Maki 13

Yesu manuwa-tafalolo ana lauyawela fa'ina gilukahihi.

Madiu 24:1-2; Luke 21:5-6

1Yesu manuwa-tafalolo lakahine gihobuhobu tu ana tomuliya sa'eyana manuwa giyofena gigayo, “Tovehawala u'ita. Manuwa ana kabala gavatubuga! Aiyoi, hima ana aiyogona tulina tulina manuwa vewaga!”

2 # Lu 19:44 Yesu gigahena gigayo, “Ika, wadema manuwa adi ita vewaga fa'ina ganagahe. Kabala againe hikivetalana tu aimo keke tamo kabala kabalahiyana tabone ginada, au moya'aina hinatutuyauyaulena.”

Tova mulina aulolo tagiya lakahina babiya ginalakayemu.

Madiu 24:3-22; Luke 21:7-19

3Tu Yesu gina oya Olive againe gilaka givetoga ada manuwa-tafalolo lakahina gihagana. Au badi Fita Yemesa Yoni Anidulu adikaibe'uyanina Bana againe hi'ela hitoliyena higayo, 4“Unavenuwa'atama, gava tova manuwa-tafalolo ana lauyawela ulukahihiyena-ma ginalakayemu? Mena gaitomai-dina gavadi gavadi hinalakayemu ma gava aituha ana'ita-yo anahalamane-hagihagiyeni?”

5Au Yesu givebutu aituha fa'ina givenuwa'atadi gigayo, “Taumiyao wana'itave'avimi be keke tamo hakwadi yana fwaya againe ginanuwa'abiyemi. 6#Mk 13:21-22; 1Yn 2:18Fa'ina aimo tufoidi moya'aidi hina'ela aku egana hinayakahina hinagayo, Kaliva Yaubada givegidena-ma iya kaliva-mo'eku. Hidedemi hinagahe be kaliva moya'aidi yadi fwaya againe hinanuwa'abiyedi. 7Kadu aituha sa'eyana ma gaviya moya'aina ginalakayemu ada kaliva yadi ve'amunumunuga butudi wananogalina, kadu hai lauveya hinalulugaviya medema valeyadi wananogalina. Hidedemi wananogalina amine keke ase'asemi gina'akolukoluni. Mena gaitomai-dina anafaiweya hidalakayemu tu tova ana lauyabu au aimo muliya-mo'ane ginalakayemu. 8Yo'o sa'eyana mali yo'o buye hinave'amunumunuga, kadu fafali sa'eyana mali fafali buye hinalulugaviya. Li'uli'u lakahina fafali tulina tulina agaidiya hinalakayemu, kadu meda anafaiweya loka moya'aina. Venatuna ana tova ginaluveda'ufo againe kwamayoku hinavefahedi-yo yadi aulolo ginavebutu amine, meda anafaiweya mena gaitomai-dina galukahihiyedi-ma hinalakayemu againe aulolo tagiya lakahina ginavebutu.

9 # Md 10:17-22 Atu taumiyao wana'itave'avimi fa'ina aimo kaliva hinakive'avimi be kotu againe hinahegenauwemi, kadu yadi manuwa-abavehawala ana egana sinagogi agaidiya hinavekotumi be bulava againe hinalaulaumi. Ada hinahegenauwemi be kabemani kadu kini matadiya wanamidi ada omi aku tomuliya fa'ina hinavedewayaugimi. E, badi matadiya wanamidi be Iya fa'ikuya wana'awatalatalaina. 10#Md 28:19Ada yaku kaliva Yaubada yana Venuwa'ata Yamumuna yo'o tulidi tulidi agaidiya hinalumamalena be babi matatabuna hinaluyabuna. Hidedemi yo'o moya'aidi hinavenuwa'atadi tu muliya tova ana lauyabu ginalakayemu. 11Tu hinakive'avimi be hinavekotumi ana toveya, keke yami wamatauta wanavenuwanauna-vagata vaita ka'i gavaimi wanagahe. Au medema tovai-nadi gavaimi Yaubada gina'alavelevelemi, medema wanagaheyena. Fa'ina hifufu wanagaheyena-ma keke taumiyao yami nuwanuwa againe ginalakayemu, au Alu'aluwa Mahalina awamiya ginalukahihi.

