Luke 7
7
Yesu Loma togiyomatana ana agetoga gisiveyawana.
Madiu 8:5-13
1Tu Yesu yana vehawala moya'aina yo'o matadiya gilukahihiyena gihavaina, gina Kafeneumi againe. 2Medede againe Loma togiyomatana sa'eyana gimiyami, ada ana agetoga gi'aulolo lakahina, kabisona gida'alika. Ada togiyomatana nuwanuwana lakahina agetogai-nadi. 3Ada Yesu valeyana ginogalini-yo miYuda adi tonagona tufoidi Bana againe gi'iveninisedi be hinayowanina, togiyomatana ana agetoga ginasiveyawana fa'ina.
4-5Yesu againe hiyemu-yo hive'o'oladona higayo, “Hida togiyomatana kaliva hagihagina. Gilubodana be yana ve'o'ola udavenogalena, fa'ina nuwanuwana yada yo'o kadu tauna yana maniya yama manuwa-abavehawala Kafeneumi againe gikivemididina.”
6-7Au Yesu badi buye hina. Hinauna tu manuwa hi'ivedaveda'ufona au togiyomatana tobohiyaneyao gi'iveninisedi be bonana Yesu againe hinayakahina vaita tauna gidagayo, “Kauveya, keke Tauni una'ivewowologilogi, fa'ina iya keke kaliva yamumuku yo yaku manuweya afaiweya unaluku. Medema fa'ina keke tauku gadakilakahiku-yo againiya gada'ela. Au mededei unamiya tu unavehimeya be O bonaniga aku agetoga ginasiveyawana. 8Hidede amine afaiweya unavehimeya ma a gahalamanena, fa'ina iya kadu abavehimeya gavaina. Yaku tonagona yana vehimeya dibune gamimiyami, kadu yaku tolugaviyamomo yaku vehimeya dibune himimiyami. Yaku tolugaviya sa'eyana gavehimeyena gagayo, Una, ada au gitowamidi be gina. Kadu velugana gagahena gagayo, U'ela we'ai, ada au gi'ela. Kadu aku agetoga againe gagahe gagayo, Hidedemi unafaisewa, ada au yaku vehimeya amine gifaisewa.”
9Ada Yesu togiyomatana bonana ginogalini-yo bana fa'ine giyaulowoga au gihagavilana yo'oyo'o himuliyena-ma agaidiya gigahe gigayo, “Biyao! Wona velemona keke-mo'a tamo kwanaIsileli yana wavetumagana gadanuhagani hida kwanaLoma yana vetumagana amine.” 10#Yo 4:51Ada au kaliva togiyomatana gi'iveninisedi-ma hiyewadi manuweya hiluku-yo agetoga ahe gibwaina-ma hinuhagana.
Yesu sikwa natudi alikeya gisivemididina.
11Tu Yesu gimiyami tu gina melala ana egana Neini againe. Ana tomuliya kadu yo'o lakahina hivebwa'uliyena. 12Melala tufone giyemuyemu tu to'alika hiwahiwahinauwena be hinahuyana. Bana to'alika sikwa natudi kwanatubu'eya ada yo'o lakahina sikwa hivebwa'uliyedi. 13#Lu 8:41-42,49-55Ada Kaiwabu gi'itadi-yo gihinekalikaliyedi gigahedi gigayo, “Keke wanatagiya.” 14Au gina vaya gikibwa'ena ada towahi himididi-vagata. Yesu to'alika gigahena gigayo, “Kwamana, umidi!”
15 #
1Kin 17:21-24
Gigahe-yo to'alika gimidi givebutu gigahegahe, ada Yesu kwamana hinana giveleyewedi. 16Au moya'aidi himatautave'ine be Yaubada ana egana hikilakahina higayo, “Yaubada bonana ana to'awatalatalaina lakahina agaideya gilakayemu.” Kadu higayo, “Yaubada gi'ela be ide yana yo'o gina'itanuwakabubuyeda.” 17Ada au valeyai-nadi Yudiya melalina moya'aina kadu awa'awanina moya'aina gina giluyabuna.
Yesu Yoni Tobafitaiso yana toliluvaluva gifatana.
Madiu 11:1-5
18Tu mena Yesu yana gugai moya'aina fa'ina Yoni ana tomuliya hivenuwa'atana, bana Yoni aimo deliya gimiyami-tu. 19Au Yoni ana tomuliya adi'iselu giyowanidi be Kaiwabu againe gi'iveninisedi higa hinatoliluveluvena hinagayo, “Yaubada yana Tovegida gina'ela-ma ime abodabodana. Ka'i O'eni bana kalivai-nina o ka'i kaliva sa'eyana aimo anabodana?”
