Luke 8

Vevine tufoidi Yesu hivelugana.

1-3 # Lu 24:10 Yesu gimiyami tu hivebutu melala moya'aina lakahidi be kabi'odi agaidiya ginunuwaliliuga, Yaubada yana itave'avina ana Venuwa'ata Yamumuna fa'ina gilulumamala. Ana tomuliya tuwelo hivebwa'uliyena kadu vevine tufoidi buye'i, badi vevine-dina boi wayafunediyao kadu yadi wa'aulolo tulina tulina tu Yesu gisiveyawadi. Vevine-mo'edi hidede amine. Meli vineMagidala, bana yafune seveni hiluvaiyena tu Yesu giwavidi amanadi. Yowana bana Susa vavinena, kalivai-nadi Helodi yana manuwa hinagena adi to'itave'avina. Susana kadu vevine velugadiyao moya'aidi. Badi vevine-dina Yesu hibwa'ulina be taudiyao yadi giba againe Yesu ana tomuliya buye hi'ita'itave'avidi.

Otova babi tulina tulina againe ana gahetalahobuhobu.

Madiu 13:1-9; Maki 4:1-9

4Tu kaliva moya'aidi melala tulina tulina agaidiya hitauya be Yesu againe hiyo'oyo'o, ada hida gahetalahobuhobu gilukahihiyena. 5Gigayo, “Kaliva sa'eyana yana otova witi nafona yana faheya ginauwena be gina'iyauyaulena. Witi nafona gi'i'iyauyaulena tu tufona edeya gibe'u be kaliva hivagavebabidi ada manuga hi'ela be hi'ana. 6Kadu tufona babi dabodabona againe gibe'u. Ada babi keke dubadubana fa'ina gikabukabu tu gi'awa'ulodi. 7Kadu tufona aboda againe gibe'u be aboda hinagene gikabu ada au yogo gifaiwala be witi gilufave'alikana. 8Atu tufona babi yamumuna againe gibe'u be gikabu ma gitabo yamumuna guwana hanaledi hanaledi amine.” Au hidedemi Yesu gigahetalahobuhobu tu gikovadona gigayo, “Omi kaliva watagami, au bonaku wadavenogalena.”

Yesu yana gahetalahobuhobu fa'ina gikivetuvetunu.

Madiu 13:10-23; Maki 4:10-20

9Muliya ana tomuliya gahetalahobuhobu-nadi ana kaivila fa'ina Yesu hitoliluveluvena. 10#Lu 10:21Yesu gigayo, “Yaubada yana itave'avina ana nuwanuwa sevasevauyana omi agaimiya giyauna tu mali kaliva agaidiya gahetalahobuhobugaga amine galukahihiyedi. Gagahetalahobuhobuyedi be higa hina'ita'ita tu keke hina'itahalamaneni, kadu hinanoganogala tu keke hinahalamaneni.

11 # 1Fi 1:23 Tu gahetalahobuhobu ana kaivila hidede amine. Otova anafaiweya Yaubada bonana. 12Witi nafona edeya gibe'u-ma anafaiweya kaliva Yaubada bonana hinogalina tu muliya Setani gilakayemu be bona ase'asediya givaihegena be higa Yaubada keke hinavetumaganeni-yo adi kibababala hinanuhagani. 13Witi nafona babi dabodabona againe gibe'u-ma anafaiweya kaliva Yaubada bonana hinogalina be yadi wavemwamwala ase'asediya hisena. Tu bonana keke hidanuwa-nunauyeni ada walamina keke ase'asediya gidavegilili fa'ina tova kabisonaga hivetumagana. Tu aladibidibi giyemaunidi ana toveya hinuwayewa. 14#Lu 18:18,22-24Witi nafona abodeya ana nuwanuwa amanadi kaliva Yaubada bonana hinogalina tu tova hinunauwena againe hida babi ana vita ana kikaiwabu ana gakahikahi nuwadi givaina fa'ina, gaitomai-dina yadi vetumagana hilufave'alikana, keke gidatabo. 15#Yo 6:28-29; Ye 1:22Atu witi nafona babi yamumuna againe ana nuwanuwa amanadi kaliva Yaubada bonana hinogalina be yadi wanuwanuwa tunutunugina kadu yadi wa'idibumuhiga hikidonena, ada yadi wa'atuvefa'ila guwadi hiseseyemaunena. Gahetalahobuhobu ana nuwanuwa au hidede amine.”

Yaubada bonana ana venogala lamufa againe giluvefosena.

