Luke 6
6
Sabati ana vehimeya fa'ina.
Madiu 12:1-8; Maki 2:23-28
1 #
2Veh 23:25
Tu sabati sa'eyana againe Yesu ana tomuliya buye witi ana faheya hinunudadana tu ana tomuliya hivebutu witi nafona hikikikolukolu be himutumutuvemavemauna tu hi'au'a. 2#Yem 20:10Tu badi tonagona tafatafalolodiyao adi egana Falisi hi'itadi-yo higayo, “Gavadiyo sabati ana vehimeya keke wada'itave'avini?”
3-4 #
1Sam 21:3-6
Yesu gigahedi gigayo, “Ada tokaiwabu Devida tuwai-mo'ena gimiyami-ma kahihina ma'i wahawahawana o ka'i keke? Tova sa'eyana bana'e tobohiyaneyao buye mafu gilaudi tu Yaubada yana manuweya giluku a'a Yaubada matane hisena-ma givaina tu hawahawatana nonogana gi'ana kadu yana kalivamomo giveledi be hi'ana. Mena a'ai-nadi moya'aidi fa'idiya hawahawatana tu abaveyao ana tofaisewagaga adifaiweya hina'ana.” 5Au hidedemi gigahedi kadu gigayo, “Iya Tohobu'ela sabati ana to'itave'avina. Kaliva yadi dewa sabati againe Iya gavehivehimeyena.”
Yesu kaliva nimana koyona sabati againe gikiveyamumuna.
Madiu 12:9-14; Maki 3:1-6
6Kadu sabati sa'eyana againe manuwa-abavehawala againe giluku be givehavehawala, ada kaliva sa'eyana gimiyami nimana i'atagina gifwalele-vagata. 7#Lu 14:1-5Tu Mosese yana vehimeya ana tovehawala kadu badi Falisi nuwanuwadi gaitoma sa'eyana hinanuhagani-yo Yesu hinahawavekoyoyena fa'ina, hi'ita'ita-kwanekwanena be hina'itana ka'i nimakoyo sabati againe ginakiveyamumuna o ka'i keke. 8Tu Yesu yadi nuwanuwa gihalamaneni-yo au nimakoyo againe gigahe gigayo, “Umidi be u'ela we'ai.” Au gitowamidi be gina Yesu liline.
9 #
Yo 7:23
Ada Yesu gigahedi gigayo, “Ganatoliluvaluva agaimiya. Yada buki-vehimeya sabati fa'ina gavaimi givehimeyeda? Ka'i kaliva sabati againe kanakiveyamumuna o ka'i kanakivekoyona? Ka'i kanalugolegolena o ka'i kanaluve'alikana?”
10Ada moya'aidi gilumataviledi tu nimakoyo againe gigahe gigayo, “Nima utune.” Au nimana gitunena ada auhe'ama giyamumu. 11#Lu 11:53-54Tu vehimeya ana tovehawala be Falisi hinuwakoyove'ine, hivebutu hive'agahegahe vaita gavaimi hinaga-yo Yesu hinaluve'alikani.
Yesu ana tomuliya tuwelo givenuwadadanedi.
Madiu 10:1-4; Maki 3:13-19
12Himiyami tu Yesu gina gilaka oyeya be ginave'o'ola, ada Yaubada againe give'o'ola-malalau. 13Mala gilauna ana tomuliyamomo gikovadi be hi'ela ada kaliva tuwelo agaidiya givenuwadadana be givewagadi afositolo higa bonana ana towahidadana. 14-16#Yo 6:70-71Adi egana hidede amine. Saimoni tu Yesu givewagana Fita, taina Anidulu, Yemesa be Yoni, Filifi, Batolomiu, Madiu, Tomasi, Yemesa Alifiyo natuna, Saimoni bana hivewagana yo'o miLoma hivenibainedi-ma kalivana, Yudasi Yemesa natuna kadu Yudasi-Isikaliyota bana Yesu nibaineyao nimadiya gihawavemogatalena amanadi.
Yesu kaliva moya'aidi givelugadi.
Madiu 4:23-25
17Tu Yesu ana yo'o tuwelo givenuwadadanedi gihavaina, buye hihobu babi lulube'une himidi. Medede againe ana tomuliyamomo adi yo'o lakahina hivaga'auta kadu yo'oyo'o mali kaliva badi buye himiyami, Yelusalema be Yudiya melalidi moya'aina agaidiya hitauya kadu Taiya be Saidoni adi fafaliya taliyeya hitauya amanadi. Badi hi'ela be Yesu bonana hinanogalina kadu yadi aulolo againe ginasiveyawadi. 18Badi wayafunediyao fa'ina vita hinuhagana-ma kalivai-dina Yesu gikiveyamumudi. 19#Lu 8:46Ada moya'aidi higaluvaluva vaita hinakibwa'ena, fa'ina yadi kaibwa'e againe faiwala Yesu againe giyemu be medema againe adi siveyawa hivaina.
