Ñwaè' Mfaè' Ñgaâa Ntuu Jisoès 2

1Nǒŋ Ŋkǎ' Pɛntikòs yi ka' ghɛɛ, wowèe wɛɛwɛ a ba àbee mbe dǐ' mò'sir. 2Ka' cu, a ku yu' àmbò yuu mo' yi ce vʉ̀ embe bùu, a ce còo àmbò fu' tatap wa'a. Yi m ce còo à bdì' wɛɛwɛ embe ndàp ce wowèe a m ba. 3Yuu mo' yi yɛɛtì àmbò mcùŋ mor wa'a, a da' a suu mbendù ŋwɛ̀ wɛɛwɛ. 4Ŋwɛ̀ wɛɛwɛ à ruu nè Yʉ' Rara, a kɛ' a ce làa bli ce wowèe a m yɛ'ni ka', ce Yʉ' Rara yi m gèe wowèe a ce làa.

5Jus ce a m vʉ̀se à bto' wɛɛwɛ enjep ŋgòŋ na a m ce cu à rla' Jɛ̀rusalɛ̀m à nfè' anà. À m ba bèe ce a fa yap ntee nè Nyʉ̀. 6Yuu anà yi ka' ce còo wa'a, ku' bèe a kaarì àbee. Wowèe a m bɛ̀ɛŋger sê, njobè' ŋgǎa yɛ'ni buu Jisòs a m ce làa, ŋwɛ̀ nsìp à ce yu' à yì lî. 7Ca yi m gha' wowèe sê, wowèe a bɛɛŋgèr, a laa enɛ̂, “To bèe ce a làa na yu běe Galèlê! 8Yi yu à njɛ̌ɛ kɛ ce enɛ wowèe a ce làa ŋwɛ̀ nsìp à ce yu' à yì lî? 9Bèe mo' efa wěr mʉ yu běe Pɛtìyà ba Mɛdìyà, běe Ɛlàm ba Mɛ̀sòpòtɛmìyà, běe Judà ba Kàpàdosìyà, běe Pontùs ba Ɛsìyà. 10Bèe a vʉ̌ à ŋgǒŋ Frijìyà ba Pàmfilìyà ker ba à ŋgǒŋ Ijìp ba bdì' mǒ' à to' Lebìyà ce vi yu àgee Sàirên. Bèe mo' efa wěr mʉ ce a vʉ̌ à ŋgǒŋ Rûm, yu Jûs, ba bèe mo' enje jɛɛ ce a byemi nè Nyʉ̀ Jûs. 11Bèe mo' efa wěr mʉ a vʉ̌ à ŋgǒŋ Krêt, ba à ŋgǒŋ Àrɛbìyà. Wowèe a ce suŋ njɛ̀ɛ buu bbɛ̀ɛ ce Nyʉ̀ à gèe sèe à ce yu' à visèe bli wɛɛwɛ.” 12Wowèe a m bɛ̀ɛŋger sê, a ker jep, a ce bipshi fa wǎp mʉ enɛ̂, “Cena yi yu ba enɛ kɛ?” 13Bèe mo' a m vʉ̀shi wowèe, a laa enɛ̂, “Bèe ca a no mrù' mi koo wowèe.”

14Pità à natì mbekì a ŋgǎa ntuu Jisòs ce ncòp mò'sir-à-rrʉ̀ʉ, a laa mbekì nè ku' bèe anà enɛ̂, “Yà běe Judà ker ba bèe wɛɛwɛ ce a ce cu à rla' Jɛ̀rusalɛ̀m. Yu'shi nè bòŋboŋ tɛ m suŋ wèe yuu ce yi yu. 15Wèe ce kwà'shi enɛ bèe ca a no mrù' mi koo wowèe. Yi yu wa' ka'. Sè'ni ku bii nyʉ̀ bʉ̀'ʉ à ŋgàptʉ'. 16Cena a yuu ce Jowɛl ce ŋwɛ̀ ntuu Nyʉ̀ à m suŋ bèe. E m suŋ enɛ̂, 17‘Nyʉ̀ ce làa enɛ̂,

“Be ba à mnòŋ elʉ̀simbùu tɛ m fa ya yʉ' nè bèe wɛɛwɛ,

tɛ boo wee ce mmbaŋrù ba bbyèŋge, a cep ya ntuu nè bèe.