12Ada kaliva sa'eyana tauna tobohiyana kaliva nimadiya ginahawavemogatalena be hinaluve'alikana fa'ina, kadu anafaiweya kwamana tamana natuna ginahawavemogatalena be hinaluve'alikana. Ada we'owe'o badi tamadiyao agaidiya hinavenibaina be tamadiyao hinadiyao alika hinanuhagana fa'ina. 13#Yo 15:18-21Ada omi aku tomuliya fa'ina kaliva moya'aidi omi agaimiya hinanuwanuwakoyo, tu gaveyao wana'atuvefa'ila be Yaubada againe wanamiyamiyave'avina tu alika ana maka, medema ginakibababalemi.

14 # Dan 11:31 Tu aimo abakivekoyo koyo-mo'ena abaga hawahawatana againe hinakivemididina-ma wana'itana againe omi Yudiya ana fafali againe wanamiyami-ma au oyeya wana'ota. (E, omi tohawa wana'itanuwenuwena.) 15Hai kaliva yana tolameya ginamiyami, medema keke yana manuweya ginaluku be higa yana lokoloko ginavaini. Au ginamadu'ota. 16Hai kaliva yana faheya ginamiyami, medema keke melaleya ginayewani be higa ana lifi ginavaini. Au ginamadu'ota. 17Hoiyoi vevine wahifugadiyao kadu vevine aimo hivehuvehuhu amanadi! Mena ota ana toveya vita lakahina hinanuhagana. 18Yaubada againe wanave'o'ola be higa mena gaitoma koyona keke wehi ana toveya ginalakayemu. Ka'i wehi digo gavaimi be oyeya wada'ota? 19#Dan 12:1Fa'ina medema aiyetai-dina agaidiya vita lakahi-mo'ena ginalakayemu. Mena vitai-nadi ma boi tuwai-lokalokana Yaubada babi gimidibubuna ana toveya kadu tova hinafane keke hidanuhagani. Kadu aimo tova mulina keke hidede amine hinanuhagani. 20Tu Kaiwabu mena tova vita-mo'ena galukahihiyena-ma ana aiyeta yana nuwanuwa againe ahe gidabana be ginakali'uho. Ka'i keke gidadabani digo, kaliva moya'aidi hidabwavi. Atu Tauna yana kaliva giluwafadi be yana yo'ogaga agaidiya hiluku-ma adi lugolagola fa'ina mena tovai-nadi hinafane ginadabana be ginakali'uho.

Yesu keliso-fwayafwaya fa'idiya givenuwa'ata.

Madiu 24:23-28; Luke 17:23-24

21Tu ka'i tamo hakwadi ginagahemi ginagayo, Wa'ela hida kalivai-nadi givekeliso-ma wana'itana, o ka'i ginagayo, Wanana yuwa kaliva givekeliso-ma wana'itana. Ka'i hidede amine ginagahe o keke bonana wanavetumaganeni. 22#2Te 2:9; Ha 13:13Au tova mulina tove'alololo hinalakayemu be hinagahe vaita hidavekeliso o ka'i hidavefalofita higa Yaubada bonana ana to'awatalatalaina. Aituha fifiwaladi ada abaveyaulowoga badi hinafaisewadi be hinagaluvaluva ka'i yadi fwaya againe Yaubada yana kaliva hinanuwa'abiyedi. E, kaliva vevine Yaubada giluwafadi be yana yo'ogaga agaidiya hiluku-ma hinagaluvaluvadi vaita hinanuwa'abiyedi. 23Au taumiyao wana'itave'avimi. Tove'alololo yadi dewa fa'ina gavenuwa'ata-vagahimi.” Hidedemi Yesu gigahe.

