MATEO 3

Tša Johane Mokolobetši; o kolobetša Jesu

1Mehleng yeo gwa tšwelela Johane Mokolobetši, a goelela a le lešokeng la Juda, 2A re: Sokologang, gobane mmušo wa magodimo o batametše. 3Ke yena yo moporofeta Jesaya a mmoletšego a re: Lentšu la segoeledi lešokeng le re: Thakgang mmila wa Morena, le lekelanye tsela tšagwe.

4Ge e le yena Johane o be a apere kobo ya boya bja kamela, a itlemile matheka ka lerala; mme dijo tša gagwe e be e le ditšie le dinose tša naga. 5Ke mo ba Jerusalema le ba naga ya Juda ka moka, le ba mošono le mošola wa noka ya Jorodane, ba tšwetšego go yena, 6Ba kolobetšwa ke yena nokeng ya Jorodane, ba ipolela dibe.

7Ya re ge a bona bafarisei le basadutsei ba bantši ba etla kolobetšong ya gagwe, a bolela nabo a re: Lena matswingyana a dinoga, ke mang a le rutilego go tlo phonyokga bogale bjo bo tlago? 8Napang le enywe dienywa tše di amanago le tshokologo. 9Le se ke la eleletša go tlo re: Re na tatawešo, Aborahama; gobane ke a le botša, Modimo o kgona go tsošetša Aborahama bana mo mabjeng a. 10Le gona, selepe se šetše se beilwe medung ya dihlare; mme sehlare sefe le sefe se se sa enywego dienywa tše botse, se tlo rengwa sa lahlelwa mollong. 11Ge e le nna ke le kolobetša ka meetse fela, ke hlatlangwa ke e a tlo go mpheta ka maatla, yo ke sa swanelego le go mo rwalela dieta tša gagwe. Yena o tlo le kolobetša ka Moyamokgethwa le ka mollo. 12O swere leselo ka seatla; mme seboa sa gagwe o tlo se fsielela ruri, a kgobela mabele a gagwe sešegong; moko wona o tlo o fiša ka mollo wo o sa timego.

13Mehleng yeo gwa fihla Jesu a etšwa Galilea; a tla nokeng ya Jorodane go kolobetšwa ke Johane. 14Johane a gana, a re: Ke nna ke swanetšego go kolobetšwa ke wena; mme a o tla go nna?

15Jesu a fetola a re: Lesa bjalo go dirwe ka mokgwa wo; gobane go re swanetše ge re phetha toko ka moka. -- Ke mo Johane a mo dumeletšego.

16Ya re ge Jesu a kolobeditšwe, a etšwa meetseng, gwa napa gwa bulega legodimo, mme a bona Moya wa Modimo o theoga bjalo ka leeba, o etla godimo ga gagwe. 17Gwa tloga go kwala lentšu le le tšwago legodimong le re: Yenayo ke yena Morwamoratwa wa ka, yo ke kgahlwago ke yena.

Currently Selected:

MATEO 3: NSO51

Highlight

Copy