Tɛ boo wee boo mnsùnsùè a yɛ buu ce vi be lǒ koni, tɛ bleebèe a yɛ mlo.

18Nòŋ anà yi be ba tɛ m fa ya yʉ' nè ya ŋgǎa mfà' wɛɛwɛ, mmbaŋrù ba bbyèŋge,

tɛ wowèe a cep ya ntuu nè bèe.

19M be kè gèe buu bghagha' mbe bùu, dùŋshi mncòo njep ŋgòŋ na.

Blɛɛ vi be kè ba, tɛ mor yi ba, tɛ ku' njemor yi dʉ'.

20Nyʉ̀ ce e ce saŋ na be kè liiti,

tɛ ŋwɛɛ yi baŋ àmbò blɛɛ.

Tɛ nòŋ yǐ Tata ce yi be kè ba gòr kèr ba jɛɛ se nà yi ka' ghɛɛ.

21Banɛ ŋwɛ̀ ce e ka' ke kɛ' rlii Tata enɛ e ja' ye, a ŋwɛ̀ ce e be kè lùŋ.” ’

22“Yà bèe Isrɛ̀l, yu' nè yuu ce m be làa na. Jisòs ce à rla' Nasarɛ̀t à m ba ŋwɛ̀ ce Nyʉ̀ à m dùŋshi enɛ e m ce ye. E m dùŋshi wa'a nè buu bghagha' ce Jisòs à m gèe, ba mncòo ce e m dùŋshi a wěe mʉ à ŋger Nyʉ̀. Wee wèe rìŋ buu ca bòŋboŋ. 23Nyʉ̀ à m mà'shi Jisòs mbe wěe mmbò àmbò e m lɛ̀, a yi wɛɛ enɛ yi be ba. Wèe à fa ye nè ŋgǎa ŋgèe buu bbebep, a taa ye mbe kìntaa, e kwê. 24Ka' e m kwe wa'a, Nyʉ̀ à m fʉr ye efa rkwe, a gee e luŋ efa mlǔ rkwe, njobè' rkwe li m tʉr ŋger à rlɛ̀ ye mbà yir ka'. 25Dɛvìd à m làa yuu a kuu ye enɛ̂,

‘Mɛ̀ m yɛ enɛ Tata ku ba wèr ye à nfè' wɛɛwɛ. E yu à la rkoo mà',

àde' yuu mo' yi ci' mɛ̀ ka'.

26A mbùu ce ya ntee yi m lu'shi,

la rlee li ce yòp nè rlu'shì-ŋwɛ̀.

Yi yu foŋ enɛ m be cu ce kè' yuu ce Nyʉ̀ be gèe nè mɛ̀,

27njobè' m rìŋ mɛnɛ à be mà'shi tɛ m cu mbà yir ka'.

À be mà'shi tɛ yò muu rfǎ' nrara kwe, bʉ̀te ka'.

28Wɛ̀ dùŋshi mɛ̀ mnduunjǐ ryòŋ.

À be gèe tɛ m lu'shi sê, njobè' à ku ba wèe sò.’

29“Bfʉr wâ, yi yu rara enɛ Dɛvìd ce e m ba yìsèe tarkʉ nà à m kwe, a tuŋ ye, li rshè li ku bii àgho caar ghɛɛ ntìni. 30E m ba ŋwɛ̀ ncep ntuu Nyʉ̀, a riŋ yuu ce Nyʉ̀ à m kà' nè ye. Nyʉ̀ à m ye lè' enɛ ŋwɛ̀ mò' embe ndʉ̀' Dɛvìd be kè ye kʉʉ Dɛvìd. 31Dɛvìd à m yɛ yuu ce yi be kè ba, a suŋ àmbò nfʉʉ efa rkwe Krǎis enɛ̂,

‘Nyʉ̀ à m mà'shi enɛ e cu mbà yir ka',

a ma'shi enɛ yì nyor bʉte ka'.’

