Luke 4
4
Setani Yesu gi'aladibidibiyena.
Madiu 4:1-11; Maki 1:12-13
1-2Tu Yesu Yolidani againe gibafitaiso gihavaina, Alu'aluwa Mahalina ahe giluvaiye-mo'eni yo givehimeyena be babigaga againe gina aiyeta foti agaidiya gimiyamiyanana tu Setani gi'ala'aladibidibiyena. Ada aiyetai-dina agaidiya keke tamo a'a gida'u'ani fa'ina mafu gilauna.
3Au Setani gi'ela gigahena gigayo, “Ka'i velemo'ena O'eni Yaubada Natuna, hida kabala unavehimeyena be ginave'a'a.”
4 #
2Veh 8:3
Tu Yesu gigayo, “Yaubada bonana eto'etoladina gigahe gigayo,
Keke a'a-mo'a gagana againe kaliva yawaimi wanavivaini.”
5-6 #
Yo 12:31, 14:30 Kadu'e Setani gi'ela Yesu oyeya gilakavena, babi ana abavehimeya tulina tulina givehawalena ada auhe'ama Yesu gi'ita'auhi-'owodi kadu gigahena gigayo, “Hida abavehimeya moya'aina adi kikaiwabu buye O ganavele. Abavehimeyai-dina adi wakikaiwabu iya nimakuya hdadauda, ada hakwadi nuwanuwaku ganavelena, au ganavelena. 7Ka'i O'eni agaikuya unadavadava, abavehimeyai-dina matatabudi ganavele.”
8 #
2Veh 6:13
Yesu gibonalaufata gigayo, “Yaubada bonana eto'etoladina gigahe gigayo,
Yaubada yami Kaiwabu againe wana'odu'odu,
Bana anakaibe wanahawadavadavana.”
9-11 #
Sam 91:11-12
Kadu'e Setani gi'ela Yelusalema againe ginauwena be manuwa-tafalolo ana udu'uduya gilakavena gigahena gigayo, “Ka'i O'eni velemo'ena Yaubada Natuna, au hidedei tu babiya una'auhifu, fa'ina Yaubada bonana eto'etoladina gigahe gigayo,
Iya Yaubada yaku tovenuwa'ata ganavehimeyedi
be hina'itave'avi, ada nimadiya
o hinakamohi be age keke kuga ginatalani.”
Au hidedemi Yaubada yana gahe sa'eyana Setani giyakahina.
12 #
2Veh 6:16; 1Ko 10:9 Yesu gibonalaufata gigayo, “Yaubada bonana eto'etoladina hidedemi gigahe gigayo,
Ka'i o tauni vita againe unavetalaiye digo,
keke Yaubada ya Kaiwabu yana leme ana
ve'o'ola againe unagaluvaluvani.”
Au hidedemi Yesu gigahe.
13 #
Hi 2:18, 4:15 Ada au Setani aladibidibi tulina tulina agaidiya Yesu gigaluvaluvana gihavaina, ginuyabuyabuna be kadu aimo mali aituheya.
Yesu yana faisewa givebutuna.
Madiu 4:12-17,23-24; Maki 1:14-15,39
14Tu Alu'aluwa Mahalina yana faiwala Yesu againe gimiyami tu Galili ana fafaliya kadu giyewana, ada medema awa'awanina moya'aina agaidiya ana valeya give'aliyahega. 15Yadi manuwa-abavehawala adi egana sinagogi agaidiya givehavehawala, ada moya'aidi hidavadavana.
MiNasaledi Yesu hikilowena.
Madiu 13:53-58; Maki 6:1-6
16Tu Nasaledi againe Yesu giyemu, medema melalai-nadi againe gilakata. Ada sabati againe manuwa-abavehawala againe giluku yana dewa amine. Au gitowamidi be Yaubada bonana ginahawana. 17Ada kaliva sa'eyana buki tuwai-mo'ena Aiseya gi'etoladina-ma givelena. Yesu buki givaina digo giluyagilina ada yana maita ginuhagana be gihawana-ma hidedemi gigahe.
18 #
Ais 61:1-2
Kaiwabu Alu'aluwana agaikuya gimimiyami,
givegideku be koyokoyo agaidiya
valeya yamumuna ganalumamalena.
Hida venuwa'ata fa'ina gi'iveniniseku,
yogoyogonidiyao adi aiyauga hinavaina
tomatakoyo hina'ita-havagi.
Kadu gi'iveniniseku be
tonuwavita nuwadi ganakiveyamumuna.
19Givegideku be kaliva ganavenuwa'atadi
Yaubada yana nuwadoga ana tova a giyemu.
Au hidedemi Aiseya yana gahe Yesu gihawana.
20Tu Yesu gihawa gihavaina, buki gi'uwana digo toleme giveleyeweni tu gihiyoto. Ada moya'aidi manuwa-abavehawala againe himiyami-ma hi'itakwanekwanena. 21Au Yesu givebutu gigahedi gigayo, “Adamoya mena Yaubada yana gahe wanogalina-ma gilakayemu velemo'ena.”
22Ada kaliva moya'aidi hihawaveyamumuyena ada gahe nuwa'abi'abina amine gilukahihi fa'ina nuwadi givegafo'uya'uya higayo, “Bana hidevama Yosefa natuna tu yana gahe ana nogala vaita kaliva sa'eyana.”
23Yesu gigahedi gigayo, “Gavaita yada gahegahe sa'eyana agaikuya wanayakahina. Hidedemi wanagayo, O doketa fa'ina tauni unasiveyawa. Kafeneumi againe aituha fifiwalana ufaisewana be valeyana anogalina amine, meda hidei tauni ya melala againe unafaisewana.