20Ada badi kaliva adi'iselu ahe Yesu againe hiyemu-yo higahena higayo, “Yoni Tobafitaiso againiya gi'iveninisema ada nuwanuwana ginahalamanena ka'i O'eni Yaubada yana Tovegida aimo gina'ela-ma kalivai-nina o ka'i kaliva sa'eyana aimo anabodana.”
21Ada medema tovai-nadi Yesu kaliva moya'aidi yadi aulolo tulina tulina agaidiya gisiveyawadi. Badi wayafunediyao gikiveyamumudi kadu tomatakoyo tufoidi moya'aidi matadi gikiveyamumuna. 22#Ais 35:5-6; Md 15:30-31; Mk 7:32-37; Lu 5:12-13, 7:12-16Au Yesu Yoni yana kaliva gigahedi gigayo, “Wanana ada gavaimi wanogalina kadu wa'itana-ma Yoni wanavenuwa'atana, higa tomatakoyo matadi gimahalina, tovefela hinunudadana, tovedawodawowo yadi aulolo gihavaina, totagakweu tagadi gi'afolena, to'alika himididi-havagi, kadu koyokoyo Venuwa'ata Yamumuna Yaubada yana kibababala fa'ina hi'ela'ela hinoganogalina. 23Kadu Yoni yana toliluvaluva inubaku fa'ina ma wanagahena hai kaliva Iya fa'ikuya keke gidanuwaluga medema yana vemwamwala gavatubuga!” Au hidedemi Yesu gigahedi.
Yesu Yoni Tobafitaiso fa'ina gilukahihi.
Madiu 11:7-19
24Badi Yoni ana tovenuwa'ata ahe hina tu Yesu yo'oyo'o agaidiya givebutu Yoni fa'ine gilukahihi gigayo, “Boi omi'iyao Yoni wa'itana yamina babigaga againe ana toveya, wanuwanuwa ma vaita gavadi wada'itani? Isisi'u bolimana againe gilewalewa amine, ka'i wana vaita kaliva kowakowana wada'itani? 25Keke hidede amine wada'itani tu wana be ka'i gavadi wana'itani? Ka'i kaliva ana wavaigau vaita wada'itani? Keke, fa'ina kaliva adi vaigau kikaiwabuna kadu yadi walokoloko himimiyami-ma tokikaiwabu yadi manuwa lakahina againe himimiyami. 26Au wanagaheku, omi wana ka'i gavadi wana'itani? Ka'i wavaitana Yaubada bonana ana to'awatalatalaina wana'itani? E, wona velemona to'awatalatalaina wa'itana tu bana Yoni ma to'awatalatalaina moya'aidi gikaiwabuhegedi. 27#Mal 3:1; Lu 3:2-6Tuwai-mo'ena bana Yoni fa'ine Yaubada bonana eto'etoladina gigahe higa vaita Yaubada yana Tovegida againe gidagahe gidagayo,
U'ita! Yaku tovenuwa'ata gana'iveninisena
be bana wai ginanagona,
ya eda kaliva ase'asediya ginakidewedewena.
28Gagahemi bana Yoni kaliva moya'aidi babiya hitubuyemu-ma gikaiwabuhegedi, tu gava kaliva ana egana kabisona Yaubada yana yo'ogaga agaidiya tu givetumagane-mo'eku, medema Yoni ana egana ginakaiwabuhegena.” Au hidedemi Yesu gigahe.
29 #
Md 21:32
Tu kaliva moya'aidi kadu takesi ana toyaudi Yesu yana gahe hinogalina againe, higahe higayo, “Wona velemona Yaubada yana eda tunutunugina.” Hidedemi higahe fa'ina boi hihawahegedi be Yoni gikivebafitaisoyedi. 30Tu tonagona tafatafalolodiyao adi egana Falisi be Mosese yana vehimeya ana tovehawala Yoni yana bafitaiso hidibutoyogena, ada medema againe Yaubada yana inuba badi fa'idiya hikilowena.
31Kadu Yesu gigayo, “Tu omi kaliva hida tovai-nadi babiya watubuyemu-ma gavadi amine yo ganahawaluveluvemi? Yami huluva gava dewa againe ganaluvefoseni? 32Au omi we'owe'o amidiya, melaleya hihiyoto tu hivetavetaunega. Yo'o sa'eyana yo'o velugadi agaidiya hikovakova higayo,
Modawa akalikalina tu omi keke wadavagavaga wadayeluyelu.
Alulaukuhi vaita alika ana tova amine tu
omi keke wadatagitagiya.
Gavaimi anaga-yo nuwami anakiveyamumuni?
