Luke 1
1
1-4Yo siule Kauveya Tiyofilo. Keke gavana fa'ina tu vaita gidalubodaku be Yesu kahihina matana matana amine o fa'iniya gada'etoladina be higa ana nuwanuwa kaliva yadi vehawala againe ahe unogalidi-ma nuwanuwai-dina au velemo'ena ma unahalamanena. Boi badi kaliva Yesu yana gugai give'inubena be ginauwena ana abalauyabu ma taudiyao matadiya hi'itana ada yana venuwa'ata hilumamalena au gaitomai-dina hihawavelevelema. Kaliva tufoidi moya'aidi hivegalena be gavadi gavadi hinafameya hilakayemu, medema kahihidi hi'etoladina, badi to'itai-dina hihawavelevelema amine. Siule Kauveya, badi hi'etoladina tu iya tauku kahihi matatabuna matana matana ana abave'inuba be gina ana abalauyabu yaku wa'idibumuhiga galele-hagihagiyena, fa'ina vaita gidalubodaku be kadu iya kahihi-nadi o fa'iniya gana'etoladina.
Yoni yana tubuga fa'ina Gabeliyela Sakalaiya givenuwa'atana.
5Kahihi-nadi hidede amine. Helodi Yudiya ana fafali givehimeyena ana toveya abaveyao ana tofaisewa sa'eyana gimiyami ana egana Sakalaiya. Tofaisewai-dina yadi yo'o tulina tulina ada bana Sakalaiya Abaiya yana yo'o kalivana. Meda vavinena Elisabeti abaveyao ana tofaisewa adi yo'o kwamayokuna higa bana Eloni bwanenena. 6Ada adi'iseluga yadi dewa yegayegana Yaubada matane. Kaiwabu yana vehimeya yana hawata moya'aina hi'ita'itave'avina, keke tamo adi wavita. 7Tu Elisabeti kakalina fa'ina natudi keke, ada adi'iseluga hivesilakai-mo'a.
8-9 #
Yem 30:1,7-8 Himiyami tu Sakalaiya yana yo'o yadi faisewa manuwa-tafalolo hinagene ana tova gilakayemu. Abaveyao ana tofaisewa yadi dewa amine kaliva sa'eyana sa'eyana adi egana kabala againe hi'etoladina digo gowa againe hidodo-yo tofaisewa sa'eyana matana lowolowogina tu kabala givaina. Medema tovai-nadi Sakalaiya ana egana hivaina higa Kaiwabu yana manuwa-tafalolo againe gidaluku be vanedimodimo ana egana inisenisi gidakabuna. 10Giluku be inisenisi gikabukabuni tu kaliva moya'aidi melaleya hivaga'auta amanadi Yaubada hihawahawadavadavana. 11Au Yaubada yana tovenuwa'ata Sakalaiya againe auhe'ama gilakayemu, inisenisi ana aba'akabu i'atagine gimidi. 12Ada Sakalaiya gi'ita-yo ase'asena gi'akolukoluna kadu gimatautave'ine. 13Tu tovenuwa'ata gigahena gigayo, “Sakalaiya, keke unamatauta. Ya ve'o'ola Yaubada ahe ginogalina. Tu vavine Elisabeti natu kaliva ginavenatunena ada unavewagana Yoni. 14Bana kwamana aimo ya abavemwamwala be ya abagakahikahi, kadu kaliva moya'aidi yana tubuga fa'ina hinavemwamwala. 15#Ail 6:2-3Fa'ina bana'e aimo ginakaiwabu Yaubada matane. Ana hawata ma oine kadu mali gufa laulaugina keke ginayuni. Hinana hinavenatunena ana toveya Alu'aluwa Mahalina ginaluvaiye-vagahina. 16Bana natu-nadi miIsileli tufoidi moya'aidi Yaubada yadi Kaiwabu againe ase'asedi ginakiviviyena. 17#Md 11:14, 17:11-13; Mal 4:5-6Bana wai ginanagoni tu Kaiwabu wai ginamulina. Yana wafaiwala kadu yana wanuwanuwa tuwai-mo'ena Elaiya Yaubada bonana gi'awatalatalainena amine, meda bana ginafifaisewa. Yana laumamala againe kaliva ase'asedi natudiyao agaidiya ginakiviviyena be hinaveyao. Kadu todibutoyoga nuwadi ginakiviviyena be yadi dewa koyona hinahegeni-yo hinanuwanuwa-hagihagi. Au hidedemi Kaiwabu yana ela fa'ina kaliva ase'asedi ginakidewedewena.” Tovenuwa'ata yana gahe au hidede amine.
