Luke 9

Yesu yana yo'o tuwelo kaliva adi veluga fa'ina gi'iveninisedi.

Madiu 10:5-15; Maki 6:7-13

1Tu Yesu ana tomuliya tuwelo gikovavaga'auhidi ada faiwala kadu abavehimeya giveledi be adifaiweya yafune moya'aidi hinawavidi kadu kaliva auloloya hinasiveyawadi. 2Au gi'atuhegedi be Yaubada yana itave'avina fa'ina hinalumamala kadu to'aulolo hinakiveyamumudi. 3#Lu 10:4-11; Af 13:51Ada gigahedi gigayo, “Keke tamo gavadi yamina againe wananauweni, keke aiwala keke fose keke a'a keke mani wanawahini. Kadu keke aikeva luhei wananauweni. 4Gava manuwa againe wanamidiluku, medede againe wanamiyami be wanalowoga. 5Kadu gava melala againe wanayemu tu keke hinavetobohiyanemi, medema melalai-nadi wanahegena againe fwayafwaya agemiya wanavagahegehegena, higa Yaubada yana nuwakoyo badi agaidiya ana iya'iyaya.” Au hidedemi Yesu ana tomuliya givenuwa'atadi.

6Au hilowoga melala tulina tulina agaidiya hinuwaliliuga, Yaubada yana Venuwa'ata Yamumuna hilumamalena, melala moya'aina agaidiya kaliva hisiveyawadi.

Helodi Yesu fa'ine nuwana givegafo'uya'uya.

Madiu 14:1-2; Maki 6:14-16

7-8 # 1Kin 17:17-24 Tu bana Helodi Galili ana tovehimeya gaitoma moya'aina gilakayemu-ma valeyadi ginogalina, ada kaliva moya'aidi Yesu inubana hi'abigahegaheyena fa'ina Helodi nuwana givegafo'uya'uya. Tufoidi higahe vaita Yoni Tobafitaiso alikeya gidamididi-havagi. Kadu tufoidi higahe vaita Elaiya gidayemuna-havagi. Kadu tufoidi higahe vaita Yaubada bonana ana to'awatalatalaina sa'eyana tuwaina gimiyami-ma gidamididi-havagi. 9#Mk 6:27Bana Helodi gigahe gigayo, “Iya gavehimeya be Yoni u'una hinikehegena tu hida hima hakwa'adi-yo valeyana tulina tulina ganoganogalini?” Ada au tova gilelelena be higa Yesu gina'itana.

Yesu kaliva faifi tausani give'adi.

Madiu 14:13-21; Maki 6:30-44; Yoni 6:1-15

10Tu afositolo hiyewadi-yo gavadi gavadi moya'aina higugaiyena-ma Yesu hivenuwa'atana. Au ginauwedi be melala ana egana Bedasaida againe hitogavehaila be hinaveyawai. 11Tu yo'oyo'o Yesu ana tomuliya buye hami hina ma hinogalina againe, himuliyedi. Hiyemu-yo Yesu gilusiuleyedi, ada Yaubada yana itave'avina fa'ina gilukahihiyedi kadu gaveyao yadi wa'aulolo medema gisiveyawadi.

12Tu mala givebutu gisilavina tomuliya tuwelo Yesu againe hi'ela higayo, “Yo'o una'atuhegedi be melala eda'uoya kadu awa'awanidi agaidiya hinana adiga hinakimonena abadauda hinalelena. Fa'ina hida melalagaga againe kamimiyami.”

13Tu Bana gigahedi gigayo, “Auwe, omi wanave'adi.” Badi higayo, “Beledi kabi'odi faifigaga kadu igana luhei ime agaimeya gidadauda. Hima gavana-yo hida yo'ohala adiga anana anakimoneni?”

14Hidedemi higahe fa'ina kaliva adi yo'o 5,000 amine. Tu Yesu ana tomuliya gigahedi gigayo, “Wanagahedi be hinahiyoto adi loi fifiti fifiti amine.” 15Au hidedemi tomuliya hihuluva. Yo'o higahedi be moya'aidi hihiyoto. 16Hihiyoto-yo Yesu a'a faifi kadu igana luhei givaidi digo lobameya gi'italele Tamana againe givesiule, au a'a gikihinehineni-yo ana tomuliya giveledi be higa yo'o agaidiya hinafolakena. 17Ada au moya'aidi hi'a be hi'ahiyauwa, ada adi tufo tomuliya hikwakwana feyawa tuwelo kwadakwada againe hivemagadi.

