Ñwaè' Mfaè' Ñgaâa Ntuu Jisoès 3

1À ka' ba à nòŋ mo', Pità ba Jǒn a du mbe Ndàp Nyʉ̀ à nyʉ̀ taar nèmootì. À m ba nfè' ce a m ce dù mbo ce gèe rloo. 2Wowèe a ka' bà' a yɛ ŋwɛ̀ mò' ce e m kepŋger, kɛ' embe nfè' ce a m bi ye. Ŋwɛ̀ anà à m cu a cǔu ŋka' ce a m bèe Ndap Nyʉ̀ àgho. A m ce too cǔu ŋka' anà enɛ Rbòŋ. A m ce byɛ̀' ye à mnòŋ wɛɛwɛ ce cuusi njep cǔu ŋka' anà tɛ e bo ce loo mbàa ese bèe ce a m ce vʉ̀ mbe Ndàp Nyʉ̀. 3E ka' yɛ àmbò wowèe a ce vʉ̀ à rniŋ mbe Ndàp Nyʉ̀ e loo mbàa ese wowèe. 4Pità ba Jǒn a ke' ye mbe mmìr. Pità à laa enɛ̂, “Kè' wèr!” 5E ka' kè' wowèe a ce kwà'shi enɛ wowèe a be fa ye yuu. 6Pità à laa nè ye enɛ̂, “M tʉr mbàa ka', geewa'a, m be fa wɛ̀ yuu ce m tʉr. À rlii Jisos Krǎis ce à rlà' Nasarɛ̀t, nàti mbekì, jɛ̂r.” 7E ka' làa wa', a ghashi ye à rkoo mà', a naa mbekì. E ka' nàti tɛɛ mbekì, mi mkùu mi tap, vi byùŋ nyor enje mlir mkùu vi tap. 8E nyɛɛ mbekì a tɛɛ, a kɛ' a ce jɛ̀r, a du mbe Ndàp Nyʉ̀ a wowèe, a ka' bà' mbo e ce jɛ̀r mbo, a ce nyɛshi mbekì, a ce kù'si Nyʉ̀. 9Bèe wɛɛwɛ a yɛ àmbò e ce jɛ̀r, a ce kù'si Nyʉ̀. 10Wowèe a ka' yɛ, a riŋ enɛ a ŋwɛ̀ ce e m ce cu njep cǔu ŋka' ce a m ce too enɛ Rbòŋ, ce loo buu ese bèe nà. Wowèe a bɛɛŋgèr, a tʉr yuu làa ka', njo' yuu ce yi m koni anà.

11Àmbò ŋwɛ̀ ca à m ku bii ghashi rkoo Pità ba Jǒn nà, bèe wɛɛwɛ a bɛɛŋgèr sê, a caŋ a koni wowèe mbe njì baaki ŋkʉʉ Solomʉ̀n. 12Pità à ka' yɛ wowèe, a laa nè wowèe enɛ̂, “Yà bèe Isrɛ̀l, wèe ce bɛ̀ɛŋger njo' yuu ce yi koni na, a ce kè' wèr ntuŋ-ŋ-ŋ njokɛ? Wà' wèe ce kwà'shi enɛ wèr à gèe ŋwɛ̀ ca à jɛr ba à yer ŋger kɛ̀ njobè' wèr rìŋ à rcà'ni Nyʉ̀ bòŋboŋ a? 13Nyʉ̀ Abràham ce e yu Nyʉ̀ Aisìk a ba Nyʉ̀ Jakòp a ker ba Nyʉ̀ visèe btarkʉ wɛɛwɛ, à kù'si Jisòs ce e yu yì ŋwɛ̀ rfà'. Wèe à m fa ye nè bèe ce a m ce sa' wèe, a mɛŋni ye à bsii Pailɛ̀t, ka' Pailɛ̀t à m ce kòŋ à rmà'shi ye wa'a. 14Ka' e m ba ŋwɛ̌ nrara a ba ŋwɛ̌ nyɛɛnì wa'a, wèe à m mɛŋni ye, a laa nè Pailɛ̀t enɛ e fʉr ba ŋwɛ̌ nyʉshi bèe embe shaŋ, fa nè wèe. 15Wèe à m yʉ ye yu ŋwɛ̀ ce e m mʉ̀' nduunjǐ ryòŋ. Geewa'a, Nyʉ̀ à m fʉr ye efa rkwe, wèr à yɛ ye nè mer mmir. 16A gèe ŋwɛ̀ ce wèe à yɛ a riŋ na à tap bòŋboŋ ba à rbyemì ce à rlii Jisòs. À ka' ba njo' rbyemì ce à rlii Jisòs, ŋwɛ̀ ca à tap bòŋboŋ a wěe bsii.