18Tu bana Sakalaiya tovenuwa'ata gitoliyena gigayo, “Gavaiya'amine ganahalamaneni ya gahe velemo'ena o ka'i keke? Fa'ina hima gavekaliva kadu vavineku givekwamayoku.”
19Au tovenuwa'ata gigayo, “Iya Gabeliyela. Yaubada matane gamidimidi ma Bana loseyanina gi'iveniniseku be againiya ga'ela higa hida valeya hagihagina gadalukahihiyena. 20Tu unogali! Yaku gahe keke udavetumaganeni fa'ina, ago ginasebodana. Lukahihi unafaniyena unanunauwena tu gaitomai-nadi gagaheyena-ma tova gilubodana againe ginalakayemu-yo agoseboda ginahavaina.” Au hidedemi tovenuwa'ata gigahe.
21Tu gava melaleya kaliva Sakalaiya hibodabodana, ada yana miyafa'ila manuwa-tafalolo hinagene fa'ina aimo nuwadi ginauna. 22Hibodaboda tu gilakayemu againe gahe keke anafaiweya. Au kaliva buye hive'agahegahe higayo, “Ka'i hima manuwa-tafalolo againe gi'eno'ita fa'ina agona gisebodana.” Gahe keke anafaiweya fa'ina u'une gilukahihi.
23Ada ahe yana faisewa ana aituha giluyabuna, au giyewana yana manuweya. 24Himiyami tu vavinena Elisabeti givehifuga ada vaikohi faifi agaidiya keke yo'oya gidanunaudadana au gimiyami yana manuweya. 25Gigahe gigayo, “Ho Kaiwabu! Wona velemona Bana Tonuwakabubu! Boi kakaliku fa'ina yaku wawowomumu tu tova hidevama Kaiwabu gifaiwalaveleku-yo natuku ganuhagana, fa'ina yaku wowomumu yo'o matadiya givaihegena.” Au hidedemi Elisabeti gigahe.
Yesu yana tubuga fa'ina Gabeliyela Meli givenuwa'atana.
26Tu Elisabeti ahe vaikohi sikisi gihegedi againe, Yaubada yana tovenuwa'ata ana egana Gabeliyela Galili ana melala sa'eyana againe gi'iveninisena, melala ana egana Nasaledi. 27#Md 1:18Ulaulatanina sa'eyana againe gi'iveninisena, kwamayoku-nadi kaliva ana egana Yosefa gisetagona. Bana Yosefa Devida bwanenena ada ulaulatanina ana egana Meli. 28Tovenuwa'ata kwamayoku againe gi'ela gigayo. “Siule Meli, O Yaubada ginuwadoge-mo'e! Bana Kaiwabu a Toveluga.”
29Tu bana Meli tovenuwa'ata yana gahe fa'ina ase'asena gi'akolukoluna lakahina ada nuwana givegafo'uya'uya gigayo, “Gavadi-yo hidedemi givesiuleyeku?” 30Au tovenuwa'ata gigahena gigayo, “Meli, keke unamatauta, fa'ina Yaubada yana nuwadoga againiya givetalaiyena. 31#Md 1:21Aimo unavehifuga be natu kaliva unavenatunena ada unavewagana Yesu.
32-33 #
2Sam 7:16-17; Ais 9:7 Bana kikaiwabuna ada hinavewagana Tomiyagetane-mo'ane Natuna. Ada Yaubada Kaiwabu ginakivekaiwabuna be bwanenena Devida yana didiga'u'u ginavelena au Yakobu yana yo'o agaidiya ginavehimeya-vagata. E, yana abavehimeya ginaduva-vagata tova inaga inaga keke ana abalauyabu.” Au hidedemi tovenuwa'ata gigahe.
34 #
Md 1:20
Tu Meli gigayo, “Iya hima vineulatana keke moganeku tu gavaimi-yo ganavehifuga?”