Fita Yesu inubana fa'ina gihawavemogatala.

Madiu 16:13-20; Maki 8:27-30

18Tova sa'eyana Yesu anakaibe gimiyami tu give'ove'o'ola ada ana tomuliya Bana liline himiyami. Au gitoliluveluvedi gigayo, “Iya inubaku fa'ina kaliva gavaimi higahe?”

19 # Mk 6:14-16 Badi higayo, “Tufoidi higahe vaita O Yoni Tobafitaiso. Kadu tufoidi higahe vaita O Yaubada bonana ana to'awatalatalaina ana egana Elaiya. Kadu tufoidi higahe vaita to'awatalatalaina sa'eyana tuwaina gimiyami-ma gidamididi-havagi.”

20 # Yo 6:68-69 Yesu gigayo, “Tu omi'iyao Iya vaita hakwa'adi ma gavaimi wagahe?” Fita gibonalaufata gigayo, “O'eni Yaubada yana Tovegida Keliso.”

Yesu yana aulolo yana alika gilukahihiyena.

Madiu 16:21-23; Maki 8:31-33

21Fita Yesu inubana fa'ina hidedemi gigahe-yo Yesu ana tomuliya gihawatadi be Bana Yaubada yana Tovegida ma keke tamo hakwadi againe hinahawavemogataleni. 22Kadu gigayo, “Iya Tohobu'ela aku vehimeya gavaina higa aulolo moya'aina kaliva nimadiya gananuhagana. Kaliva lakahidiyao ada abaveyao ana tofaisewa kikaiwabudiyao kadu Mosese yana vehimeya ana tovehawala hinakiloweku. Au kaliva hinaluve'alikaku tu aiyeta anaveto againe Yaubada ginasivemididiku.”

Yesu ana muliya fa'ina vita kananuhagana.

Madiu 16:24-28; Maki 8:34-38; Yoni 12:23-26

23 # Md 10:38-39 Tu Yesu moya'aidi agaidiya gigahe gigayo, “Gava kaliva nuwanuwana tavagiku ginamafuna, medema gilubodana be tauna yana nuwanuwa gidavenuwauluyena, ada Iya agaikuya gidavetomuliya-yo tova tova gidahawahegena be vita tulina tulina gidanunuhagadi. 24Ada gava kaliva keke nuwanuwana Iya agaikuya ginahawahegeni tu taunaga fa'ina ginanuwanuwa tova moya'aina, medema yawaina ginanuhegena. Atu gava kaliva ginahawahegena be aku vetumagana fa'ina yawaina ginanuhegena, medema yawai-vagahina ginanuhagana. 25Ka'i kaliva babi ana lokoloko matatabuna ginavai-'owona tu tauna yawaina o ka'i alu'aluwana yana miya hagihagina ginanuhegena digo, keke tamo gavadi yamumuna ginanuhagani. 26#Lu 12:9Fa'ina hai kaliva keke nuwanuwana bana yaku kaliva be bonaku givetumaganena ma yo'o matadiya ginahawavemogataleni yadi hawavelaiga gimatausena fa'ina, medema fa'ine aimo tova mulina Iya keke ganagahe vaita bana yaku kaliva. E, Iya Tohobu'ela Tauku yaku wakikaiwabu Kamaku yana wakikaiwabu yana tovenuwa'ata mahamahalidiyao yadi wakikaiwabu buye ganayewa'ela ana toveya, bana fa'ine keke ganagahe vaita yaku kaliva. 27Gagahe velemo'ena agaimiya tufoimi hidedei wamidimidi-ma aimo keke alika wananuhagani tu nagona Yaubada yana abavehimeya yana yemu wanamidi'itana.” Hidedemi Yesu gigahe.

Yesu lobama ana nuya kikaiwabuna gi'osena.

