Maki 16
16
Yesu gimididi-havagi.
Madiu 28:1-10; Luke 24:1-12; Yoni 20:1-10
1Tu sabati, higa Satadei, a hihegena tu Meli vineMagidala kadu Meli Yemesa hinana kadu Salome hina vanedimodimo hikimonena be hinana Yesu wowona hinabunamina. 2Au tafaloloya kauwana giyemuna-mo'a ma hilowoga be hina tomohuyehuyeya. 3Edeya hinauna tu buye hive'agahegahe higayo, “Hakwadi kabala tomohuyahuya ana eda'awana gi'enobodana-ma ginave'awawani ide fa'ideya?”
4Mena kabalai-nadi ma lakahi-mo'ena. Tu hi'italele againe, tamo hakwadi kabala give'awawana ma hi'itana. 5Au tomohuyehuyeya hiluku-yo kwanatubulakahina sa'eyana hi'itana, vaigau kwayakwayana gi'osena ada tomohuyahuya i'atagine gihiyoto. Hi'ita-yo ase'asedi gi'akolukoluna.
6Bana gigahedi gigayo, “Keke wanamatauta. A gahalamanena Yesu kwanaNasaledi hikivekelosena-ma walelelena. Keke hidede againe gidamiyami, au gimididi-havagi. Wa'ela be abaga hisena-ma wa'ita. 7#Mk 14:28Wana'ita-yo au wanamaduna ana tomuliya Fita buye wanagahedi wanagayo, Yesu Galili againe wai ginagona yuwadedei wana'itana boi gigaheyena amine.”
8Au vevine himadulowoga tomohuyahuya hi'otayabuyabuna, fa'ina ase'asedi gi'akolukoluna kadu hivetatava. Ada himatauta fa'ina, keke tamo hakwadi hidavenuwa'atani.
Yesu Meli vineMagidala againe Tauna gi'ivemogatalina.
Madiu 28:9-10; Yoni 20:11-18
[ 9#Lu 8:2Tu mala gilauna tafaloloya Yesu ahe gimididi-havagi yo Meli vineMagidala againe Tauna gimidi'ivemogatalina. Bana Meli-nadi boi yafune seveni hiluvaiyena tu Yesu giwavidi. 10-11Au Meli gina be badi boi Yesu buye himiyami-ma givenuwa'atadi. Badi yadi wanuwavita hitagitagi tu givenuwa'atadi gigayo, “Yesu yawayawana gimimiyami. Iya tauku ga'itana.” Tu yana gahe keke hidavetumaganeni.
Yesu edeya gilakayemu tomuliya adi'iselu agaidiya.
Luke 24:13-35
12Muliya Yesu ana ita tulina amine tomuliya adi'iselu agaidiya giyemu. Badi melala kabi'ona wala'aiya hinauna tu Yesu badi agaidiya Tauna gi'ivemogatalina. 13Au Yelusalema againe hiyewadi be tomuliya velugadiyao hivenuwa'atadi tu badi yadi gahe keke hidavetumaganeni.
Yesu yana yo'o ileveni agaidiya gilakayemu.
Madiu 28:16-20; Luke 24:36-49; Yoni 20:19-23; Afositolo 1:6-8
14Muliya-mo'ane yana yo'o ileveni hi'au'a tu badi agaidiya Tauna gi'ivemogatalina. Ada gidakeyedi yadi vetumagana keke kadu tagadi gikulu fa'ina, badi ahe gimididi-havagi yo hi'itana-ma yadi gahe keke hidavetumaganeni. Hidema fa'ina gidakeyedi.
15Kadu gigahedi gigayo, “Fafali moya'aina agaidiya wanana be kibababala ana Venuwa'ata Yamumuna kaliva moya'aidi agaidiya wanalulumamalena. 16#Af 2:38, 16:31-33Gava kaliva ginavetumaganeku-yo ginabafitaiso, medema kibababala ginanuhagana. Atu gava kaliva keke ginavetumaganeku, medema aimo matahiwadi ginanuhagana. 17-18#Af 2:4, 8:7, 28:3-6; Lu 10:19Ada badi hivetumaganeku-ma faiwala ana iya'iyaya hidede amine hinaseyemaunena. Aku eganeya yafune hinawaviwavidi, meya tulina tulina agaidiya hinalulukahihi. Ka'i oloto hinasilakahina o ka'i gufa laulaugina hinayuna digo, keke hinabwavi. Nimadi to'aulolo agaidiya hinaseni-yo hinayamumu. Vetumagana ana iya'iyaya au hidede amine.”
Yesu lobameya gilaka.
Luke 24:50-53; Afositolo 1:9-11
19 #
Af 2:33-34; Ef 1:20 Tu Kaiwabu Yesu ana tomuliya agaidiya gigahe gihavaina, Yaubada lobameya gisilakahina ada abavetoga kikaiwabuna Yaubada i'atagine gihiyoto. 20#Af 14:3; Hi 2:3-4Badi tomuliya ma hitauya fafali tulina tulina agaidiya hilumamala, ada Kaiwabu gifaiwalaveledi be aituha fifiwalana hififaisewani-yo kaliva yadi laumamala fa'ina higahe higayo, “Velemodi.” Au hidede amine.]
Currently Selected:
Maki 16: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