Tufoidi yadi wavemwamwala tufoidi yadi watagiya.
Madiu 5:1-12
20 #
Ais 66:2
Tu Yesu ana tomuliya gi'itadadanidi gigahedi gigayo,
“Omi gaveyao venuwahobu ana koyokoyo, yami vemwamwala gavatubuga!
Gavadi-yo? Aimo Yaubada yana itave'avina againe wamimiyami, ase'asemiya givehivehimeya.
21 #
Ais 61:3; Ha 7:16-17 Omi gaveyao adamoya mafu gilaulaumi, yami vemwamwala gavatubuga!
Gavadi-yo? Aimo Yaubada ginave'ahiyauwami.
Omi gaveyao adamoya watagitagi, yami vemwamwala gavatubuga!
Gavadi-yo? Aimo wanavelavelaiga.
22 #
Yo 16:2; 1Fi 4:14 Omi gaveyao kaliva hitalahagiyemi hivenikohiyemi hi'ihawadamanemi kadu Iya Tohobu'ela yaku kaliva fa'ina hihawavekoyoyemi yami vemwamwala gavatubuga!
23E, hidedemi hinahuluvimi ana toveya wanavemwamwala wanagakahikahi, fa'ina ami laufata lakahina aimo lobameya gidadauda. Wa'ita, omi hihuluvimi amine, meda bwanenediyao Yaubada bonana ana to'awatalatalaina hihuluvidi.
24 #
Ye 5:1-6
Tu hoiyoi omi gaveyao adamoya wakalivamiyao!
Gavadi-yo? Yami abavemwamwala ahe babiya wanuhagana.
25Hoiyoi omi gaveyao adamoya wa'ahiyauwa!
Gavadi-yo? Aimo mafu ginalaulaumi.
Hoiyoi omi yami waselakalaka wavelavelaiga!
Gavadi-yo? Aimo wana'ase'u'aulolo kadu wanatagitagi.
26Hoiyoi omi kaliva moya'aidi hinahawaveyamumuyemi-ma kalivai-mina!
Wa'ita, bwanenediyao falofita fwayafwayadiyao hihawaveyamumuyedi, ada badi hihuluvidi amine meda omi hihuluvimi.
Yesu tokivekoyo adi nuwakabubu fa'ina gilukahihi.
Madiu 5:38-42
27 #
1Fi 3:9
Tu omi moya'aimi wavanevanenegeku-ma agaimiya gagahe. Badi hitalahagiyemi-ma wananuwakabuyedi. Badi hivenikohiyemi-ma agaidiya wana'igibagiba yamumuna. 28Badi hi'alatabutabuyemi-ma fa'idiya wanave'o'ola be higa Yaubada ginanuwakabubuyedi. Badi hikivekoyomi-ma fa'idiya wanave'o'ola. 29Ka'i tamo hakwadi navanavami ginatafina au fafalina wanahawahegena be ginatafina. Kadu ka'i tamo hakwadi ami aikeva vewabana ginalemami, au ami seti keke wananuwaloloneni. 30Gaveyao moya'aidi tamo gavadi fa'ina hinave'o'olemi, au wanaveledi. Ka'i tamo hakwadi yami lokoloko ginavaina, au keke yaudiyewa fa'ina bana againe wanagahe. 31Gavaiya'amine nuwanuwami kaliva omi hinahuluvimi, au medede amine kadu badi wanahuluvidi.
Hakwadi keke agaimiya gida'igibagiba,
medema wananuwakabubuyena.
Madiu 5:43-48
32Ka'i tonuwakabubugaga wananuwakabubuyedi tu keke tonuwalolona wananuwakabubuyedi, medema huluvai-nadi fa'ina Yaubada keke ginahawaveyamumuyemi. Wa'ita, tokoyona badi hinuwakabubuyedi-ma kadu agaidiya hinuwakabubu. 33#Lu 14:12-14Kadu ka'i kaliva tufoidi agaimiya hina'igibagiba hagihagina ada badi'iyaogaga agaidiya meda omi wana'igibagiba hagihagina, au medema huluvai-nadi fa'ina Yaubada keke ginahawaveyamumuyemi. Wa'ita, tokoyona to'igibagiba yamumuna agaidiya meda hi'igibagiba yamumuna. 34Kadu ka'i yami mani o lokoloko badi kaliva adifaiweya hinaveleyewemi-ma wanaveledi tu badi keke adifaiweya hinaveleyewemi-ma agaidiya wananuwalolonena, au medema huluvai-nadi fa'ina Bana Yaubada keke ginahawaveyamumuyemi. Wa'ita, tokoyona mali tokoyona agaidiya hifolafolaka be higa aimo yadi folaka ana kiveyewa hinanuhagana.
