2 BAKORINTHE 5
5
Kholofelo le tlhologelo. Ebangedi ya Poelano
1Gobane re tseba gore ge mokutwana wo wa rena wa mošaša wa mo faseng ge o phušolwa, re tlo ba le moago o tšwago go Modimo, ntlo ya go se agwe ka diatla, e tlogo ba ya neng le neng ya kua legodimong. 2Re tseba le gore ge re sa le mokutwaneng wo, re fegelwa re hlologetšwe go apešwa tša kua legodimong; 3Re se ke ra hwetšwa re hlobotše, re hwetšwe re apere. 4Go bjalo, ge re sa le mošašeng wo, re sa fegelwa re imetšwe ka ge re sa rate go apolwa; re rata go fo apešwa gore se se hwago se metšwe ke bophelo. 5Gomme e a re lokišeditšego fao ke Modimo, e a re beeleditšego ka Moya.
6Bjale re dula re betile pelo, re tseba gore re ba Morena, le ge re sa agile mmeleng. 7Gobane re itshepelela re dumela re sa bone. 8Ke re: Re betile pelo re hlologetšwe gagolo go khuduga fa mmeleng, le go yo goroga Moreneng. 9Ke ka baka leo re phegelelago go mo kgahla gohle, e ka ba ge re gorogile, le ge re sa le ba go tlo khuduga. 10Gobane ka moka ga rena re swanetše go bonala pele ga sedulo sa kahlolo sa Kriste, gore mang le mang a tšee tše a itiretšego tšona a sa le mmeleng, e ka ba tše botse, e ka ba tše mpe.
11Bjale, ka gobane re tseba go boifa Modimo, re leka go kgodiša batho. Ge e le pele ga Modimo ga ra utagala; gomme ke holofela gore le lena ka dipelong tša lena le re lemogile. 12Ga re boeletše go ipolelela; re le anegela tše le kago fadiša rena ka tšona, la botša bao ba go kgantšha difahlogo, ka pelong go se selo. 13Ge e ka ba re išitše kgole, e be e le go direla Modimo; ge re boletše ka tlhaologanyo, e be e le go direla lena. 14Gobane re gapeletšwa ke lerato la Kriste, gomme re re: Ge yena a hwetše bohle e le o tee, gona go hwile bohle. 15O hwile bakeng sa bohle, gore ba ba phelago ba se ke ba hlwa ba iphelela, ba phelele yena e a hwilego bakeng sa bona mme a tsoga bahung bakeng sa bona.
16Bjale ga re sa tseba motho ka nama. Le ge Kriste re mo tsebile ka nama, bjale ga re sa mo tseba ka mokgwa woo. 17Go bjalo, ge motho e le wa Kriste, e ba mmopša e mofsa. Tša kgale di ile; gomme šedi, tše di lego gona ke tše mpsha. 18Gomme tšeo ka moka di tšwa go Modimo, e a re boelantšego le yena ka Jesu Kriste, a re dira bahlanka ba yona poelano yeo. 19Ka gobane ke Modimo e a boelantšego lefase le yena ka Kriste, a lesa go balela batho dikarogo tša bona mme foko la poelano yeo ke yena a le tsemilego mo gare ga rena.
20Bjale re batseta bakeng sa Kriste, e ke re molomo wa Modimo ge re le eletša. Re kgopele bakeng sa Kriste re re: A nke le boelanywe le Modimo! 21Yena eo a sa kago a tseba sebe, o mo dirile sebe bakeng sa rena, gore re tle re be ba tokafatšo ya Modimo ka yena.
Currently Selected:
2 BAKORINTHE 5: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