35Au tovenuwa'ata gigayo, “Alu'aluwa Mahalina ginaluvaiye be Tomiyagetane-mo'ane yana faiwaleya o ginayava. Hidema fa'ina kwamana unavenatunena ma Mahalina ana kwamana ada hinavewagana Yaubada Natuna. 36Wa'ita, o hina Elisabeti givekauve'a-mo'a tu givehifuga. E, bana kwamayoku hihawavekakalena-ma ahe yana vaikohi sikisi gihegedi. 37Au mema gaitoma moya'aidi vitadi au Yaubada ana tagalowalowa.”
38Hidedemi gigahe-yo Meli gigayo, “Yamumuna. Iya Kaiwabu ana agetoga. Gavaimi ugaheyena medemi agaikuya gidalakayemu.”
Meli Elisabeti againe giwakawaka.
39-40Gimiyami tu Meli gikidewadewa be gilowoga, Yudiya ana avala'oya againe gimaduna ana melala sa'eyana againe gihobudamana be higa Elisabeti gina'itana. Sakalaiya yana manuweya giluku-yo Elisabeti gilusiuleyena. 41-42Ada Elisabeti Meli yana lusiule ginogalina againe kwamana kamone gikolekole lakahina au Alu'aluwa Mahalina Elisabeti giluvaiye-mo'ena be gikova'awafatafata gigayo, “O'eni ma Yaubada ahe ginuwakabubuye-mo'e. Ya vemwamwala mali vevine moya'aidi yadi vemwamwala gitubuhegena kadu kwamana unavenatunena-ma Yaubada yana nuwakabubu lakahina ginanuhagana. 43Gavadi-yo hida nuwakabubu lakahina iya ganuhagani, higa o yaku Kaiwabu hinana u'ela agaikuya uwakawaka? 44U'ita, ya lusiule ago ganogalina againe kwamana kamokuya vemwamwala gi'ayauneni-yo gikolekole lakahina. 45Gavadi unanuhagana Kaiwabu gigaheyena-ma uvetumaganena fa'ina, ya vemwamwala gavatubuga!”
Meli yana kwelidavadava.
46 #
1Sam 2:1; Ais 61:10 Tu Meli givebutu gikwelidavadava gigayo,
Ase'asekuya Kaiwabu gadavadavana,
47kadu Yaubada aku Tokibababala againe
alu'aluwaku givemwamwala lakahina
48 #
Lu 11:27
Iya ana agetoga nonogana
gi'itanuwakabubuyeku.
Adamoya be aimo hinanunauwena
kaliva adi hewahewa moya'aidi
yaku vemwamwala gavatubuga
medema hinayakayakahina.
49Fa'ina Bana Tofaiwala-mo'a
abayaulowoga iya fa'ikuya gifaisewana,
Bana ana egana mahamahalina.
50 #
Sam 103:17
Gaveyao Bana hive'amohimohinena
medema agaidiya yana hinekalikali,
adi hewahewa adi hewahewa.
51Nimana yana faiwala ahe ginaseyemaunena.
Gaveyao nuwahinagediya hiseselakalaka
medema ahe ginaluyauyauledi.
52 #
1Sam 2:7
Tokikaiwabu ahe ginakihobuyedi
be yadi didiga'u'u hinahegena,
tu tonuwahobu ginakilakahidi.
53 #
Sam 107:9
Nuwakabubu tulina agaidiya
tomafulauga ahe ginave'ahiyauwadi,
tu wakalivadiyao makagekagediyao
ginawavidi be hinana.
54-55 #
Ais 41:8-10; Mai 7:20; Aba 17:7 Tuwai-mo'ena bwanenedeyao agaidiya
yana veluga fa'ina giwonadabadaba,
Abelahamo ana unumamomo buye'i.
Mena yana gahe keke havahavaina
au yana hinekalikali againe
nuwana ahe ginanunauyena,
kadu yana wonadabadaba amine
ide miIsileli ana agetogamomo
ahe ginakive'avida ada veluga fa'ina.
Au hidedemi Meli yana kwelidavadava. 56Ada auwe vaikohi tohiye amine Meli Elisabeti buye himiyami tu muliya giyewana yana melaleya.
Yoni Tobafitaiso yana tubuga fa'ina.
57Meli gina tu Elisabeti yana venatuna ana tova giyemu be kaliva givenatunena. 58Tobohiyadiyao kadu yadi yo'o kalivadi valeyadi hinogalina higa Kaiwabu gihinekalikaliyedi lakahina, ada badi'e buye hivemwamwala.
