Luke 3
3
Yoni tobafitaiso yana laumamala.
Madiu 3:1-10; Maki 1:1-6; Yoni 1:19-23
1-2Loma Tokaiwabu ana egana Sisa-Taibiliyo malamala fifitini givehivehimeya tu Yaubada bonana Yoni Sakalaiya natuna againe gilakayemu, bana babigaga againe gimiyami-tu. Medema tovai-nadi Fonitiyo-Failato Yudiya ana fafali givehivehimeyena, bana Helodi Galili ana fafali givehivehimeyena ada tobohiyana Filifi Ituliya be Tilakonaidi adi fafali givehivehimeyedi, kadu bana Laisaniya Abilene ana fafali givehivehimeyena. Au hidedemi tovehimeya adi loi, tu tovai-nadi againe Anasi be Kaiyafasi abaveyao ana tofaisewa adi tokaiwabu. 3#Af 13:24, 19:4Au Yaubada Yoni againe gigahe-yo Yoni gufa ana egana Yolidani awa'awanina moya'aina agaidiya ginunudadana tu gilulumamala gigayo, “Yami dewa koyona wanavenikohiyena be wanabafitaiso. Wananuwavilana be Yaubada yami koyona ginayawelina.” 4#Ais 40:3-5Boi tuwai-mo'ena Yaubada bonana ana to'awatalatalaina ana egana Aiseya yana buki againe gi'etoladina amine, meda Yoni gihuluva. Aiseya gigayo,
Kaliva agona hinogalina wala'aiya gikovakovadadana
gigayo, Kaiwabu yana eda wanavetauna
yana eda ase'asemiya wanakidewedewena.
5Nu'awa'awahagana wanavetauna,
oya lakahidi kabi'odi wanayalamoidi,
eda nubalabaladi wanakivetuvetunudi,
kadu eda dabodabodi wanalu'ukeukedi.
6Wana'ihagihagi be kaliva moya'aidi
Yaubada yana kibababala hina'itana.
Au hidedemi Aiseya yana gahe.
7Tu Yoni kaliva moya'aidi bana againe hiyo'oyo'o be ginakivebafitaisoyedi-ma agaidiya gigahe gigayo, “Omi vaita oloto koyona ana egana vaiba natuneyao amine. Hakwadi givenuwa'atami-yo, vaita Yaubada yana ila'a omi agaimiya wada'oseni? Keke amifaiweya Yaubada wana'oseni. 8#Af 26:20; Yo 8:39Omi wagahe vaita yami koyona wadahegeni-yo wadahagavilami. Au dewa yamumuna wanafaisewani-yo yami hagavila au velemo'ena ma anahalamanena. Kadu keke wanavebutu taumiyao agaimiya wanagahe wanagayo, Ide Abelahamo bwaneneneyao fa'ina kadu ide Yaubada natuneyao. Au gagahemi Yaubada anafaiweya ginakilowemi tu hida kabala agaidiya kaliva ginabubudi be Abelahamo ana yo'oya ginasedi. 9#Md 7:15-20Kadu'e adamoya tamuyoko ahe hiyadalina be ai hinalu'inubadi, ada ai sa'eyana sa'eyana guwadi keke yamumuna ma hinataladi be ai'ala'alata againe hinahegedi. Ai-dina amine omi'iyao.”
10Au hidedemi Yoni gigahegahe tu yo'oyo'o higahena higayo, “Au gavadi anagani?”
11Bana gigayo, “Hai kaliva ana aikeva luhei, medema gilubodana be kaliva ana aikeva keke ma gidavelena. Meda anafaiweya a'a gidafolakena.”
12 #
Lu 7:29
Kadu takesi ana toyaudi hi'ela be hinabafitaiso ada higahena higayo, “Tovehawala, ime gavadi anagani?”
13Yoni gigahedi gigayo, “Takesi ana manigaga wanayaudi, keke taumiyao fa'imiya wanavai-kawowoni.”
14Tu kadu tolugaviya tufoidi hitoliluveluvena higayo, “Kadu ime gavadi anagani?” Bana gigayo. “Keke kaliva yadi lokoloko wanalemadi kadu keke kaliva wanakiholiholidi. Fatami fa'ina wanavenuwakibokibo.” Au hidedemi Yoni gigahedi.
Yoni Tobafitaiso Yesu inubana fa'ina givenuwa'ata.