Madiu 17:1-8; Maki 9:2-8

28 # 2Fi 1:17-18 Mena gahegahe Yesu giyakahina be aiyeta eita amine himiyami tu Yesu Fita Yoni Yemesa ginauwedi be oyeya gilakavedi, higa wesedei ginave'o'ola fa'ina. 29Give'ove'o'ola tu magigina ana ita tulina gilakayemu ada ana vaigau gikwayanuwanuwa. 30-31#Lu 13:33Ada auhe'ama Yaubada yana kaliva luhei tuwai-mo'ena himiyami-ma adi egana Mosese kadu Elaiya yadi wamahalina ve'akinamanamalina lobameya hihobu'ela Yesu buye hilulukahihi. Yadi ve'agahegahe againe Yesu Yelusalema againe gina'alika be gavaiya'amine Yaubada yana nuwanuwa alikai-nadi againe ginalakayemu velemo'ena ma hilukahihiyena. 32Tu Fita tobohiyaneyao buye hidauda fa'ina wowodi gifwalele, ada hi'enoviladi againe Yesu yana mahalina ve'akinamanamalina hi'itana, kadu kaliva adi'iselu Bana buye himidimidi-ma hi'itadi. 33Ada Mosese Elaiya hivebutu Yesu hinuyabuyabuni tu Fita Yesu gigahena gigayo, “Kauveya, ime O buye kamimiyami ma gilubodana. Vada tohiye anayogodi, sa'eyana O fa'iniya, sa'eyana Mosese fa'ine, kadu sa'eyana Elaiya fa'ine.” Tu gavaimi gigahegahe ma keke gidahalamaneni.

34Aimo gigahegaheni tu buhibuhi gihobu tomuliya adi'itoto giwa'utagodi. Ada buhibuhi gikevadi againe himatauta. 35#Md 12:17-18; Lu 3:22Ada buhibuhi hinagene ago'ago sa'eyana hinogalina gigayo, “Bana hidevama Natuku Bana galuwafana amanadi. Au bonana wanavenogalena.” 36Ada ago'ago gi'agolohini-yo Yesu anakaibe gimiyami ma hi'itana. Ada hive'awa'ibodena medema aiyetai-dina gavadi tamo hi'itana-ma keke tamo hakwadi againe hidalukahihiyeni.

Yesu kwamana wayafunena gisiveyawana.

Madiu 17:14-21; Maki 9:14-29

37Bogi hida mala gilauna oyeya hihobu'ela-yo yo'o lakahina Yesu himaduhagana. 38Ada auhe'ama kaliva sa'eyana yo'o agaidiya gikova gigayo, “Tovehawala, gahawayafeyafe be natuku uda'itanuwakabubuyena fa'ina bana kwanatubu'eyana. 39Bana wayafunena ada yafune gikive'avini-yo auhe'ama gikova'awafatafata, ada yafune gikivefavefanina au awabugo gi'ala'ala-hiwahiwagena. Yafune gififaiwala gi'i'iveki'onina ginunauwena keke gidamadunuyabuyabuni. 40Ada a tomuliya gahawayafeyafedi be hinawavina tu keke adifaiweya.”

41Au Yesu gigahedi gigayo, “Omi kaliva tova adamoya watubuyemu-ma yami nuwanuwa keke tunutunugina, keke ma'ita wadavetumaganeku. Malamala gavaiyehi omi buye kanamiyami be gana'atuvefa'ilemi tu yami vetumagana ginayemu? Au natu u'aliye we'ai.”

42Kwamana aimo gi'ela'ela tu yafune gi'atagifatafata babiya gibaini-yo gikivefavefanina. Tu Yesu yafune gihawatana kwamana gikiveyamumuna be tamana giveleyewena. 43Ada Yaubada yana faiwala lakahina fa'ina kaliva moya'aidi hiyaulowoga.

44 # Lu 9:22 Tu yo'o Yesu yana gugai moya'aina fa'ina aimo hiyauyaulowoga tu Bana ana tomuliya gigahedi gigayo, “Hida bonaku wananogalina be utumiya wanasena. Iya Tohobu'ela makewa kaliva nimadiya hinahegenauweku.” 45Tu mena yana gahe ana nuwanuwa hifaniyena. Yaubada nuwanuwai-nadi badi agaidiya gisevauyena be keke adifaiweya hinahalamaneni. Ada gahe-nadi ana toliluvaluva fa'ina himatauta.

