Luke 2
2
Yesu gitubuga.
Madiu 1:18-25
1Tu Yoni kabi'one miLoma badi miYuda yadi fafaliya hivehivehimeya. Medema tovai-nadi Loma Tokaiwabu ana egana Sisa-Ogosito gimiyami. Bana givehimeya be fafali tulina tulina kalivadi adi egana hida'etoladi be higa yana yo'o adi kilagalaga ginahalamanena. 2Mena eganayaudi-nadi yaudi nagona ada bana Kwiliniyo Siliya ana fafali againe givehivehimeya ana toveya gilakayemu. 3Au moya'aidi eganayaudi fa'ina sa'eyana sa'eyana taudiyao yadi melaleya hina.
4 #
Yo 7:42
Tu kadu Yosefa Galili melalina ana egana Nasaledi againe gitauya Devida yana melala Yudiya againe gihobudamana, melala ana egana Bedelihema, fa'ina bana Devida bwanenena yana yo'o kalivana. 5Bedelihema againe Meli buye hina eganayaudi fa'ina. Tu bana kwamayoku gisetago-mo'ena aimo keke buye hidamiyami tu givehifuga. 6Yuwadedei himiyami tu yana venatuna ana tova a giyemu. 7Au yana tomo'ainagona givenatunena, kaleko vaita fai amine medema againe hifafana au yomuyomu adi kwame againe hive'enobalina fa'ina wakawaka-manuwa gimaga-mo'a be yadi abaga keke.
Lobama ana tovenuwa'ata to'itave'avina sifi hiyemaunidi.
8Tu Bedelihema awa'awanine to'itave'avina sifi yadi sifi ubuleya himiyamiyatago-malalaugedi. 9Himiyami tu Yaubada yana tovenuwa'ata sa'eyana giyemaunidi ada Kaiwabu yana mahalina ve'akinamanamalina gituvemahali-'owodi yo himatautave'ine. 10Tu tovenuwa'ata gigahedi gigayo, “Keke wanamatauta, au wanogali! Valeya hagihagina agaimiya ga'aliyena be valeyai-nadi againe omi miIsileli ami yo'o vemwamwala lakahina wananuhagana. 11Adamo'uya-mo'a Devida yana melala againe Tokibababala omi fa'imiya gitubuga, Bana'e Yaubada yana Tovegida Keliso Kaiwabu. 12Yaku gahe au velemo'ena ma ana iya'iyaya hidede amine. Fwefweya kaleko vaita fai amine againe hifafana-ma wananuhagana, fwefweyai-nadi yomuyomu adi kwame againe gidadauda.”
13-14Gigahe-yo auhe'ama lobama ana tolugaviya adi yo'o lakahi-mo'ena bana tovenuwa'ata buye himiyami, Yaubada hidavadavana higayo,
“Yaubada getane-mo'ane kanakivekaiwabuna,
gava babiya kaliva gaveyao
Yaubada yana nuwakabubu hinuhagana,
medema agaidiya kukuya ginayemu.”
15Au hidede amine lobama ana tovenuwa'ata Yaubada hikwelidavadavani tu hinuyabuyabudi be lobameya hiyewadi. Hina-yo to'itave'avina sifi buye hive'agahegahe higayo, “Wa'ela be kanana Bedelihema againe kanahobu gaitoma ahe gilakayemu be Yaubada ide agaideya gigaheyena-ma kana'itana.”
16Au himaduna be hilele Meli Yosefa hinuhagadi kadu fwefweya buye'i, Bana yomuyomu adi kwame againe gidauda. 17-18Ada ahe hi'ita-yo au kwamana kahihina gavaimi tovenuwa'ata givenuwa'atadi medemi hi'awatalatalaina, ada gaveyao moya'aidi to'itave'avina sifi yadi gahe hinogalina, medema hiyaulowoga. 19Tu mena gaitomai-dina agaidiya Meli nuwadi ginunauyena be tova moya'aina hinuwanuwadadana. 20Badi to'itave'avina sifi ma hiyewadi Yaubada ana egana hikikilakahina, gaitoma moya'aidi ahe hinogalidi be hi'itadi fa'idiya hidavadavana. Yadi ita meda tovenuwa'ata yana gahe amine.