24Au hidedemi omi wanagaheku tu iya gagahemi velemo'ena, ka'i falofita Yaubada bonana tauna yana yo'o agaidiya gina'awatalatalainena, keke hinavenogaleni. Meda omi yaku yo'o wanahuluviku. 25-26#1Kin 17:1-24, 18:1Wanogali! Omi wahalamanena tuwai-mo'ena Elaiya yana toveya keke ma'ita wehi gidalugaga ginunauwena malamala tohiye kadu hafuna, ada melala moya'aina agaidiya loka lakahina gilakayemu. Medema tovai-nadi sikwa moya'aidi Isileli ana fafaliya himiyami tu Elaiya yana yo'o miIsileli hikilowena fa'ina, Yaubada keke badi yadi sikwa agaidiya Elaiya gida'iveniniseni be ginavelugadi. Au vinemiSalefadi sikwasikwadi adikaibe agaidiya gi'iveninisena. Badi yadi melala keke Isileli ana fafaliya, au Saidoni ana fafaliya. 27#2Kin 5:1-14Meda anafaiweya tuwai-mo'ena Yaubada bonana ana to'awatalatalaina ana egana Elaisa yana toveya, tovedawodawowo moya'aidi Isileli ana fafaliya himiyami tu keke tamo badi agaidiya gidasiveyawani, au Neyamani anakaibe gisiveyawana ada bana keke kwanamiIsileli au kwanamiSiliya.” Au hidedemi Yesu miNasaledi gigahedi.
28Tu kaliva moya'aidi manuwa-abavehawala againe himiyami tu Yesu yana gahe miIsileli keke yadi wavetumagana ma fa'idiya hinogalini-yo hinuwakoyove'ine. 29Au hitowamidi Yesu hiwavina be melala gihegena. Yadi melala oya fafaline hive'alahina fa'ina kabune hinauwena higa sefa againe hidatuwavelowona. 30Tu Yesu yo'oyo'o hinafadiya ginu-mo'a be gina.
Yesu kaliva wayafunena gikiveyamumuna.
Maki 1:21-28
31Yesu gina tu Kafeneumi Galili ana fafali againe gihobu'ela, ada sabati againe givebutu kaliva givehawaledi. 32Ada yo'o yana vehawala fa'ina hiyaulowoga, fa'ina yana gahe ase'ase'i'onagina vaita tovehimeya velemo'ena amine.
33-34 #
Md 8:28-29; Yo 6:69; Lu 8:28 Tu mena manuwa-abavehawala againe kaliva sa'eyana wayafunena gimiyami. Yafune koyona giluvaiyeni-yo gikova'awafatafata gigayo, “Ha! Yesu kwanaNasaledi gavadi ime agaimeya unagani-yo u'ela? Ka'i O u'ela be ime yafune ama loi unamunuma-yo anabwavi? O ya inuba gahalamanena. O'eni Yaubada yana Kaliva Mahamahalina.”
35Yesu yafune gihawatana gigayo, “Gi'alove. Una kaliva unuyabuyabuni.” Yesu gigahe-yo yafune yo'o hinafadiya kaliva gibaina be ginuyabuyabuna tu kaliva keke tamo vita gidanuhagani.
36Kaliva moya'aidi hi'ita-yo hiyaulowoga-mo'a buye hive'agahegahe higayo, “Hima hida gava gahe yo yana wafaiwala kadu yana wa'abavehimeya yafune givehimeyedi be kaliva hinunuyabuyabudi?” 37Ada Yesu valeyana melala moya'aina Kafeneumi awa'awanine give'aliyahega.
Yesu to'aulolo moya'aidi gisiveyawadi.
Madiu 8:14-17; Maki 1:29-34
38Tu Yesu gimidi manuwa-abavehawala againe gihobu tu Saimoni yana manuweya giluku. Tu Saimoni lawana hi'aulolo lakahina wowodi vaita ai, ada badi fa'idiya Yesu hive'o'olena be ginavelugadi. 39Au Yesu gina gi'odutagodi au wowodi ana lukalalava gihawatana be gituluna. Ada auhe'ama himidi be hivebutu adi wakawaka adiga hikidewedewena.
40Kauwana giholuholu tu gaveyao moya'aidi agaidiya to'aulolo yadi aulolo tulina tulina himiyami, medema Yesu againe hi'aliyedi ada nimana badi agaidiya gisena be moya'aidi gisiveyawa-'owodi. 41#Md 8:29; Mk 3:11-12Kadu yafune kaliva tufoidi moya'aidi hiluvaiyedi-ma hinulovelovedi hikova higayo, “O'eni Yaubada Natuna.” Tu Yesu gihawatadi be keke hinagahe, fa'ina Bana Yaubada yana Tovegida ma hihalamanena.
Yesu Yudiya melalidi agaidiya gilulumamala.
Maki 1:35-39
42-43Hida mala gilauna Yesu gilowoga be gina melalagaga againe be anakaibe ginamiyami fa'ina. Tu yo'o hivemulitawaina be Bana againe hi'ela vaita hinasiveyewana tu gigahedi gigayo, “Gilubodaku be Yaubada yana abavehimeya ana Venuwa'ata Yamumuna kadu mali melala agaidiya gadalumamalena. Hidema ana inuba fa'ina Yaubada givegideku be gahobu'ela.” 44Ada au manuwa-abavehawala ana egana sinagogi Yudiya melalidi agaidiya gilulumamala.
Currently Selected:
Luke 4: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.