Luke 5
5
Yesu tobayauma gikovadi be hinamuliyena.
Madiu 4:18-22; Maki 1:16-20
1Tova sa'eyana Yesu tobu ana taliyeya gimidi gilulumamala tu yo'oyo'o hiveve'atuwahega be Bana liline hinayemu Yaubada bonana hinanogalina. Mena tobu ma ana egana Genesaleda yo Galili. 2Ada waka luhei avaleya hibilakahidi-ma gi'itadi. Tobayauma ahe hihobu yadi alevatu hi'ikolakola. 3Au waka sa'eyana Saimoni yana waka medema againe giyage, ada give'o'olena be ma'i ginatalalaka. Au wakeya gihiyoto yo'o givehawaledi.
4 #
Yo 21:2-6
Givehawaledi gihavaina Saimoni againe gigahe gigayo, “Ni'uya wanatalalaka be yami alevatu wanasehobuyena igana wanave'onadi.”
5Tu Saimoni gigayo, “Kauveya, bogi againe anaudadana-wayoga mala gilauna keke tamo igana adave'onadi. Tu O ya vehimeya againe kadu alevatu ganasehobuyena.”
6Saimoni tobohiyana buye alevatu hidasehobuyena ma igana keke sa'eyadi hiyo'oyo'o ada moya'ai-mo'edi hive'onadi, iganeya yadi alevatu hivekaninina. 7Au tobohiyadiyao waka velugana againe hiluwahiyedi be hina'ela hinavelugadi. Hi'ela tu waka luhei iganeya hivemagadi ada yadi waka kabisona hidaboluna.
8Tu Saimoni-Fita gi'itana againe tugana give'etodonena Yesu againe gi'ibo'ula gigayo, “Ho Kaiwabu, yaku dewa koyona fa'ina unanuyabuyabuku.” 9Hidedemi gigahe fa'ina igana moya'ai-mo'edi hive'onadi againe ase'asena gi'alilihiwana kadu tobohiyaneyao buye'i. 10Meda anafaiweya Yemesa Yoni, Sebedi natuneyao, ase'asedi gi'alilihiwana Saimoni ahenao buye bayaumeya hififaisewa amanadi. Tu Yesu Saimoni gigahena gigayo, “Keke unamatauta. Tova adamoya be tova gi'ela'ela againe keke igana tu kaliva unave'onadi be hinamuliyeku.” 11Ada yadi waka avaleya hibilakahidi au gaitoma moya'aidi hidibutoyogedi be Yesu againe hivetomuliya.
Yesu tovedawodawowo gikiveyamumuna.
Madiu 8:1-4; Maki 1:40-45
12Tova sa'eyana Yesu melala sa'eyana againe gimiyami tu tovedawodawowo-mo'a Bana againe gi'ela. Kaliva Yesu gi'ita-yo gi'ibo'ula-mo'a be gihawayafeyafena gigayo, “Kauveya, ka'i O nuwanuwa amine o afaiweya yaku aulolo unakolana.”
13Gigahe-yo Yesu nimana gitunena be gikibwa'ena ada gigahena gigayo, “Ika, Iya nuwanuwaku. Unayamumu.” Ada auhe'ama ana dawodawowo gihavaina.
14 #
1Veh 14:1-4; Lu 17:12-14 Au Yesu givehimeyena higa keke tamo hakwadi againe ginahawavemogatala. Gigayo, “Abaveyao ana tofaisewa againe unamaduna be wowo unavehawalena. Boi tuwai-mo'ena Mosese givehimeya amine, manuga luhei kadu sifi higa abaveyao fa'ina unanauwedi be moya'aidi hina'ita-yo o ahe uyamumu velemo'ena ma hinahalamanena.”
15Tu Yesu valeyana give'aliyahega-mo'a ada yo'oyo'o hivagavaga'auta be bonana hinanogalina kadu yadi aulolo againe hinabwaina. 16#Mk 1:35Atu Yesu yo'o ginunuyabuyabudi be ginauna melalagaga agaidiya give'ove'o'ola.
Yesu tovefela gisiveyawana.
Madiu 9:1-8; Maki 2:1-12
17Tova sa'eyana Yesu givehavehawala tu badi tonagona tafatafalolodiyao adi egana Falisi kadu Mosese yana vehimeya ana tovehawala Bana liline hihiyoto, badi Galili be Yudiya melalidi moya'aina agaidiya kadu Yelusalema againe hitauya be hi'ela amanadi. Ada Yaubada yana faiwala kaliva adi siveyawa fa'ina Yesu againe gimiyami. 18Mededei kaliva sa'eyana walogina gi'a'uwana-ma gimiyami. Ada kaliva tufoidi bana kaliva ana iviya gidauda-ma hiwahina be higa hinalukuwena Yesu matane. 19Tu yo'o lakahina fa'ina hilukuwe-wayoge keke adifaiweya. Au manuwa getane hilakavena be manuwa getana hikakina, ada tovefela wa'ivina kaliva hinafadiya hisehobuyena Yesu matane.
20 #
Md 8:13
Yesu kaliva ana to'aliya yadi vetumagana gi'ita-yo tovefela gigahena gigayo, “Kusebo, ya koyona ahe gayawelidi.”
21Tu vehimeya ana tovehawala be Falisi hivebutu nuwahinagediya higahegahe higayo, “Ha! Hida kaliva gigahe vaita Bana koyona adi to'aiyawela. Bana vaita hakwadi-yo Yaubada gihawatagoni, fa'ina Yaubada anakaibe koyona adi to'aiyawela?”