Tohobu'ela yana yemuna-havagi fa'ina.

Madiu 24:29-35; Luke 21:25-33

24 # 2Fi 3:10; Ha 6:12-13 Tu Yesu kadu gigayo, “Mena vita lakahi-mo'ena ana tova ginahavaini-yo kauwana gina'uyuyu kadu vaikohi ana mahalina ginakwe'u. 25Ibadibadi lobameya gina'akolukoludi be hinabe'u, ada lobama ana gaitoma fifiwaladiyao adi iviya gina'atuliyeliyedi.

26 # Md 26:64 Hidedemi lobama ana loi hinahuluva tu Iya Tohobu'ela buhibuhi againe gayewayewa'ela-ma hina'itaku. Yaku wafaiwala lakahina kadu yaku wamahalina ve'akinamanamalina gayewayewa'ela-ma hina'itaku. 27#1Te 4:16-17Au yaku tovenuwa'ata gana'iveninisedi be kaliva vevine Yaubada giluwafadi-yo yana yo'ogaga agaidiya hiluku-ma hinavaga'auhidi. Fafali tulina tulina wabolimaneya wayavalaseya walaube'uya wa'oyeya, ka'i hai yuwa babi analauyabu o wese lobameya hinamiyami-ma hinavaga'auhidi be Iya Tohobu'ela agaikuya hinavega'auledi.

28Wa'ita, lalava ana dewa wananuwenuwena be enohega wanavaina. Lalava ginatafa ma ka'ita-yo kagayo, Kauwana yana tova giluvedaveda'ufo. 29Meda anafaiweya mena aituhai-dina hinalakayemu ma wana'itana againe, au wanahalamanena yaku yewa'ela giluveda'ufo-mo'a. 30Gagahe velemo'ena hida tova ana yo'o keke moya'aidi hina'alika-'owoga tu nagona mena gaitomai-dina moya'aina hinalakayemu. 31Lobama be babi ginayawowola tu bonaku keke ginayawowola, au ginaduva-vagata.

Yesu yana yewa'ela ana tova keke tamo hakwadi

gidahalamaneni.

Madiu 24:36-44; Luke 21:34-38

32 # Af 1:7 Tu yaku tova ka'i gava aiyeta o gava bai ganayewa'ela-ma keke tamo hakwadi gidahalamaneni. Badi tovenuwa'ata lobameya keke hidahalamaneni, kadu Iya Yaubada Natuna keke gadahalamaneni. Au Kamaku anakaibe gihalamanena. 33#Md 25:13Yaku yewa'ela tova keke wadahalamaneni fa'ina, ase'asemi wanakidewedewena be wanalulauboda. 34Yaku yewa'ela ana dewa ganalukahihiyena. Vaita kaliva lakahina mali fafaliya ginana amine Iya'eku. Ana agetoga givehimeyedi be yana manuwa kadu yana faha hina'itave'avina. Kaliva sa'eyana sa'eyana yadi faisewa giveledi, ada eda'awana ana to'itave'avina againe gigahe gigayo, Keke unadauda au unalulauboda.

35-36 # Lu 12:37-38 Meda anafaiweya omi wanalulauboda fa'ina Iya tonimanuwa amine yaku yewa'ela ana kauwana keke wadahalamaneni. Ka'i mala ginabogi o bogi nafone o kamukamu ginakwage o mala ginalauna, kauwana gavaiya'amine be Iya gana'ela. Hidema fa'ina wanalulauboda be keke ganavefuta'ami-yo omi wadadauda ma gananuhagami. 37Ada gavaimi omi agaimiya gagahe amine, meda kaliva moya'aidi agaidiya gagahe be wanalulauboda.” Hidedemi Yesu ana tomuliya givenuwa'atadi.

Currently Selected:

Maki 13: viv

Highlight

Copy