Maki 4:21-25

16Kadu Yesu gigahedi gigayo, “Keke tamo hakwadi lamufa ginakabuni-yo avaeka hinagene o ka'i ivi dibune ginaseni. Au ana abasewadi againe ginasena be higa badi manuweya hiluku-ma matadi ginamahalina. 17Gavadi gavadi moya'aina tova adamoya keke i'ivemogatalina medema aimo tova mulina kabu'avane ginalakayemu, kadu gavadi gavadi sevasevauyana medema aimo mahalina gina'iveyemaunina be moya'aidi hinahalamanena. 18#Md 25:20-29Hidema fa'ina Yaubada bonana wananogalina againe, wananogali-hagihagiyena. Fa'ina hai kaliva Yaubada yana nuwanuwa ginogalina be gi'ita'itave'avina, medema againe kadu nuwanuwa moya'aina ginayauna. Atu hai kaliva Yaubada yana nuwanuwa keke gida'ita'itave'avini, medema yana halamana kabi'ona Yaubada ginavaihegena be ginamiya-kawowo.” Hidedemi Yesu gigahe.

Yesu hinana kadu taineyao hilakayemu.

Madiu 12:46-50; Maki 3:31-35

19Tu Yesu hinana kadu taineyao hi'ela hina'itana tu yo'o lakahina fa'ina keke adifaiweya hida'ela Yesu liline. 20Au tamo kaliva givenuwa'atana gigayo, “Hina be taimomo eda'awaneya himidimidi, nuwanuwadi O hina'ita.”

21 # Lu 11:27-28; Yo 1:11-13 Tu Yesu yo'o agaidiya gigahe gigayo, “Badi gaveyao Yaubada bonana hinogalina be kadu hi'abi'abina, medema hinaku o kaikweyao.”

Yesu mala lakahina gihawatana be gi'alovena.

Madiu 8:23-27; Maki 4:35-41

22Tova sa'eyana Yesu ana tomuliya buye wakeya hiyage ada gigahedi gigayo, “Tobu yuwa fafaline kanadamana.” Au hilowoga. 23Hinauna tu Yesu gi'enonuwaulu. Auhe'ama bolimana lakahina oyeya gihobu'ela be mala koyona tobu againe gilakayemu. Gufa waka hinagene gilukuluku ada abagilagi lakahina hinuhagana.

24Badi tomuliya hina hiluvaguna higahena higayo, “Kauveya, Kauveya, kabisona kana'alika!” Au Yesu gimidi bolimana lefo lakahidi gihawatadi, auhe'ama mala gi'atagona bolimana gi'alovena.

25 # Mk 9:20-24 Tu ana tomuliya gigahedi gigayo, “Hai yami vetumagana waseni?” Badi hiyaulowoga yadi wamatauta hive'agahegahe higayo, “Biyao! Bana hima gava kaliva yo bolimana lefo givehimeyedi ma bonana hi'abina?”

Yesu kwanamiGadalini wayafunena gikiveyamumuna.

Madiu 8:28-34; Maki 5:1-20

26Tu Yesu ana tomuliya buye miGadala yadi fafali againe hilakayemu, medema Galili ana fafali wamagigine. 27Avaleya gihobu au kaliva sa'eyana melaleya gitauya-ma gimaduhagana. Bana kaliva ma yafune hiluvaiyena ada lauva tunugina konekonena gimiyami. Kadu keke manuweya gidamiyami au tomohuyahuya agaidiya givemanuwa. 28-29#Lu 4:34Tova moya'aina yafune kaliva giluluvaiyena ada bulava kainumula againe nimana agena hiyogoyogona be hi'ita'itave'avina tu au ai'adi bulava gigologolohina ada yafune kaliva giwavina be melalagaga agaidiya gimiyami. Tu Yesu giyemu-yo yafune givehimeyena be kaliva ginanuyabuyabuna. Kaliva Yesu gi'itana againe, givebutu gikovakova Yesu agene gi'awawa gikova'awafatafata gigayo, “O'eni Yesu Yaubada Tomiyagetane-mo'ane Natuna. Gavadi iya agaikuya unagani-yo u'ela? Againiya gahawayafayafa keke unakivetavetagigiku.”

30Au Yesu gitoliluveluvena gigayo, “Gavaimi a egana?” Bana gigayo, “Aku egana Yo'o.” Hidedemi gigahe fa'ina yafune moya'aidi hiluvaiyena. 31Au yafune Yesu hihawayafeyafena be keke kahu tunugi-vadavada'aina againe ginawavidi.

32Tu yuwa oya fafaline bawe adi yo'o lakahina adiga hilelele, ada yafune hihawayafeyafena be ginahawahegedi bawe hinaluvaiyedi. Au gihawahegedi. 33Gihawahegedi-yo yafune kaliva hinuyabuyabuna be bawe hiluvaiyedi, ada bawe adi yo'o matatabudi awaloloya hi'otahobu be tobu againe hitowa'alika.

34Tu bawe adi tolufolofologahi hida gaitoma hi'ita-yo hi'ota be hina, melala-mo'ena kadu awa'awanine mena gaitomai-dina hilukahihiyedi. 35Kaliva hinogalini-yo hitauya be gavadi gilakayemu-ma hina'itana. Ada Yesu againe hiyemu kaliva yafune hinuyabuyabuna-ma hinuhagana, bana Yesu agene gihiyoto u'una a giyamumu be ana kaleko gi'osena. Hi'ita-yo himatauta. 36Ada badi to'ita kaliva wayafunena gavaiya'amine yana yamumu ginuhagani ma tomiyami agaidiya hilukahihiyena. 37Hilukahihi gihavaina Gadala ana fafali kalivai-dina moya'aidi Yesu hive'o'olena be ginanuyabuyabudi, fa'ina himatautave'ine. Au wakeya giyage be giyewana.

