2 BAKORINTHE 4
4
Maatla ke go tseba letago le le tlago
1Bjale, ge re na le botseta bjoo, ka mo kgaugelo ye e re diregetšego, ga re lape. 2Re kgaogane le mamenemene a maseme; ga re tle ka tsela ya maano; ga re retole Lentšu la Modimo; re sekišana le matswalo a batho ka moka pele ga Modimo re bola therešo. 3Ge Ebangedi ya rena e sa le phihlo, e fihletšwe bao ba lahlegago. 4Ke ba ba sa dumelego, ba modimo wa lefase le o foufaditšego dipelo tša bona, gore ba se bonegelwe ke lebone la Ebangedi ya letago la Kriste, yena seswantšho sa Modimo. 5Ga re ba go ipolela, re bolela Jesu Kriste, re re: Ke yena Morena; re re: Rena re bahlanka ba lena ka baka la yena Jesu. 6Gobane ke yena Modimo e a itšego: Seetša a se bonege mo go lego leswiswi. Ke yena a bonegetšego dipelo tša rena, ya ba go edišwa ka go tseba letago la Modimo ka sefahlogo sa Jesu Kriste.
7Lehumo leo re le swere ka dibja tša letsopa; gore maatla a magolo e be a Modimo, e sego a rena. 8Re dikilwe thoko tšohle, mme ga re pitlaganywe. Re a phoraphora, mme ga re gakanege. 9Re a tlaišwa, mme ga ra lahlega. Re digelwa fase, mme ga re senyege. 10Re sepela gohle re swailwe mebele ka leswao la go hwa ga Morena; ya ba gona le bophelo bja Jesu bo bonagalago mebeleng ye rena. 11Gobane ka mehla ge re sa phela, re ba go gafelwa lehu ka baka la Jesu, ya ba gona le bophelo bja Jesu bo bonagalago nameng ya go hwa. 12Ge go le bjalo, mo go rena lehu le dira ka maatla; mme go lena a e be bophelo.
13Re na le moya wola wa tumelo, wo lengwalo le o bolelago la re: Ke be ke holofela, ge ke bolela. Mme le rena re a holofela; ke ka baka leo re bolelago. 14Re fela re tseba gore e a tsošitšego Morena Jesu, le rena o tlo re tsoša ra ba le Jesu; o tlo re bea pepeneneng gammogo le lena. 15Gobane tšohle di dirwa ka baka la lena, gore kgaugelo e bonale bogolo ka bontši bja ba lebogago, ya ba go reta Modimo.
16Ke ka baka leo re sa lapego. Le ge motho yo wa rena wa ntle a onala, motho wa teng o fela a mpshafatšwa ka mehla. 17Gobane morwalonyana wo wa ditlaišego tša lebakanyana, e re ruiša lehumo la letago le le sa felego, le le fetišago tšohle. 18Go tlo ba bjalo ge re sa late tše di bonwago ka mahlo, re lata tše di sa bonwego. Gobane tše di bonwago ka mahlo ke tša lebaka leno fela; mme tše di sa bonwego ke tša neng le neng.
Currently Selected:
2 BAKORINTHE 4: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.