33Meda anafaiweya Yoni gi'ela ada keke a'a yamumuna gida'u'ani kadu keke oine gidayuyuni, ada au omi wahawavekoyoyena vaita bana wayafunena. 34#Lu 5:30Tu Iya Tohobu'ela ga'ela ada a'a yamumuna ga'au'ana oine gayuyuna, ada au kadu Iya wahawavekoyoyeku wagayo, Wa'ita, Bana hima to'a-fa'ila oine ana toyu-fa'ila, kadu takesi ana toyaudi kadu tokoyona velugadiyao givevetobohiyanedi. Hidedemi wagahe tu gavaimi anahuluva-yo nuwami anakiveyamumuni? 35Tu Yoni kadu Iya'eku ama'iselu Yaubada yana nuwahuya againe ka'i velemo'ena afifaisewa ma yama faisewa guwana againe wanahalamanena.” Au hidedemi Yesu yo'o agaidiya gigahe.
Yesu kwamayoku udo'udona yana koyona giyawelina.
36Tova sa'eyana tonagona tafatafalolodiyao adi egana Falisi kalivana Yesu giyowanina be buye hina'a. Yesu giyemu-yo giluku Falisi yana manuweya gi'enolukekela be gina'a. 37Mena melala againe kwamayoku sa'eyadi himiyami yadi dewa udo'udona. Yesu Falisi yana manuweya gi'au'a-ma valeyana hinogali-yo bunama hiwahina be hi'ela, bunamai-nadi aba'aihiwaga kugakugana againe gidauda, kuga ana egana alabasita. 38Au kwamayoku Yesu wakwaune hi'ela Bana agene himidi hitagitagi tu hivebutu matailudi againe agena hivebutana, ada u'udi tunugina againe hiluvehavehayana. Kadu yadi wave'amohimohina agena hiveyaugina bunama againe hibunamina.
39Tu bana Falisi Yesu giyowanina-ma gi'itadi-yo nuwahinagene gigahe gigayo, “Ka'i hida kaliva Yaubada bonana ana to'awatalatalaina velemona digo, gava kwamayoku hikibwa'eni ma gidahalamanena higa kwamayoku koyodi.”
40Ada Yesu Falisi yana nuwahinage gihalamaneni-yo gigahena gigayo, “Saimoni, yaku nuwanuwa sa'eyana againiya ganagaheyena.” Bana gigayo, “Tovehawala, au ugahe.”
41Yesu givebutu gigahetalahobuhobuyena gigayo, “Wakalivana sa'eyana kaliva luhei agaidiya mani givetalaiyena be aimo hinaveleyewena. Kaliva sa'eyana K5,000 amine gibuki, kadu sa'eyana K500 gibuki. 42Keke adifaiweya adi buki hinafatani againe, au adi'iselu adi buki giyawelina. Au unagaheku, kaliva adi'iselu adi tonuwakabubu againe hinuwanuwa tu hadema kaliva yana nuwanuwa lakahi-mo'ena?”
43Saimoni gigayo, “Iya gavaita bana ana buki lakahi-mo'ena tu giyawelina-ma kalivai-nadi bana againe ginuwanuwa lakahi-mo'ena.” Yesu gigayo, “Ika, ugahe velemo'ena.”
44 #
Aba 18:4
Gigahe-yo kwamayoku agaidiya gihagavilani tu Saimoni againe gigahe gigayo, “Hida kwamayoku ahe u'itadi. Ya manuweya galuku gawakawaka tu yada dewa wakawaka amine keke udahuluva. Keke udavehimeya-yo gufa hida'aliyeni-yo ageku hidakolani tu hida kwamayoku matailudiya ageku hivebutana ada u'udiya hiluvehavehayana. 45Veyauga againe keke udalusiuleyeku tu tova galuku againe badi hivebutu ageku hiveyaugi-fa'ilina. 46U'uku bunama againe keke udabunamini tu badi ageku bunama wamagana againe hibunamina. 47Hidema fa'ina againiya gagahe, kwamayoku yadi koyona moya'aina tu Yaubada ahe giyawelidi fa'ina yadi nuwanuwa lakahina agaikuya hiseyemaunena. Tu gava kaliva yana koyona keke moya'aina tu Yaubada giyawelina, medema yana nuwanuwa Yaubada againe kabi'ona.” Au hidedemi Yesu Saimoni gigahena.
48 #
Md 9:2-6
Tu kwamayoku agaidiya Yesu gigahe gigayo, “Yami koyona ahe gayawelidi.”
49Hidedemi gigahe fa'ina wakawaka velugadiyao Bana buye hi'au'a-ma hivebutu hive'agahegahe higayo, “Ha! Bana hima hida gava kaliva yo koyona giyawelidi?”
50Tu Yesu kwamayoku gigahedi gigayo, “Wavetumaganeku fa'ina yami koyona adi aiyawela wanuhagana. Yami wanuwayamumu wanana.”
Currently Selected:
Luke 7: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.