Hakwadi kikaiwabuna Yaubada matane?

Madiu 18:1-5; Maki 9:33-41; Yoni 13:20

46 # Lu 22:24-27, 14:11 Bana Yesu gigahe-yo ana tomuliya hivebutu hivekwageya higa hakwadi badi agaidiya kikaiwabu-mo'ena. 47-48Yesu yadi nuwahinage gi'ayauneni-yo kwamana kabi'ona gi'abina be liline gisi'aliyena ada gigahedi gigayo, “Hai kaliva hida kwamana aku eganeya ginasive'auyena, medema vaita Iya ginasive'auyeku. Ada hai kaliva Iya ginasive'auyeku, medema vaita Bana'e gi'iveniniseku-ma ginasive'auyena. Fa'ina gava kaliva moya'aimi agaimiya ana egana kabi'o-mo'ena, medema makewa'e kikaiwabu-mo'ena.”

49Yesu gigahe-yo Yoni gigahena gigayo, “Kauveya, kaliva sa'eyana a'itana, bana yafune a eganeya giwaviwavidi tu ahawatana, fa'ina bana keke ime tomuliya ama yo'o kalivana.”

50Yesu gigahedi gigayo, “Keke wanahawatani. Wa'ita, gava kaliva keke ami nibaina, medema tobohiyami.”

MiSameliya Yesu hikilowena.

51 # Lu 17:11 Tu tova giluvedaveda'ufo be Yaubada Yesu lobameya ginasilakahina, ada au yana wa'atuvefa'ila Tauna givehimeya be Yelusalema againe ginana. 52Ada tomaduyowayowana gi'iveninisedi be wai hinagona, miSameliya yadi melala sa'eyana againe hiluku be higa Bana yana yemu fa'ina hinakidewadewa. 53Tu miSameliya miYuda keke hidavetobohiyana, ada miSameliya hihalamanena Yesu yana nuwanuwa againe Yelusalema ana fou gitutuna be ginana fa'ina keke yadi melaleya hidavega'auleni. 54Ada ana tomuliya Yemesa be Yoni miSameliya yadi kilowa hinogalini-yo higayo, “Kauveya, gavaimi unuwanuwa? Ka'i anavehimeya be ai'ala'alata lobameya ginahobu'ela gina'alayaweyawelidi?” 55Tu Yesu gihagavilana be gidakeyedi. 56Ada au mali melala againe hina.

Kaliva adi'itoto Yesu ana muliya fa'ina higa-wayoga.

Madiu 8:18-22

57Edeya hinauna tu kaliva sa'eyana Yesu againe gigahe gigayo, “Gahawahegeku be ha'amine ha'amine unana, iya kadu O buye kanana.”

58Bana Yesu gigayo, “Galu'eta-walawala'a adi wagou kadu manuga adi wa'uba tu Iya Tohobu'ela yaku abamiya keke, kadu yaku abaveyawai keke. Au aku muliya vitana.”

59 # Lu 14:26,33 Kadu kaliva sa'eyana againe gigahe gigayo, “Unamuliyeku.” Tu bana gigayo, “Kauveya, udahawahegeku be gadamiyami tu kamaku gadatauni-yo gada'ela gadamuliye.”

60Tu Yesu gigahena gigayo, “Badi yawaidi ivaguna keke amanadi, yadi to'alika hinatauna. O'eni ma unana Yaubada yana yo'ogaga ana luku fa'ina unalumamala.”

61Kadu kaliva velugana gigayo, “Kauveya, iya ganamuliye tu udahawahegeku be nagona aku unuma gadalukafoiyedi.”

62 # Fl 3:13 Yesu gigahena gigayo, “Gava kaliva givebutu Iya fa'ikuya gifaisewa tu muliya ginuwanuwaluga be tauna yana faisewa againe giyewana, medema Yaubada yana yo'o ana luku fa'ina keke anafata.” Au hidedemi Yesu bonana.

Currently Selected:

Luke 9: viv

Highlight

Copy