Maki 15
15
Failato Yesu givedewayaugina.
Madiu 27:1-2,11-14; Luke 23:1-5; Yoni 18:28-38
1Tu mala gilauna abaveyao ana tofaisewa kikaiwabudiyao badi kaliva lakahidiyao kadu Mosese yana vehimeya ana tovehawala kadu miYuda yadi Koniselo velugadiyao hikovavaga'auhidi be buye hivevai. Ada au Yesu hiyogona be hinauwena tovehimeya kwanaLoma ana egana Failato againe hihege'aliyena.
2Ada Failato Yesu gitoliyena gigayo, “Ka'i miYuda yadi tokaiwabu O'eni?” Yesu gigayo, “Au ugahe amine Iya'eku.”
3Ada abaveyao ana tofaisewa kikaiwabudiyao gaitoma moya'aina fa'ina hihawavekoyoyena. 4Ada Failato gitoliluvaluva-havagi gigayo, “Ka'i keke tamo bonalaufata unagaheye? U'ita, yadi hawavekoyo gavadawana O againiya.”
5 #
Mk 14:61; Ais 53:7 Atu yadi hawavekoyo fa'ina keke tamo bonalaufata kadu gidagaheye. Hidema fa'ina Failato nuwana givegafo'uya'uya.
Failato Yesu alika againe gihawahegena.
Madiu 27:15-26; Luke 23:13-25; Yoni 18:39–19:16
6Tu tafalolo ana egana lobama ana tovenuwa'ata yana Abamaduviviya ana toveya, Failato yana dewa ma yogoyogonina sa'eyana, ka'i hakwadi yo'o hive'ove'o'olena, medema giyauyauna. 7Ada medema tovai-nadi tovekwageya himiyami, boi tova sa'eyana hive'atalalakalaka be kaliva hiluve'alikadi. Ada tovekwageyai-dina agaidiya kaliva sa'eyana ana egana Balaba. 8Au yo'o Failato againe hivaga'auta hivebutu hive'o'olena higayo, “Abamaduviviya ana toveya kaliva uyauyaudi amine, tova adamoya kaliva sa'eyana unayauna.”
9Bana gigayo, “Ka'i nuwanuwami omi miYuda yami tokaiwabu ganayauna be agaimiya ganahawahegena?” 10#Yo 11:47-48, 12:19Fa'ina gihalamanena badi abaveyao ana tofaisewa kikaiwabudiyao yadi ga'uma'uma fa'ina bana againe hihege'aliyena. 11#Af 3:14Atu abaveyao ana tofaisewa yo'o hivagadonedi be Failato hinave'o'olena higa keke Yesu tu Balaba ginayauna.
12Au Failato gigahe-havagiledi gigayo, “Au Yesu againe gavaimi ganaga, Bana wavewagana ide miYuda yada tokaiwabu?”
13Badi kadu hikova-havagi higayo, “Kelose againe hinatutuvefosena.”
14Bana gigayo, “A! Gavadi yana koyona?” Tu badi kadu agodi gilakata-mo'a hikovakovadona higayo, “Kelose againe hinatutuvefosena.”
15Au Failato nuwanuwana yo'o nuwadi ginakiveyamumuna fa'ina, Balaba giyauna be agaidiya gihawahegena. Tu givehimeya be tolugaviya bulava hakahakaluluna againe Yesu hinalaulauna. Hilauna gihavaina, givehimeyedi be kelose againe hinatutuvefosena.
Tolugaviya Yesu hihawavelaigena.
Madiu 27:27-31; Yoni 19:1-3
16Ada tolugaviya Yesu hinauwena tovehimeya yana manuwa lakahina ana eda'awaneya hilukuwena, ada yadi yo'o moya'aidi hikovavaga'auhidi. 17#Lu 23:11Ada aikeva likelikena tovehimeya adi vaigau amine hive'osena, ada badau bulava hakahakaluluna againe hi'etowaliwalina be u'une hisena. 18Ada hivebutu hilusiuleyena higayo, “Siule siule miYuda yadi tokaiwabu.” 19#Ais 50:6Ada aiwala hivaina be u'una hilaulauna, kadu hikiwakiwalitagona kadu Bana magigine tugadi hiveve'etodonena be higa vaita hinadavadavana. 20Hihawavelaigena gihavaina, ana aikeva likelikena hivehalilina digo Tauna ana aikeva hive'osena ada hinauwena be kelose againe hinatutuvefosena.
Yesu kelose againe hitutuvefosena.
Madiu 27:32-44; Luke 23:26-43; Yoni 19:17-24
21Edeya hinauna tu kwanaSailini himaduhagana, ana egana Saimoni. Bana Alekisanida be Lufasi tamadi, ada wala'aiya gitauya be Yelusalema againe ginauna. Au bana hikive'avina be higa Yesu ana kelose gina'avalana. 22Ada abaga ana egana Goligota againe hi'aliyena. Goligota ana kaivila bonadeya ma utouto. 23Hiyemu-yo oine mulamula ana egana mulo buye hivila'atutamo'aina-ma hitunena be ginayuni-yo yana aulolo ma'i gina'atagona. Atu Yesu gikilowena. 24#Sam 22:18Ada kelose againe hitutuvefosena au kabala hihegelakahina be iya'iyaya higaheyena higa hakwadi hakwadi ana kaleko hinavaini ma hinahalamanena.
