ mò', a lor mbàa efa gho a lɛ njeptii ŋgǎa ntuu Jisòs.

Currently Selected:

Ñwaè' Mfaè' Ñgaâa Ntuu Jisoès 4: LNT

Highlight

Copy