Maki 14

MiYuda adi tonagona hivevai be Yesu hinaluve'alikana.

Madiu 26:1-5; Luke 22:1-2; Yoni 11:45-54

1 # Yem 12:1-27; Mk 10:33-34 Tu aiyeta luhei hinahegedi tu tafalolo ana egana lobama ana tovenuwa'ata yana Abamaduviviya ginayemu. Medema tafalolo-nadi ana toveya beledi keke wa'isina hi'au'ana. Ada abaveyao ana tofaisewa kikaiwabudiyao kadu Mosese yana vehimeya ana tovehawala eda hilelelena be Yesu hinakive'avikauyeni-yo hinaluve'alikana. 2Ana kive'avina fa'ina hinuwanuwa higayo, “Ka'i yo'o hinave'atalalakalaka fa'ina, keke tafalolo lakahina ana toveya kanakive'avini.”

Kwamayoku sa'eyana Yesu Bedani againe gibunamina.

Madiu 26:6-13; Yoni 12:1-8

3Tu Yesu Bedani melaleya gina Saimoni againe giwakawaka. Bana boi givedawodawowo fa'ina hivewagana tovedawodawowo. Au Yesu Saimoni yana manuweya gi'enolukekela gi'au'a tu kwamayoku sa'eyana gi'ela, bunama yamumu-mo'ena ana egana nado gi'aliyena fatana lakahina. Mena bunamai-nadi aba'aihiwaga kugakugana againe gidauda, kuga ana egana alabasita. Ada kwamayoku aba'aihiwaga gikidobona digo Yesu u'una gibunamina.

4Atu kaliva tufoidi hi'ita-yo hinuwakoyo higayo, “Gavadi-yo hida bunama hidede amine gihiwa-kawowoni? 5Ka'i hida bunama gidakimonevedamanena o mani lakahina vaita kaliva sa'eyana yana faisewa malamala sa'eyana fatana amine gidavaina be koyokoyo gidaveledi.” Au kwamayoku higolahegehegena.

6Tu Yesu gigayo, “Au gimiya. Gavadi-yo hida kwamayoku wa'ivewowomumuni? Ginuwakabubuyeku fa'ina yana gugai kanahawaveyamumuyena. 7Tova moya'aina koyokoyo hinafamiya himimiyami ada gava tova nuwanuwami wananuwakabubuyedi, au amifaiweya wananuwakabubuyedi. Tu Iya'eku ma aimo keke buye kanamiyami tova moya'aina. 8#Yo 19:40Bana'e ma gavadi anafaiweya, medema gigugaiyena. Hida bunamai-nadi wowoku againe gihiwa-vagahina be aku aihuya fa'ina gikidewedeweku. 9Gagahe velemo'ena fafali ha'amine ha'amine kibababala ana Venuwa'ata Yamumuna hinalulumamalena, meda yana huluva yamumuna Iya agaikuya ma hinalukahihiyena be ana abanuwa'udu'udu fa'ina.”

Yudasi Yesu nibaineyao agaidiya ginahawavemogatalena.

Madiu 26:14-16; Luke 22:3-6; Yoni 11:45-54

10Yesu gigahe-yo Yudasi-Isikaliyota yo'o tuwelo kalivana gina abaveyao ana tofaisewa kikaiwabudiyao agaidiya be higa badi nimadiya ginahawavemogatalena. 11Badi yana nuwanuwa hinogalina againe hivemwamwala, ada higahena vaita mani hinavelena. Au Yudasi givebutu tova hagihagina gilelena be Yesu nibaineyao agaidiya ginahawavemogatalena.

Yesu ana tomuliya buye Abamaduviviya a'ana hi'ana.

Madiu 26:17-25; Luke 22:7-13

12 # Yem 12:14-20 Tu tafalolo ana egana Beledi keke Wa'isina ana aiyeta nagona giyemu. Medema aiyetai-nadi Abamaduviviya ana sifi kabi'odi yadi abaveyao fa'ina himunumunudi. Kadu tovai-nadi tomuliya Yesu againe hi'ela higayo, “Yada tafalolo ana egana lobama ana tovenuwa'ata yana Abamaduviviya giluveda'ufo. Ha'againe nuwanuwa ime anana Abamaduviviya a'ana anakidewedeweni-yo kana'a?”