Yesu hiluwatuyena be manuwa-tafalolo againe hinauwena.
21Tu kwamana ana aiyeta eita givaidi-yo Yaubada yana iya'iyaya wowone hinatomogolohina ana toveya hivewagana Yesu, eganai-nadi aimo hinana keke hidavehifuga tu lobama ana tovenuwa'ata giyakahina.
22-24 #
1Veh 12:1-4; Yem 13:2,12,15; 1Veh 12:8 Tu tova giyemu be yadi yegayega fa'ina tafalolo sa'eyana hinafaisewana Mosese yana buki-vehimeya againe Yaubada givehimeyedi amine. Kadu Yaubada yana vehimeya sa'eyana tuwai-mo'ena Mosese gi'etoladina-ma amine hihuluva. Vehimeyai-nadi ma kaliva tomo'ainagona sa'eyana sa'eyana wanasevehailedi be Yaubada yana giba fa'ina. Au Yosefa be Meli kwamana Yelusalema againe hinauwena be Yaubada matane hinasena. Kadu abaveyao yadi yegayega fa'ina hinauwena, Yaubada buki-vehimeya againe gisena-ma amine, higa bunebune luhei o ka'i bututula kabi'odiyao luhei.
25Tu kaliva sa'eyana Yelusalema againe gimiyami ana egana Simiyoni. Bana kaliva yegayegana Yaubada gimatamatausena kadu Yaubada yana Tovegida miIsileli ginakibababaledi-ma yana yemu fa'ina gilulauboda. Ada Alu'aluwa Mahalina bana againe gimiyami. 26Ada boi Alu'aluwa Mahalina bana againe gihawavemogatala higa vaita keke ginamadu'alika tu nagona Yaubada yana Tovegida Keliso gina'itana. Gina'itani-yo gina'alika. 27-28Au kwamana hi'aliyena-ma tovai-nadi Alu'aluwa Mahalina Simiyoni gigahena be manuwa-tafalolo againe giluku. Yosefa Meli kwamana Yesu hi'aliyena be hinahuluvina buki-vehimeya gigahe amine ma Simiyoni kwamana gifewana be Yaubada gidavadavana. 29Yana kwelidavadava hidede amine.
Kaiwabu-yo, adamoya iya ya tofaisewa
yaku wanuwayamumu unavega'auleku.
30 #
Ais 52:10
Fa'ina Tokibababala O uvegidena-ma
tauku matakuya ahe ga'itana.
31Kibababalai-nadi ana eda ukidewedewena
yo'o tulina tulina matadiya
32 #
Ais 49:6; Yo 8:12 Bana'e yo'o tulidiyao yadi mahalina,
kadu Bana fa'ine ya yo'o miIsileli
kaiwabu lakahina ananuhagana.
Au hidedemi Simiyoni yana kwelidavadava.
33Tu kwamana tamana hinana Simiyoni yana gahe Yesu fa'ine hiyaulowogena. 34-35#Ais 8:14; 1Ko 1:23; 1Fi 2:6-8Au Simiyoni give'o'oledi be Yaubada ginanuwakabubuyedi tu hinana Meli gigahedi gigayo, “Wa'ita, hida kwamana Yaubada givegidena be miIsileli tufoidi moya'aidi hinavenikohiyena-ma adi agolaufofola hinanuhagana tu tufoidi moya'aidi Bana againe hinahawahegedi-ma adi kibababala hinanuhagana. Kadu Yaubada Bana ginasena iya'iyaya fa'ina, higa kaliva tufoidi moya'aidi hinahawavekoyoyeni-yo yadi nuwahinage kabu'avane ginayemu. Ada kadu omi ase'asemi gina'u'aulolo vaita giyo gida'onani.”