59-60 #
Aba 17:10-12; Lu 1:13 Tu kwamana ana aiyeta eita givaidi againe hivaga'auta be Yaubada yana iya'iyaya wowone hinatomogolohina. Hinuwanuwa vaita tamana ana egana amine hidaluwatuyena Sakalaiya ma hinana himadugahe higayo, “Keke-mo'a! Egana kanavelena Yoni.”
61Badi higayo, “Hima gavana-yo hida egana keke tamo ami yo'o agaidiya gidawahini tu hida kwamana ginawahini?”
62Au tamana againe u'udi hilewalewana be higa hinahalamanena gava egana ginaluwatuyeni. 63Au aba'etoladi give'o'ola be gi'etoladina, “Ana egana Yoni.” Ada moya'aidi hiyaulowoga. 64Ada auhe'ama awana gita'ala be agona gi'afolena ada givebutu gigahegahe Yaubada gidavadavana. 65Au yadi yo'o buye himiyami-ma himatautave'ine. Ada Yudiya ana avala'oya melalidi tulina tulina agaidiya gaitomai-dina moya'aidi hilakayemu-ma fa'idiya hilulukahihi. 66Ada moya'aidi valeyai-nadi againe nuwadi givegafo'uya'uya higayo, “Hida kwamana aimo gavadi ginagani?” Au hidedemi higahe fa'ina Kaiwabu gifaiwalavelena ma hi'itana.
Sakalaiya yana kwelidavadava.
67Tu Alu'aluwa Mahalina Yoni tamana Sakalaiya giluvaiyena be Yaubada yana venuwa'ata gigaheye-vagahina gigayo,
68Kaiwabu miIsileli yada Yaubada
kanadavadavana fa'ina
yana yo'o ahe gina'itanuwakabubuyeda,
ada vita agaidiya ginatutuvehobuda.
69Ada Tokibababala fifiwalana
yana tofaisewa Devida bwanenena ma
ide fa'ideya gina'iveyemaunina.
70Tuwai-mo'ena falofita mahamahalidiyao
Yaubada bonana hi'awatalatalainena
ada yana wonadabadaba hidede amine.
71 #
Sam 106:10
Nibaideyao agaidiya ginakibababaleda,
kadu gaveyao moya'aidi hivenikohiyeda
medema agaidiya ginalugolegoleda.
72-73 #
Aba 17:7, 22:16-17 Kadu bwanenedeyao ginahinekalikaliyedi
ada yana veyao mahamahalina
kadu yana wonadabadaba buye
bwaneneda Abelahamo againe gisena,
medema againe nuwana ginanunauyena.
74Gigahe vaita ide miIsileli
nibaideyao nimadiya ginalugolegoleda
be Bana againe adafaiweya kanafaisewa
kanadavadavana keke yada wamatauta.
75Kadu yada dewa mahamahalina
be yada nuwanuwa yegayegana
Bana matane adafaiweya kanamiyami
yawaida ana aituheya.
Au hidedemi Yaubada yana kibababala fa'ina Sakalaiya gigahe. 76#Md 3:3, 11:10; Ais 40:3Kadu Sakalaiya natuna fa'ine gigaheye-vagahina yana gahe gi'alavekwelina gigayo,
O natuku, Tomiyagetane-mo'ane
bonana ana to'awatalatalaina
amine kaliva o hinavewaga.
O wai unanagona be Kaiwabu
yana eda unakidewedewena.
77Kaiwabu yana yo'o unavenuwa'atadi
yadi dewa koyodi hinahegedi-yo
Kaiwabu yadi koyona ginayawelina
be hidedemi adi kibababala hinavaina.
78 #
Ais 60:1-2, 9:2; Md 4:16; Yo 8:12 Au nuwakabubu hidedemi hinanuhagana
fa'ina yada Yaubada Tohinekalikali-mo'a.
Kauwana gilaka be gituvemahalida amine,
ada Tokibababala nuwada ginakivemahalina.
79Kadu badi uyuyuya be alika liline
himimiyami-ma ginakivemahalidi,
ada aseniwalova ana eda againe
moya'aida ginasiviviyeda.
Au hidedemi Sakalaiya natuna yana faisewa fa'ina gigaheye-vagahina. 80#Md 3:1-6Ada bana kwamana gilakalakata tu yana nuwanuwa againe gi'ase'asevatu, ada babigaga againe gimiyami ginunauwena tu yana iveyemu ana tova miIsileli yadi yo'o matadiya.
Currently Selected:
Luke 1: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.