2 BAKORINTHE 6
6
Go ipolokela kgaugelo ya Modimo
1Le le ba go dirišana le Modimo re le eletša gore le se ke la ba ba ba amogetšego kgaugelo ya Modimo mme e se ke ya le hola selo. 2Gobane o re: Ke go kwa ka lebaka la kgahlego; ke go thuša ka letšatši la phološo. Tsebang ge, lebaka la kgahlego ke la bjale; tšatši la phološo ke la lehono le.
3Re realo re sa kgopiše motho le ka selo se tee, gore bohlanka bja rena bo se be le bosodi. 4Dilong ka moka re re re bonale re le bahlanka ba Modimo: ka kgotlelelo e kgolo, re le ditlalelong, le bothateng, le pitlaganong, 5le dikotlong, le dikgolegong, le meferefereng, re hloka boroko, re swerwe ke tlala, 6re le ba go ila tšhila, ba tlhaologanyo, ba go se fele pelo, ba botho, ba Moyamokgethwa, ba lerato le se nago bomenetša, 7re le ba lentšu la therešo, ba maatla a Modimo, re swere marumo a toko ka le letona le ka le letshadi, 8re le ba go retwa le ba go gobošwa, ba go tumišwa le ba go sebja, re etša bafori mola re rereša, 9re etša ba go se tsebje mola re tsebja, re etša ba ba hwago, mme ke rena ba, re a phela, re le baotliwa re sa bolawe, 10re le ba ba nyamišwago, mola re le ba ba thabilego ka mehla, re le badiitšana mola re humiša ba bantši, re le bahloki, mola re ruile tšohle.
11Lena Bakorinthe! Molomo wa rena o le ahlametše, pelo ya rena e katologile. 12Mo pelong ya rena le hwetša go le bodulo; re bo hloka mo pelong tša lena. 13Ntireng se ke le dirago sona; ke realo ka gore le bana ba ka. Le lena katološang dipelo.
14Le se ke la ba ba go ikgokela jokong e šele ya ba ba sa dumelego; toko e ka amana bjang le bokgopo? Seetša se ka amana bjang le leswiswi? 15Kriste a ka kwana bjang le Selalogi? Modumedi o abelana eng le e a sa dumelego? 16Ntlokgethwa ya Modimo e agišana kae le medimo? Gomme lena le Ntlokgethwa ya Modimo e a phelago, ka mo Modimo a itšego: Ke tlo aga makgatheng a lena, mme lena le tlo ba setšhaba sa ka. 17Tšwang ge moo gare ga bona, le khuduge; o realo Morena, le se sware tšhila. Ke mo ke tlogo le amogela. 18Ke tlo ba Tata weno; mme lena le tlo ba barwa ba ka le barwedi ba ka. O realo Morena Ramaatlaohle.
Currently Selected:
2 BAKORINTHE 6: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
