MATEO 2

Ba bohlale ba Bohlabela. Herode. Egipita. Natsaretha

1Eitše ge Jesu a belegwe motseng wa Betlehema nageng ya Juda mehleng ya kgoši Herode, gwa tšwelela ba bohlale ba Bohlabela, ba fihla Jerusalema. 2Ba re: E kae Kgoši ya Bajuda e sa tšo go belegwa? Gobane re bone naledi ya gagwe kua Bohlabela, mme re tlile go mo lotšha.

3Kgoši Herode ge a di kwa a tšhoga, le motse ka moka wa Jerusalema wa thšoga le yena. 4A re a kgobile baperisita ba bagolo bohle le bamangwalo ba setšhaba a tsomeša go bona mo Kriste a tlo go tswalewa gona.

5Ba mmotša ba re: Ke Betlehema nageng ya Juda, gobane go ngwadilwe ke moporofeta, a re: 6Le wena Betlehema naga ya Juda, ruri ga o e monyenyane gara ketapele tša ga Juda; gobane go wene go tlo tšwa Yena Moetapele e a tlo go diša tšhaba sa Isiraele.

7Ya ba gona Herode a biletšago ba bohlale thopeng a ba botšišeša lebaka leo naledi e bonetšego ka lona. 8A ba roma a re ba ye Betlehema, a re: Sepelang, le botšišeše taba tša ngwana e; e tlo re ge le mo hweditše, le ntsebiše, gore le nna ke ye ke mo lotšhe.

9Bona ge ba kwele la kgoši, ba sepela; gomme ba bona naledi yela ba e bonego bohlabela, e ba eta pele, ya ba ya ema godimo ga felo fao ngwana a bego a le gona. 10Ya re ge ba bona naledi yeo, ba thaba gagologolo. 11Ba tsena ngwakong, ba hwetša ngwana le Maria mmagwe, ba khunama ba mo lotšha. Ba phutholla mahumo a bona, ba mo ntšhetša dineo tša gauta le diorelo le ditlolo.

12Gomme ge ba laetšwe ke Modimo dilorong gore ba se ke ba feta ka ga Herode, ba boela nageng ya gabo ka tsela e šele.

13Eitše ge ba tlogile, Morongwa wa Morena a tšwelela go Josefa dilorong, a re: Tsoga, o tšee ngwana le mmagwe o tšhabele Egipita, o yo dula gona, ke be ke tle ke go botše; gobane Herode o rata go tsoma ngwana e gore a mmolaye.

14Josefa a tsoga a tšea ngwana le mmagwe e le bošego, a falalela Egipita. 15A dula gona, Herode a ba a hwa; ya ba gore go phethege se se boletšwego ke Morena ka moporofeta e a itšego: Morwa wa ka ke mmiditše kua Egipita.

16Bjale Herode ge a bona a gakišitšwe ke ba bohlale, a befelwa gagolo, a roma bahlanka, ba ya ba bolaya bašemanyana ka moka ba Betlehema, le ba mathokong ka moka a naga yeo, ba nywaga e mebedi le ba ba ba hlatlamago, a lekanya ka lebaka le a le botšišitšego go ba bohlale.

17Ke mo go phethegilego se se boletšwego ke moporofeta Jeremia, ge a re: 18Kwa Rama go kwetše lentšu la dilo le dikolomelo tše di ntši. Rahele o llela bana ba gagwe; o gana go homotšwa, gobane ga ba sa le gona.

19Ya re Herode a hwile, Morongwa wa Morena a tšwelela go Josefa dilorong, a le kua Egipita. 20A re: Tsoga, o tšee ngwana le mmagwe, o ye nageng ya Isiraele; gobane ba ba bego ba tsoma go bolaya ngwana e, ba hwile. 21Josefa a tsoga, a tšea ngwana le mmagwe, a tla nageng ya Isiraele.

22Gomme ge a ekwa gore nageng ya Juda go buša Arakelao bakeng sa Herode tatagwe, a boifa go ya gona; a kwa taelo ka toro, mme a khudugela dinageng tša Galilea. 23A fihla a aga motseng wo ba rego ke wa Natsaretha; ya ba go phethega se baporofeta ba se boletšego ba re: O tlo bitšwa Monatsaretha.

Currently Selected:

MATEO 2: NSO51

Highlight

Copy