13-14Au Yesu ana tomuliya adi'iselu gi'iveninisedi gigahedi gigayo, “Wanana Yelusalema ana melaleya ada kaliva gufa watuwavina gi'avalana-ma ginamaduhagami. Wanamuliyena be gava manuwa againe ginaluku, medede againe tonimanuwa wanagahena wanagayo, Tovehawala gigahe gigayo, Hadema vetawana Iya fa'ikuya uhawahegeni be Abamaduviviya a'ana aku tomuliya buye ana'ani? 15Hidede amine wanagahe tu vetawana lakahina manuwa getane ivi ahe hi'iyaveyavela-ma bana ginavehawalemi. Medede againe a'a wanakidewedewena ide fa'ideya.”

16Ada au tomuliya adi'iselu hilowoga be Yelusalema againe hina, ada Yesu gilukahihiyena amine hinuhagana. Au Abamaduviviya a'ana hikidewedewena.

17Mala gibogi Yesu yana yo'o tuwelo buye hiluku manuweya. 18#Sam 41:9Ada hi'enolukekela hi'au'a tu Bana gigayo, “Gagahe velemo'ena mene kaliva sa'eyana agaimiya badi nibaikweyao agaidiya ginahawavemogataleku, bana buye ka'a'au'a-ma kalivai-nadi.”

19Au hi'ase'u'aulolo hivebutu sa'eyana sa'eyana hitoliluveluvena higayo, “Iya'eku ma ka'i keke?” Hidemi higahe.

20Yesu gigayo, “Kaliva sa'eyana omi yo'o tuwelo agaimiya bana a'a nau'a againe Iya buye a'utuvina kalivai-nadi. 21Fa'ina Iya Tohobu'ela gana'alika Yaubada bonana eto'etoladina gigaheyena amine. Tu hoiyoi kaliva Iya Tohobu'ela nibaikweyao agaidiya ginahawavemogataleku amanadi! Bana vita lakahina ginanuhagana. Ka'i bana kalivai-nadi keke gidatubuga, medema gidalubodana fa'ina keke vita gidawahini.”

Yesu sakalameni ana dewa giseyemaunena.

Madiu 26:26-30; Luke 22:14-20; 1 Kolinita 11:23-25

22Tu au ana toveya Yesu a'a givaina digo Yaubada againe givesiule gikihinena au ana tomuliya giveledi gigayo, “Hida wowoku, au wavaini.”

23Ada gowa givaina digo givesiule giveledi be moya'aidi hiyuyena. 24#Yem 24:8; 1Ko 10:16; Yo 6:54-56Ada gigahedi gigayo, “Hida dayagiku gimadumadu-ma moya'aidi fa'idiya, higa Yaubada yana veyao omi agaimiya gisena-ma ana iya'iyaya. 25Gagahe velemo'ena agaimiya hida babi ana oine aimo keke ganayu-havagileni tu tova mulina Yaubada yana avemwamwala ginasena ana toveya, oine ivaguna ganayuna. Mena abavemwamwalai-nadi badi yana itave'avina againe himimiyami-ma fa'idiya ginasena.” Hidedemi Yesu givenuwa'atadi.

26Ada au kwelidavadava hikweliyena. Hikweliyena gihavaina, hina oya Olive againe hilaka.

Yesu Fita yana vekeke fa'ina gigaheye-vagahina.

Madiu 26:31-35; Luke 22:31-34; Yoni 13:36-38

27 # Yo 16:32; Sak 13:7 Tu Yesu gigahedi gigayo, “Omi moya'aimi wana'otayabuyabuku, fa'ina tuwai-mo'ena Yaubada bonana eto'etoladina gigahe gigayo,

Sifi adi to'itave'avina ganamununa

ada sifi hina'abinauna.

28 # Mk 16:7 Tu Yaubada ahe ginasivemididiku-yo Galili againe wai gananagona.”

29Au Fita gigahena gigayo, “Ka'i badi moya'aidi hina'otayabuyabu digo, iya keke gana'otayabuyabu.”

30 # Mk 14:66-72 Yesu gigayo, “Gagahe velemo'ena againiya, hidema bogi-nadi kamukamu keke ginakwage luhei tu nagona o unamidivekekeyeku tohiye.”

31Atu Fita gigahe toyogina gigayo, “Ka'i nuwanuwadi iya O buye hinaluve'alikada, au keke-mo'a ganavekekeye.” Ada tomuliya moya'aidi kadu hidede amine higahe.

Yesu Gedasemani againe yana watagiya give'o'ola.

Madiu 26:36-46; Luke 22:39-46

32Tu Yesu ana tomuliya buye hina abaga sa'eyana ana egana Gedasemani againe himiyami tu gigahedi gigayo, “Hidedei unahiyoto tu ganana ganave'o'ola.” 33Ada Fita Yemesa Yoni buye ginauwedi be hinavebwa'uliyena, au givebutu gi'ase'u'aulolo lakahina be givedivediwe. 34#Yo 12:27#Hi 5:7-8Gigahedi gigayo, “Ga'ase'u'aulolo lakahina vaita yawaiku gida'alagolohini. Hidedei wanamiyami wanavanevanenega.”