Bana Ana Yesu fa'ine gi'awatalatalaina.
36-37 #
1Ti 5:5
Kadu'e kwamayoku sa'eyana gimiyami ana egana Ana, Fanuweli natuna Aseli yana yo'o kwamayokuna, ada bana Yaubada bonana ana to'awatalatalaina. Ulaulatanine ginagi ada malamala seveni moganena buye himiyami tu gisikwa-yo anakaibe gimiyami ma ana malamala eiti-fowa (84) givaidi. Ada au givekauve'a-mo'a. Tu tova moya'aina gitafatafalolo manuwa-tafalolo keke ma'i gidahegehegeni, uyadayada be bogi Yaubada gihawadavadavana gilabelabewaviyo tu give'ove'o'ola. 38Ada Meli Yosefa manuwa-tafalolo againe kwamana Yaubada matane hisena ma bai-nadi againe Ana giyemu, lilidiya gimidi be Yaubada givesiuleyena, kadu miYelusalema agaidiya kwamana fa'ine gigahegahe gigayo, “Hida kwamana ada Tokibababala, Bana'e fa'ine kalulauboda amanadi.”
39 #
Md 2:23
Tu Yosefa Meli gavadi moya'aina gilubodadi be hidafaisewani Yaubada yana vehimeya gigahe amine, medema hiluyabuni-yo Galili ana fafaliya hiyewadi be taudiyao yadi melala Nasaledi againe hilakayemu. 40Ada kwamana gilakalakata tu nuwane gififaiwala kadu nuwana gi'ayauyauga-mo'a. E, Yaubada yana nuwadogeya gimiyami.
Kwamana Yesu tovehawala buye manuwa-tafalolo
againe hive'agahegahe.
41 #
Yem 12:1-14,24-27 Tu malamala sa'eyana sa'eyana hinana be tamana Yelusalema againe hinauna tafalolo ana egana lobama ana tovenuwa'ata yana Abamaduviviya ana tova againe. 42Bana Yesu ana malamala tuwelo givaidi againe badi buye hina tafalolo againe yadi dewa amine. 43Ada tafalolo ahe gihavaini-yo hinana tamana hiyewadi tu kwamana Yesu Yelusalema againe gimiya, keke hidahalamaneni. 44Tu badi hivaitana yo'o hinagediya buye hidanauna fa'ina, aiyeta sa'eyana hinauna tu tobohiyadiyao kadu yadi yo'o agaidiya hivebutu hilelena. 45Ada hi'i'avani-yo hiyewadi Yelusalema againe hilelena. 46Hilelele tu aiyeta anaveto againe manuwa-tafalolo hinagene hinuhagana, tovehawala hinafadiya givetogani tu badi givanevanenegedi kadu gitotoliluveluvedi. 47Au moya'aidi yana nuwahuya yana bonalaufata hinogalini-yo ase'asedi gi'alilihiwana. 48Tu hinana tamana hi'itana againe hiyaulowoga. Badi hinana higahena higayo, “Natuku, gavadi-yo hidedemi uhuluvima? Tama be ima'e yama wanuwavita o alelele.”
49Bana gigahedi gigayo, “Gavadi-yo waleleleku? Vaita omi wadahalamaneni gilubodaku be Kamaku yana manuweya gadamiyami.” 50Tu yana gahe hilukayokayoyena.
51Au Bana badi buye hina Nasaledi againe hiyewadi, ada buye himiyami tu bonadi gi'abi'abina. Badi hinana ma gaitomai-dina moya'aina agaidiya nuwadi ginunauyena. 52Tu Yesu yana wanuwahuya gilakata ada Bana againe Yaubada be kaliva nuwadi giyamumu.
Currently Selected:
Luke 2: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.