38-39Tu kaliva yafune hinuyabuyabuna-ma Yesu gihawayafeyafena gigayo, “Iya O buye kadana.” Tu Yesu gi'atuveyewana gigayo, “Uyewa ya melaleya be gavadi lakahina Yaubada o fa'iniya gigugaiyeni-ma kaliva agaidiya unalukahihiyena.” Ada au kaliva gina gavadi lakahina bana fa'ine Yesu gigugaiyena-ma kaliva moya'aidi agaidiya gilukahihiyena, gina melala giluyabuna.

Yailo natuna kwamayoku yana aulolo kahihina.

Madiu 9:18-19; Maki 5:21-24

40Tu Yesu tobu fafaline giyewana againe, yo'o yuwadedei yadi wavemwamwala hilusiuleyena fa'ina moya'aidi hiyo'o be hibodabodana. 41-42Tu kaliva sa'eyana gi'ela ana egana Yailo, bana manuwa-abavehawala ana tonagona sa'eyana. Au Yesu againe gi'ibo'ula-mo'a gihawayafeyafena higa yana manuweya gida'ela, fa'ina natuna vinetubu'eya ana malamala tuwelo gi'ali'alika. Ada au Yesu ginauna tu yo'o hiveve'atuwahega tu himidififina.

Kwamayoku Yesu ana kaleko bwatana gikibwa'ena kahihina.

Madiu 9:20-22; Maki 5:25-34

43Yesu yo'o hinagediya ginauna tu kwamayoku sa'eyana buye hinauna, bana yana vaikohi be dayagina tova moya'aina gimadu-vagata. Tuwaina givebutu gi'u'aulolo be ginunauwena malamala tuwelo, doketa agaidiya yana lokoloko moya'aina givehavaina tu keke adifaiweya. 44Kwamayoku Yesu wamuline gi'ela be ana kaleko bwatana gikibwa'ena, ada auhe'amanadi dayagina gihayahaya.

45Au Yesu gigayo, “Hakwa'adi gikibwa'eku?” Moya'aidi hivekeke ada Fita gigahena gigayo, “Kauveya, yo'oyo'o himidififi be hiveve'atuwahega.”

46 # Lu 6:19 Tu Yesu gigayo, “Keke tu tamo hakwadi gikibwa'eku be yaku faiwala bana againe gina ma a ga'ayaunena.”

47Au kwamayoku Yesu ahe gihalamanena ma gi'itana againe, yana wavetatava gi'ela Yesu agene gi'ibo'ula-mo'a, ada kaliva moya'aidi matadiya yana kaibwa'e inubana gihawavemogatalena kadu yana maduyamumu fa'ina gilukahihi. 48Au Yesu gigahena gigayo, “Natuku, uvetumaganeku fa'ina ubwaina. Ya wanuwayamumu unana.”

Yesu Yailo natuna alikeya gisivemididina.

Madiu 9:23-26; Maki 5:35-43

49Yesu aimo gilulukahihi tu kaliva sa'eyana manuwa-abavehawala ana tonagona ana egana Yailo yana manuweya gitauya-ma giyemu Yailo gigahena gigayo, “Natu kwamayoku yawaina gihavaina. Keke Tovehawala unaluve'avaleni-yo una'aliye-kawowoni.”

50Tu Yesu kwamana valeyana ginogalini-yo Yailo gigahena gigayo, “Keke unamatauta, au unavetumaganeku be natu ginayamumu.”

51Ada manuweya giyemu-yo yo'o moya'aidi luku fa'ina gihawatadi tu Fita Yoni Yemesa kadu kwamana tamana hinana badi'iyaogaga Bana buye hiluku. 52Ada moya'aidi hitagitagigina hitagitagilauhawa, tu Yesu gigahedi gigayo, “Auwe tagiya, kwamana keke gida'alika au gi'enonuwaulu.”

53Kwamana velemo'ena gi'alika ma hihalamanena fa'ina moya'aidi Yesu hihawavelaigena. 54Tu Yesu kwamana nimana gi'abina gikova gigayo, “Vinewe'owe'o, umidi.” 55Au alu'aluwana kwamana againe giyewana ada auhe'ama gimidi. Ada Yesu givehimeya gigayo, “Tamo a'a kwamana wavele be gi'ani.” 56#Md 8:4Tu tamana hinana hiyaulowoga tu gihawatadi be gavadi gilakayemu-ma keke tamo hakwadi againe hinalukahihiyeni.

Currently Selected:

Luke 8: viv

Highlight

Copy