32Nyʉ̀ à m fʉr Jisòs ca efa rkwe, wèr à yɛ ye nè mer mmir foŋ. 33Nyʉ̀ à nàa ye a cuusi à li rkoo mà', e koo Yʉ' Rara ce yì ta à m kà' nà. Banɛ yuu ce wèe ce yɛ a ker ce yu' sè'ni na, yu ba yʉ' anà ce e ce fa nè wèr. 34Dɛvìd à m be du mbe bùu ka', geewa'a yu ba ye ce e m làa enɛ̂,

‘Tata à m làa nè yà tata enɛ̂,

“Cu à la rkoo mà' caar tɛ nfè' ghɛɛ

35tɛ m ke gèe tɛ à tɛr mkùu mbendù bèe ce a bàa wɛ̀.” ’

36Banɛ bèe Isrɛ̀l wɛɛwɛ a rìŋ nè mini-ŋwɛ̀ enɛ Jisòs ce wowèe a m taa mbe kìntaa nà yu ŋwɛ̀ ce Nyʉ̀ à m gèe e ba Tatâ, a ker ba Krǎis anà.”

37Bèe anà a ka' yu', yi joo yap ntee sê, wowèe a laa nè Pità ker ba bɛr ŋgǎa ntuu Jisòs enɛ̂, “Bfʉr wêr, yuu ce àde' wèr gêe, yu ba kɛ?” 38Pità à beesì enɛ̂, “Kupse nè, ma' yè buu bbebep tɛ a bo bàptir wèe wɛɛwɛ à rlii Jisos Krâis, tɛ Nyʉ̀ foosi wèe yè buu bbebep, tɛ wèe koni Yʉ' Rara ce yu rfa ese Nyʉ̀. 39Mkà'ni ce Nyʉ̀ à m kà', mi yu nè wèe ba boo wee, ker ba bèe wɛɛwɛ ce a yu ànjìsàp ba bèe wɛɛwɛ ce yìsèe Tata Nyʉ̀ à m kɛ' enɛ a ba yì bèe.”

40Pità à m ker laa buu mò' magòr nè wowèe tɛ wowèe a bo yɛ rara enjo, a ker loo wowèe enɛ̂, “Tee nè wee btu efa ŋgɛ' ce e ce vʉ̀ nè ŋgǎa bsàrbuu ce e sè'ni.” 41A m bàptir bèe ce a m byemi yuu ce Pità à m làa anà. Bèe ce a m kyèse nyor à mʉ̀ ŋgǎa rbyemì nyʉ̀ anà a m ba àmbò bèe ncʉ̀kì taar wa'a. 42Wowèe a m lòr yàp nfè' a yu' ryɛ'nì ce ŋgǎa ntuu Jisos Krǎis a m ce yɛ'ni, a ce vʉ̀ àbee cɛ'cɛ', a ce ye wap byee ker ba byee Nyʉ̀ àbee, a ker ce gèe mloo. 43Bèe wɛɛwɛ a m ce wɛp sê, njobè' ku' buu bbɛ̀ɛ ba mncòo ce ŋgǎa ntuu Jisòs a m ce dùŋshi à ŋger Nyʉ̀. 44Ŋgǎa rbyemì wɛɛwɛ a m ku ba àbee, a tʉr yàp buu àbee. 45Wowèe a m ce lò fyeni yàp buu, ce lòr mbàa efa gho ce gàpshi fa wǎp mʉ àmbò ŋwɛ̀ à m buu yuu. 46Wowèe a m ce tarte mbe Ndàp Nyʉ̀ à mnòŋ wɛɛwɛ, a ce bɛ'shi brɛ̌d fa wǎp mndàp, a ce yeŋger àbee nè rlu'shì-ŋwɛ̀, a ke' ce yu' nyor ka'. 47Wowèe a m ce nɛ̀si Nyʉ̀, bèe a ce yu' rbòŋ nè wowèe. Tata à m ce kyèse bèe ce a m lùŋ efa ŋgɛ' na a mʉ̀ bèe ca à mnòŋ wɛɛwɛ.

Currently Selected:

Ñwaè' Mfaè' Ñgaâa Ntuu Jisoès 2: LNT

Highlight

Copy