25Kauwana a givekuve'ine againe hikivekelosena. 26Tu ana hawavekoyo ana fefe hi'etoladina be hisena. Etoladi gigayo, “Hidevama miYuda yadi tokaiwabu.” 27Kadu tomunugakai'afu luhei adi kelose againe hitutuvefosedi, sa'eyana Yesu i'atagine kadu sa'eyana i'imawane.
[ 28#Ais 53:12Tomunugakai'afu Yesu buye hikivekelosedi fa'ina gavaimi Yaubada bonana ana to'awatalatalaina tuwai-mo'ena gigaheye-vagahina, medema a gilakayemu velemo'ena gigayo,
Hinuwanuwa vaita Bana'e tokoyona adi loi kalivana.]
29-30 #
Sam 22:7; Yo 2:19 Kaliva kelose againe hinauna-ma u'udi hilewalewana hihawaluvetonovena higayo, “Ahaiye! O ugahe vaita manuwa-tafalolo udayawelina be aiyeta tohiye againe kadu udakivemididina. Au Tauni udakibababale be kelose againe uda'etoyau.”
31-32Meda anafaiweya abaveyao ana tofaisewa kikaiwabudiyao kadu Mosese yana vehimeya ana tovehawala hihawavelaigena buye hive'agahegahe higayo, “Mali kaliva gikibababaledi tu Tauna keke anafaiweya ginakibababaleni. Ka'i O'eni velemo'ena Yaubada yana Tovegida ide miYuda yada tokaiwabu amanadi, au adamoya kelose againe auhe'ama udahobu be ime ana'ita-yo anadava.” Hidedemi miYuda adi tonagona hihawavelaigena, ada kadu badi Bana buye kelose againe hitutuvefosedi-ma hivebutu hihawaluvetonovena.
Yesu gi'alika.
Madiu 27:45-56; Luke 23:44-49; Yoni 19:28-30
33Kauwana getadiya tu umalovana babi matatabuna gi'uyuyubodena be ginunauwena mala gilavina againe. 34#Sam 22:1Au mala gilavina Yesu gikova'awafatafata gigayo, “Elai Elai lama sabakitani?” “Ho yaku Yaubada yaku Yaubada, gavana fa'ina unuyabuyabuku?” Bonana ana kaivila au hidede amine.
35Ada tolauboda tufoidi hinogalini-yo higayo, “Wanogali, Yaubada bonana ana to'awatalatalaina Elaiya fa'ine gikovakova.” 36#Sam 69:21Ada kaliva sa'eyana gimadu balou givaina digo oine golagolana againe gi'utuvina ai againe gi'etokwanena ada gitunena be higa ginayuna, ada gigayo, “Kanaboda be kana'itana, ka'i Elaiya gina'ela be gina'etoyauna o ka'i keke.”
37Tu Yesu gikova'awafatafata-yo yawaina gihavaina. 38#Yem 26:31-33; Hi 10:19-20Gi'alika-yo manuwa-tafalolo vetawana-tabu ana abaseboda kaleko gi'ahailugana be higa vaita abaluku Yaubada againe gi'ayauna. 39Tu tolugaviya adi togiyomatana Yesu magigine gihaga-ma yana kova ginogalina ada gavaiya'amine gi'alika ma gi'itana againe, gigahe gigayo, “Wona velemona hida hima kaliva Yaubada Natuna.”
40 #
Lu 8:2-3
Kadu vevine tufoidi himidilauva be hilulauboda. Badi agaidiya sa'eyana Meli vineMagidala, sa'eyadi Meli Yemesa kabi'o be Yosese hinadi, kadu sa'eyadi Salome. 41Boi Yesu Galili ana fafaliya gimiyami ana toveya badi vevine-dina hibwa'ulina be tova moya'aina hi'ita'itave'avina. Kadu vevine velugadiyao moya'aidi Yelusalema againe Bana buye hi'ela-ma kadu hilulauboda.
Yesu tomohuyehuyeya hihuyana.
Madiu 27:57-61; Luke 23:50-56; Yoni 19:38-42
42-43Mala gisilavina tu Yosefa kwanaAlamadiya giyemu. Bana kaliva kikaiwabuna miYuda yadi Koniselo agaidiya, ada kadu bana tauna Yaubada yana aituha ginalakayemu fa'ina gilulauboda, higa kaliva yana itave'avina againe hinamiyami be ase'asediya ginavehivehimeya. Ada medema tovai-nadi Abamaduviviya ana kidewadewa ana tova higa bogiyadi sabati. Hidema fa'ina Yosefa gi'asevatu be gina Failato againe giluku Yesu wowona fa'ina give'o'ola. 44Ada Failato Yesu ahe gi'alika ma ginogalina againe nuwana givegafo'uya'uya. Au tolugaviya adi togiyomatana giyowanina be gi'ela gitoliyena ka'i Yesu ahe gi'alika o ka'i keke. 45Bana tonagona givenuwa'atana higa vaita a gi'alika, au Yesu wowona Yosefa againe gihawahegena. 46Au Yosefa gina kaleko kwayakwayana gikimoneni-yo gina wowona gikakilina, kalekoya gifafana be tomohuyahuya kuga hinagene giyalana-ma againe giselukuwena. Ada au kabala lakahina againe tomohuyahuya ana eda'awana give'enobodana. 47Meli vineMagidala kadu Meli Yosese hinana hai wowona gihuyana-ma hi'itana.
Currently Selected:
Maki 15: viv
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.