Madiu 3:11-12; Maki 1:7-8; Yoni 1:24-34
15 #
Yo 3:28; Af 1:5, 13:25 Tu kaliva moya'aidi Yaubada yana Tovegida Keliso yana yemu fa'ina hilulauboda, ada hivebutu Yoni fa'ine nuwahinagediya hinuwanuwa vaita ka'i bana Keliso-mo'ena o ka'i keke. 16Yoni yadi nuwahinage gibonalaufata gigayo, “Iya'eku ma gufa againe gakivebafitaisoyemi tu kaliva sa'eyana gifaiwalahegeku-ma gi'ela'ela. Bana kikaiwabu-mo'ena tu iya kwamana kabisoku fa'ina keke akufaiweya Bana againe ganave'agetoga-yo ana ageyafayafa adi aba'aiyauga ganayauni. Bana'e ma Alu'aluwa Mahalina againe tufoimi ginakivebafitaisoyemi be ginavemagami, tu tufoimi ai'ala'alata againe ginakivebafitaisoyemi mema higa vaita ginavematahiwadiyemi. 17E, aimo gina'ela ada yana abasaibutu ana gi'e lakahina gina'abina be witi ana abavagakolukolu againe ginasibutuna. A'a-mo'ena yana kweda againe gina'ive'ave'ahina tu yogona ai gi'alata-vagata ma againe ginaluve'alahina.” 18Au hidedemi Yoni gilumamaledi kadu enohega tulina tulina amine Yaubada yana Venuwa'ata Yamumuna fa'ina gilu'ageyedi.
19 #
Md 14:3-4; Mk 6:17-18 Tu Yoni tovehimeya Helodi gidakeyena. Bana Helodi tobohiyana vavinena adi egana Helodiyasi giluhabuyedi fa'ina gidakeyena, kadu yana dewa koyona moya'aina fa'ina gidakedakeyena. 20Helodi koyona moya'aina gifaisewadi tu koyona sa'eyana buye give'atutamo'aina higa Yoni deliya gisena.
Yoni Yesu gikivebafitaisoyena.
Madiu 3:13-17; Maki 1:9-11
21-22 #
Yo 1:32-34; Lu 9:35 Tu Yoni aimo keke deliya gidaluku tu kaliva moya'aidi gikikivebafitaisoyedi ana toveya, kadu Yesu gikivebafitaisoyena. Yesu gibafitaiso gihavaina give'ove'o'ola tu lobama gi'ayavalina be Alu'aluwa Mahalina ana ita vaita bunebune amine Bana againe gihobu'ela. Au ago'ago lobameya gikova gigayo, “O'eni Natu'ase'aseku. Nuwaku ukiveyamumu-mo'ena.” Au hidedemi Yaubada gigahe.
Yesu bwaneneneyao fa'idiya.
Madiu 1:1-17
23Tu Yesu tauna ma ana malamala teti givaidi-yo yana faisewa givebutuna. Kaliva hivaitana Yesu tamana Yosefa tu Yosefa tamana Heli,
24Heli tamana Matata, Matata tamana Livai,
Livai tamana Meliki, Meliki tamana Yanai,
Yanai tamana Yosefa, 25Yosefa tamana Matatiya,
Matatiya tamana Emosi, Emosi tamana Nahumi,
Nahumi tamana Esilai, Esilai tamana Nagai,
26Nagai tamana Madi, Madi tamana Matatiya,
Matatiya tamana Semeini, Semeini tamana Yoseki,
Yoseki tamana Yoda, 27Yoda tamana Yowanani,
Yowanani tamana Lesa, Lesa tamana Selubabela,
Selubabela tamana Saladiyeli, Saladiyeli tamana Neli,
28Neli tamana Meliki, Meliki tamana Adi,
Adi tamana Kosami, Kosami tamana Elimadamu,
Elimadamu tamana Eli, 29Eli tamana Yosuwa,
Yosuwa tamana Eliyesa, Eliyesa tamana Yolima,
Yolima tamana Matata, Matata tamana Livai,
30Livai tamana Simiyoni, Simiyoni tamana Yuda,
Yuda tamana Yosefa, Yosefa tamana Yonama,
Yonama tamana Elayakimu, 31Elayakimu tamana Meleya,
Meleya tamana Mena, Mena tamana Matata,
Matata tamana Nadani, Nadani tamana Devida,
32Devida tamana Yese, Yese tamana Obedi,
Obedi tamana Bowasi, Bowasi tamana Salamoni,
Salamoni tamana Nasoni, 33Nasoni tamana Aminadabu,
Aminadabu tamana Adimina, Adimina tamana Ani,
Ani tamana Hesiloni, Hesiloni tamana Felesi,
Felesi tamana Yuda, 34Yuda tamana Yakobu,
Yakobu tamana Aisake, Aisake tamana Abelahamo,
Abelahamo tamana Tela, Tela tamana Naho,
35Naho tamana Seluke, Seluke tamana Leu,
Leu tamana Feleke, Feleke tamana Iba,
Iba tamana Sila, 36Sila tamana Kenani,
Kenani tamana Afakesedi, Afakesedi tamana Semi,
Semi tamana Nowa, Nowa tamana Lemeki,
37Lemeki tamana Metusela, Metusela tamana Inoki,
Inoki tamana Yaledi, Yaledi tamana Mahalalila,
Mahalalila tamana Kenani, 38Kenani tamana Inosi,
Inosi tamana Seti, Seti tamana Adama,
Adama tamana Yaubada.
Currently Selected:
Luke 3: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