35Tu omi keke badi amine wanahuluva. Nibaimiyao wananuwakabubuyedi, agaidiya wana'igibagiba yamumuna kadu wanafolafolaka tu yami folaka ana kiveyewa keke wananuwenuweni. Ka'i hidedemi wanahuluva, au aimo ami laufata lakahina wananuhagana kadu ami ita vaita Tomiyagetane-mo'ane natuneyao amine. Fa'ina Bana'e badi tonuwalolona kadu badi yana nuwakabubu keke hidavesiuleyeni-ma ginuwakabubuyedi. 36#Ef 4:32; Yem 34:6-7Tamami lobameya gihinekalikaliyemi amine, meda omi kaliva wanahinekalikaliyedi.” Au hidedemi Yesu gigahe.
Omi keke tovehimeya amine yo kaliva yadi dewa
wanalagani.
Madiu 7:1-5
37 #
Ye 2:13
Kadu gigayo, “Keke tovehimeya amine yo mali kaliva yadi dewa wanalagani be Yaubada kadu omi keke ginalagami. Keke mali kaliva wanahawavekoyoyedi be Yaubada kadu omi keke ginahawavekoyoyemi. Mali kaliva yadi koyona wanavenuwauluyena be Yaubada kadu yami koyona ginavenuwauluyena. 38#Gah 19:17Wanafolafolaka be Yaubada kadu agaimiya ginafolafolaka. Yana folaka hidede amine. Kaliva nau'a againe a'a ginadodona gina'atudonedonena kadu ana tufo ginadodo-havagilena tu gina'ahiwahiwana au yami vainuwana againe ginabihiwana amine, meda Yaubada yana folaka lakahi-mo'ena agaimiya. Ka'i omi lakahina amine wanafolaka, au Yaubada lakahina amine agaimiya ginafolaka. Ka'i kabi'ona amine, kadu kabi'ona.” Au hidedemi Yesu gigahe.
39Kadu Yesu hidedemi gigahetalahobuhobuyedi gigayo, “Gavaimi be tomatakoyo tomatakoyohiyana edeya ginanagoyeni? Keke adifaiweya fa'ina adi'iselu awalolo againe hinabe'u. 40#Yo 13:16Tosikulu keke yana tovehawala yana nuwahuya gidatubuhegeni, tu tosikulu hinasikulu-'owoga yo yadi halamana yadi tovehawala yana halamana amine.
41Gavadi-yo ai ulana vaita koyona kabi'ona amine tobohiya matane u'ita'itani tu ai-mo'ena vaita koyona lakahina amine tauni mataniya keke udanuwenuweni? 42Ka'i ai-mo'ena o mataniya gidadauda-ma keke uda'ita'itani, au keke-mo'a afaiweya tobohiya unagaheni unagayo, Tobohiyaku, ai ulana mata againe ganavaihegena. O meya luhei. Nagona ai-mo'ena tauni mataniya unavaihegena, higa ya dewa koyo-mo'ena unahegena, ada au afaiweya una'ita-hagihagiyena be ai ulana tobohiya matane unavaihegena, higa yana dewa koyona fa'ina unakivetuvetununa.
Yesu kaliva yadi dewa ai guwana againe giluvefosena.
Madiu 7:15-20
43Wa'ita, keke tamo ai yamumuna guwana koyona gidaveguweni. Meda anafaiweya ai koyona keke guwana yamumuna gidaveguweni. 44Ai sa'eyana sa'eyana guwadi againe kahalamanena. Fa'ina fiki keke ai-kawowo againe kadakoluni, kadu kelefi keke aboda againe kadakoluni. 45#Ye 3:10-12; Md 12:35Meda kaliva yamumuna ase'asena yamumuna fa'ina dewa yamumuna amine gihuluhuluva, kadu kaliva koyona ase'asena koyona fa'ina dewa koyona amine gihuluhuluva. Gava nuwanuwa kaliva ase'asena givemagana au medede amine gigahegahe.
Manuwa ana to'aiyogona adi'iselu kahihidi.
Madiu 7:24-27
46 #
Md 7:21
Gavadi-yo aku egana wayakayakahini wagagayo, Kaiwabu, Kaiwabu, tu keke bonaku wada'abi'abini? 47#Ye 1:22Gaveyao agaikuya hi'ela'ela bonaku hinoganogalina be hi'abi'abina, medema manuwa ana to'aiyogona againe ganaluvefosena. 48Bana'e ma anafaiweya kaliva manuwa giyogona. Nagona babi giyalana tunugina ogola givehobuna be kuga againe gibakina. Muliya gufa gihobu vaita manuwa gida'alugeni tu kaliva giyogo-hagihagiyena fa'ina gidauda yamumuna. 49Atu gaveyao bonaku hinoganogalina tu keke hida'abi'abini, medema kaliva yana manuwa makameya giyogona, keke ogola gida'aiyala. Tu muliya gufa gihobu againe manuwa auhe'ama gimadube'u ada au gi'ayaweli-'owona.” Au hidedemi Yesu gigahe.
Currently Selected:
Luke 6: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.