22Hidede amine nuwahinagediya hitoliluvaluva tu Yesu yadi nuwanuwa gi'ayauneni-yo gigahedi gigayo, “Gavadi-yo ase'asemiya watoliluvaluva? 23Gavaimi tovefela againe ganagahe-yo ginalakayemu? Ka'i ganagayo, Ya koyona ahe gayawelidi, o ka'i ganagayo, Umidi be unaudadana. Hadema vehimeya vita-mo'ena? Me kaliva ana siveyawa vaita vita-mo'ena, fa'ina ka'i ganavehimeya tu keke ginayamumu, au taumiyao amifaiweya wana'itahalamanena kaliva adi siveyawa keke akufaiweya. 24Tu hida kaliva ganasiveyawana be wana'itani-yo Iya fa'ikuya wanagahe wanagayo, Velemodi. Bana Tohobu'ela kaliva yadi koyona adi aiyawela ana tagalowalowa.” Ada au tovefela againe gigahe gigayo, “Againiya gagahe. Umidi, a ivi uwahi be una ya manuweya.”
25Auhe'ama tovefela moya'aidi matadiya gimidi, ivi gidudauvena-ma gi'uwana ada giwahina be gina yana manuweya. Ginauna tu Yaubada ana egana gikikilakahina. 26Au moya'aidi hi'ita-yo ase'asedi gi'alilihiwana be Yaubada ana egana hikilakahina kadu himatautave'ine higayo, “Keke kanawona! Adamoya iya'iyaya ka'itayauyogena.”
Yesu Livai gikovana be Bana againe ginavetomuliya.
Madiu 9:9-13; Maki 2:13-17
27Muliya Yesu gilowoga ginauna tu takesi ana toyaudi sa'eyana gi'itana, ana egana Livai. Bana takesi ana abayaudi againe gihiyoto. Ada gigahena gigayo, “Unamuliyeku.” 28Au gitowamidi gaitoma moya'aidi gidibutoyogedi tu Yesu againe givetomuliya.
29Tu muliya bana Livai yana manuweya avemwamwala lakahina Yesu fa'ine gisena, ada takesi ana toyaudi adi yo'o lakahina kadu mali kaliva badi buye hi'enolukekela be hi'au'a. 30Tu Falisi be vehimeya ana tovehawala badi Falisi ahenao ma Yesu ana tomuliya agaidiya hi'alawoluwolu higayo, “Gavai'ona-yo wama takesi ana toyaudi be tokoyona velugadiyao buye wa'a'au'a?”
31Ada Yesu yadi gahe ginogalini-yo gigahedi gigayo, “Badi yadi aulolo keke ma keke doketa againe hinana, tu to'aulolo ma nuwanuwadi doketa yana leme. 32Ada toyamumu keke doketa yana leme hinaleleni amine, meda anafaiweya Iya gahobu'ela be keke toyamumu vehimeya hi'ita'itave'avina-ma ganakovadi. Au gahobu'ela tokoyona ganakovadi be yaku leme againe hinahagaviladi fa'ina.”
Labewaviyo fa'ina Yesu hitoliluveluvena.
Madiu 9:14-15; Maki 2:18-20
33Tu Falisi Yesu higahena higayo, “Tova moya'aina Yoni ana tomuliya hilabelabewaviyo tu hive'ove'o'ola kadu meda ime Falisi ama tomuliya hihuluhuluva, tu a tomuliya ma tova moya'aina a'a hi'au'a bwai hiyuyu.”
34Yesu gigayo, “Tonagi aimo ana yo'o buye hinamiyami ana toveya, keke amifaiweya ana yo'o kalivadi wanavehimeyedi vaita nagi ana avemwamwala againe hinamiya-kawowo be a'a keke hina'ani. 35Tu aimo tonagi hinanauwena lauveya ana toveya, au medema tovai-nadi ana yo'o hinamiya-kawowo, a'a keke hina'ani. Meda anafaiweya Iya yaku kaliva buye amimiyami fa'ina keke hidalabelabewaviyo.” Au hidedemi Yesu gigahedi.
Dewa tuwaina kadu dewa ivaguna keke gidalubodada be
kanave'atutamo'aini.
Madiu 9:16-17; Maki 2:21-22
36Kadu'e Yesu gahetalahobuhobu sa'eyana badi agaidiya gilukahihiyena gigayo, “Ka'i kaliva nuwanuwana aikeva gikoyo-ma ginabwadina digo, keke kaleko ivaguna againe kasimina ginasikaninini bwadi fa'ina. Ka'i hidede amine gidahuluva, au kaleko ivaguna gisikaninina-ma gidakivekoyona, kadu bwadi kaleko ivaguna keke aikeva tuwaina gidalubodani fa'ina ana ita tulina. 37Kadu keke tamo hakwadi oine ivaguna manugose kwafilidi tuwaina againe ginahiwani. Ka'i hidede amine gidahiwana digo, oine ivaguna gidatubuga be kwafilidi tuwaina ahe gikwakwana-ma gida'afolena ada au oine babiya gidamadu-'owoga kadu kwafilidi gidakoyo. 38Au gilubodana be oine ivaguna kwafilidi ivaguna agaidiya hidahiwana. 39Kadu keke tamo hakwadi oine tuwaina hinayuni-yo muliya nuwanuwana oine ivaguna ginayuni. Au ginagahe ginagayo, Oine tuwaina anayu hagihagi-mo'ena.” Au hidedemi Yesu kaliva yadi dewa tuwaina nuwadi gi'abina-ma gigahetalahobuhobuyedi.
Currently Selected:
Luke 5: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.