35Au gina matalaviseya babiya gi'oduve'uve'umagigi, givebutu give'o'ola vaita ka'i ihayana be aulolo ana aituha keke gina'ayauneni. 36#Yo 6:38Kadu gigayo, “Kama'ase'aseku, gaitoma moya'aina a tagalowalowa. Ka'i hida aulolo ana gowa udavaihegeni, tu keke yaku nuwanuwa au O'eni ya nuwanuwa amine unahuluva.”

37Ada giyewana ana tomuliya adi'itoto hidauda-ma gihagadi, ada Fita againe gigahe gigayo, “Saimoni, ka'i o udadauda? Bai sa'eyanaga ka'i keke afaiweya unavanevanenega? 38Au wanavanevanenega wanave'ove'o'ola be keke aladibidibi againe wanaluku. Ase'asemi gihawahegena tu wowomi gifwalele.” Hidedemi Yesu gigahe.

39Kadu tova anavelu gina give'o'ola-havagi yana ve'o'ola nagona amine. 40Give'o'ola gihavaina, kadu giyewana badi hidauda-ma gihagadi matadi gineganega-mo'a fa'ina. Giluvagudi tu hiwowomumu fa'ina keke tamo gavadi hidagaheye.

41Kadu gina give'o'ola tova anaveto ada giyewana gigahedi gigayo, “Ka'i aimo wadadauda waveyaveyawai? Auwe'i. Tova a gilakayemu be Iya Tohobu'ela tokoyona nimadiya kaliva sa'eyana ginahawavemogataleku. 42Wamidi be kana. Ake! Wa'ita, kaliva nibaikweyao agaidiya ginahawavemogataleku-ma a giyemu.”

Yesu nibaineyao hikive'avina.

Madiu 26:47-56; Luke 22:47-53; Yoni 18:3-11

43Ada aimo gigahegaheni Yudasi giyemu, bana Yesu ana yo'o tuwelo kalivana, kadu yo'o yadi wafeto yadi wafuluma buye'i, badi abaveyao ana tofaisewa kikaiwabudiyao kadu kaliva lakahidiyao hi'iveninisedi be hi'ela.

44Tu tohawavemogatala aituha yo'o boi giveledi gigayo, “Kaliva veyauga againe ganalusiuleyena-ma bana kalivai-nadi wanakive'avina be wananauwe-hagihagiyena.” 45Yudasi giyemu-yo auhe'ama Yesu againe gina veyaugeya gilusiuleyena gigayo, “Aku Tovehawala siule.” 46Gigahe-yo yo'o Yesu hikive'avina. 47Tu kaliva sa'eyana Yesu liline gimidimidi-ma yana feto lakahina gisiwakana digo abaveyao ana tofaisewa adi tokaiwabu ana agetoga gilauna tagana giluyo'ena.

48 # Yo 18:20 Ada Yesu yo'o gigahedi gigayo, “Vaita Iya tomunugakai'afu amine yo aku munuga fa'ina wa'ela wafetomiyao wafulumamiyao. 49Tova tova manuwa-tafalolo lakahina againe Iya omi buye kamiyami gavehavehawala tu keke wadakive'aviku. Atu gavaimi tuwai-mo'ena Veyao Tuwaina ana buki Iya fa'ikuya gigahe, medema gidalakayemu velemo'ena.” 50#Md 26:31; Yo 16:32Yesu hidede amine gigahe-yo ana tomuliya moya'aidi hi'otayabuyabuna.

51-52Tu kwanatubulakahina sa'eyana Yesu gibwa'ubwa'ulina, ana vaigau kaleko kwayakwayana sa'eyanaga gi'osena. Ada kaliva tufoidi hikive'avina againe, ana kaleko kwayakwayana gimadulovena be konekonena gi'ota.

Yesu miYuda yadi Koniselo agaidiya hinauwena.

Madiu 26:57-68; Luke 22:54-55,63-71; Yoni 18:12-14,19-24

53Tu badi kaliva Yesu hikive'avina-ma abaveyao ana tofaisewa adi tokaiwabu againe hinauwena. Ada abaveyao ana tofaisewa kikaiwabudiyao moya'aidi kadu kaliva lakahidiyao kadu Mosese yana vehimeya ana tovehawala ahe hivaga'auta. 54Bana Fita wai gimulina lauveya gi'ela, tokaiwabu yana eda'awana-mo'ena againe giluku. Ada tuilala buye ali'auya hivetoga be ai givevevala.