17“Àmbò yi yu wa' sè'ni na, bfʉr wâ, mɛ̀ rìŋ mɛnɛ yuu ce wèe ker ba bèe ce a m ce sa' wèe à m gèe nè Jisòs nà, wèe wowèe à m ce gèe wa'a, a riŋ yuu ce wèe à m ce gèe ka'. 18Nyʉ̀ à m gèe enɛ yi ba wa'a tɛ yuu ce e m suŋ bèe njì enjep yi ŋgǎa ntuu nà yi bo ghɛɛte njo. E m làa enɛ Krǎis ce e be tuu nà be kè yɛ ŋgɛ'. 19Kupse nè, ma' yè buu bbebep, tɛ Nyʉ̀ bo siŋsi yè buu bbebep anà. E ka' siŋsi, e fa wèe nfè' ce wèe be yu' rbòŋ, 20tuusi Krǎis ce a lɛ̀ nè wèe. Jisòs ca yu Krǎis anà. 21E be kù cu mbe bùu caar bà' à nfè' ce Nyʉ̀ be gèe tɛ buu wɛɛwɛ kʉti bfi àmbò e m làa njì enjep yi ŋgǎa ntuu elǔuŋgòŋ ce à m ba běe brara nà. 22Musìs à m làa yi enɛ̂, ‘Tata Nyʉ̀ be kè fʉr ŋwɛ̀ ntuu efa wěe mʉ àmbò e m fʉr mɛ̀ nà. Wèe be kè yu' buu wɛɛwɛ ce e be kè làa nè wèe, gèe vi. 23Ŋwɛ̀ ce e ka' tɛ kè yu' yuu ce ŋwɛ̀ ntuu Nyʉ̀ anà be kè làa, gèe yi ka', banɛ a be kè fʉr ŋgàŋ efa mʉ̀ bèe, yʉ.’ 24Ŋgǎa ntuu Nyʉ̀ wɛɛwɛ, kɛ' embe nfè' yì Sǎmwɛ̀l du ba' mbe nfè' yì ŋgǎa ntuu wɛɛwɛ ce a m ba mbenjì Sǎmwɛ̀l a m làa àmbò mnòŋ ca. 25Wèe yu boo ŋgǎa ntuu Nyʉ̀, a ce ye sɛ' efa yuu ce wowèe à m suŋ bèe enɛ yi be kè ba nà. Lè' ce Nyʉ̀ à m ye a wěe bta nà, wèe ce ye sɛ' efa gho sè'ni. Nyʉ̀ à m làa nè Abràham enɛ̂, ‘M be ghòni mnjɛ̀ɛ enjep ŋgòŋ na wɛɛwɛ njì enjep yò ŋgʉ̀ bèe.’ 26Yi ka' ba wa'a, Nyʉ̀ à fʉr yì ŋwɛ̀ rfà' efa wěe mʉ, a tuu ye nè wèe entombì, tɛ e bo ghòni wèe, gèe tɛ wèe kupse, mà' wee bsàrbuu.”

Currently Selected:

Ñwaè' Mfaè' Ñgaâa Ntuu Jisoès 3: LNT

Highlight

Copy