55-56Tu abaveyao ana tofaisewa kikaiwabudiyao kadu miYuda yadi Koniselo moya'aidi togahe hileledi be higa Yesu hinahawavekoyoyeni-yo adifaiweya alikeya hinahegena. Togahe-kawowo moya'aidi hihawavekoyoyena tu yadi gahe tulina tulina. Au keke tamo hakwadi to'ita velemo'ena hidahagani.

57-58 # Yo 2:19-21 Ada kaliva tufoidi hitowamidi gahe-kawowo amine hihawavekoyoyena higayo, “Yana gahe anogalina gigayo, Hida Yaubada yana manuwa kaliva hiyogona-ma ganayawelina, ada aiyeta tohiye kanahegeni-yo au kadu velugana keke kaliva hinayogoni-ma ganakivemididina. Hidedemi gigahe ma anogalina.” 59Atu kadu badi'iyao yadi gahe tulina tulina, keke gahe sa'eyanaga hidagaheyeni.

60Au abaveyao ana tofaisewa adi tokaiwabu tovedewayauga hinafadiya gitowamidi Yesu againe gigahe gigayo, “Ka'i bonalaufata keke afaiweya? Gavadi-yo hida kaliva yadi hawavekoyo keke udafatani?” 61#Mk 15:5; Ais 53:7Tu Yesu give'amata, keke tamo bonalaufata gidayakahini. Au tokaiwabu kadu gitoliyena gigayo, “Ka'i velemo'ena O Keliso Bana'e kadavadavana-ma Natuna, higa kaliva Yaubada givegidena be yada yo'o ginanagoyeda kalivai-nadi o ka'i keke?”

62 # Mk 13:26; Dan 7:13 Yesu gigayo, “Ika, Iya kalivai-kuna. Ada Iya Tohobu'ela abavetoga kikaiwabuna Tofaiwala-mo'a i'atagine ganahiyoto-ma wana'itaku. E, buhibuhi againe lobameya gana'ela'ela-ma wana'itaku.”

63-64 # Yo 19:7; 1Veh 24:16 Yesu hidede amine gigahe-yo abaveyao ana tofaisewa adi tokaiwabu ginuwakoyo, tauna ana vaigau gikaninina gigayo, “Auwe. Kaliva kadu velugadiyao yana dewa hinalukahihiyena-ma aimo keke kanaleledi. Yaubada gihawatagona ma a wanogalina. Gavaimi wanavehimeya?” Au moya'aidi hihawavekoyoyena higa vaita yana hawatagona fa'ina gida'alika. 65#Ais 53:5Au tufoidi hivebutu Bana againe hikiwakiwala, ada magigina hikevana au hitutu'atugeni tu hihawavelaigena higayo, “Yoi! Hakwadi gimunumunu-ma mene u'ayauneni?” Ada tuilala hinauwedi be himunukoyokoyona.

Fita Yesu givekekeyena.

Madiu 26:69-75; Luke 22:54-62; Yoni 18:15-18,25-27

66-67Tu Fita gava melaleya gihiyoto tu abaveyao ana tofaisewa adi tokaiwabu ana agetoga kwamayoku sa'eyana gi'ela, ada Fita ai againe givevevala-ma gi'ita-yo gi'itakwanekwanena gigahena gigayo, “Kadu o'eni Yesu kwanaNasaledi buye wamiyami.”

68Atu bana givekeke gigayo, “Iya keke. Keke gadahalamane gavadi ugahegaheye.” Au gina yuwa abanauna againe ada kamukamu gikwage.

69Abanauna againe gimiyami tu bana agetogai-nadi gi'ita-yo au givebutu tolauboda agaidiya gigahe-havagi gigayo, “Hida hima kaliva au Yesu yana yo'o kalivana.”

70Atu Fita givekeke-havagi. Himiya kabisona tu badi tolauboda bana againe kadu higahe higayo, “Au makewa o'eni sa'eya agaidiya, fa'ina o kadu kwanaGalili.”

71Au Fita gigayo, “Ka'i keke gadagahe velemo'ena digo, Yaubada gidahawave'aviku. Bana kalivai-nadi wagaheyena-ma keke gadahalamaneni.”

72 # Mk 14:30 Gigahe-yo auhe'ama kamukamu gikwage-havagi. Ada Fita Yesu yana gahe nuwana gi'afolena gigayo, “Kamukamu keke ginakwage luhei tu nagona unamidivekekeyeku tohiye.” Au nuwana gi'afoleni tu givebutu gitagitagi.

Currently Selected:

Maki 14: viv

Highlight

Copy