Afositolo 4

Fita Yoni miYuda yadi Koniselo agaidiya hivekotudi.

1Tu Fita Yoni yo'o agaidiya aimo hilulukahihi tu abaveyao ana tofaisewa kadu tuilala adi tonagona, kadu tonagona tafatafalolodiyao adi egana Sadusi, badi agaidiya hiyemu. 2Badi afositolo adi'iselu yo'o hivehavehawaledi be higa hinahalamanena Yesu alikeya gimididi-havagi. Kadu higahegahedi vaita Yesu gimididi-havagi fa'ina kadu kaliva velugadeyao kanamididi-havagi. Hidedemi hivehawala fa'ina, badi abaveyao ana tofaisewa ahenao buye hi'ila'a. 3#Af 5:18Au Fita Yoni hikive'avidi tu mala a gibogibogi fa'ina, deliya hisedi be mala ginalauni-yo hinavekotudi. 4#Af 2:41, 5:14Tu moya'aidi yo'o agaidiya yadi laumamala hivetumaganena, ada tovetumagana yadi yo'o himoya'ai, adi kilagalaga faifi tausani (5,000) amine.

5Bogi hida mala gilauna miYuda yadi tovehimeya ada kaliva lakahidiyao kadu Mosese yana vehimeya ana tovehawala Yelusalema againe hivaga'auta. 6Bana abaveyao ana tofaisewa adi tokaiwabu ana egana Anasi buye hivevai, kadu Kaiyafasi, Yoni, Alekisanida, kadu tokaiwabu-nadi ana yo'o kalivai-dina velugadiyao buye'i. 7#Md 10:19-20Au hivehimeya be afositolo adi'iselu badi matadiya hinamidi. Hi'ela-yo hitoliluveluvedi higayo, “Omi ami'iselu ma hakwadi yana faiwala againe hidevama wafaisewani? Hakwadi ana egana wayakahini-yo kaliva wasiveyawani?”

8Hidedemi higahedi tu Alu'aluwa Mahalina Fita givemagana ada au givebutu gilumamaledi gigayo, “Omi yada yo'o adi tovehimeya kadu kaliva lakahimiyao. 9Adamoya ime tovefela avelugana nonogana wavedewayaugima. Gavaiya'amine giyamumu-ma watoliluveluvema. 10#Af 3:6Au moya'aimiyao kadu miIsileli moya'aidi ganakivetuvetunumi be wanahalamanena. Bana Yesu Keliso kwanaNasaledi ana egana fifiwala-mo'ena fa'ina hida kaliva ahe giyamumu be omi matamiya gimidimidi. Bana Yesu omi wakivekelosena tu Yaubada alikeya gisivemididina. 11#1Fi 2:7Bana fa'ine gahetalahobuhobu sa'eyana Veyao Tuwaina ana bukiya gidadauda gigayo,

Ogola omi manuwa ana to'aiyogona wakilowena

medema giveholili'abi.

12 # Yo 14:6 Bana Yesu anakaibe againe kibababala kananuhagana. E, Yaubada Bana ana egana ide tomiyababi giveleda, ada keke tamo hakwadi velugana babiya gimiyami-ma gidavegideni be bana ana eganeya kibababala adafaiweya kananuhagani.” Hidedemi Fita gigahedi.

Koniselo Fita Yoni yadi laumamala hihawata-wayoga.

13Tu badi miYuda yadi Koniselo Fita Yoni yadi asevatu hi'itana againe, nuwadi givegafo'uya'uya, kadu badi afositolo kaliva-kawowo keke hidasikulu-ma hi'ayaunedi againe, nuwadi givegafo'uya'uya. Ada au badi boi Yesu hiveve'alunena ma nuwadi gi'afolena. 14Tu kaliva a giyamumu-ma medede againe Fita Yoni buye himidimidi. Koniselo kaliva a giyamumu-ma hi'ita'itana fa'ina keke adifaiweya tamo gavadi hinagaheyeni. 15-16#Yo 11:47Au hivehimeyedi be abavedewayauga againe hinahobu. Badi kaliva hihobu-yo badi Koniselo hivebutu hive'anuwanuwa kadu hive'agehegahe higayo, “Hida kaliva fa'idiya gavaimi kanaga? Kaliva moya'aidi Yelusalema againe hida aituha fifiwala-mo'ena hifaisewana-ma hihalamanena, ada ide keke adafaiweya kanagahe kanagayo, Badi keke hidasiveyawani. 17#Af 5:28-29Tu hida kalivai-dina kadahawatadi kadagayo, Keke tamo hakwadi velugana againe Yesu ana egana fa'ina wanagaheni. E, keke tamo tova hidede amine wanahuluva-havagi. Hidedemi kadahawatadi be kadu keke Yesu valeyana ginanauna kaliva agaidiya fa'ina.”

18Tu hive'agahegahe gihavaina, kaliva hikovadi be hinaluku-havagi. Hiluku-yo hivehimeyedi higayo, “Keke-mo'a Yesu ana eganeya wanalulaumamala. Keke tamo tova Bana ana egana fa'ina wanavehawala.” 19Hidedemi hivehimeyedi tu badi Fita Yoni higahedi higayo, “Omi taumiyao wananuwanuwa. Hadema hagihagina Yaubada matane, ka'i omi bonami ana'abina o ka'i Yaubada bonana ana'abina? 20Tu ime keke amafaiweya ana'ilova. Au tova moya'aina gaitoma fifiwalana taumeyao a'itana kadu anogalina-ma analulukahihiyena.”

21Hidedemi Fita Yoni higahe tu badi Koniselo kadu hihawatadonedi ada hihawahegedi be hina. Gavaiya'amine matahiwadi hinaveledi ma hinuwenuwe-wayoge. Keke adifaiweya, yo'o himatausedi fa'ina. Au tovefela giyamumu fa'ina, kaliva moya'aidi Yaubada hihawahawadavadavana. 22Tovefela aituha fifiwalana againe yana yamumu givaina-ma bana kaliva lakahina, ana malamala foti (40) kadu gavaiyehi.

Tovetumagana Yaubada againe hivesiule, ada yadi asevatu

fa'ina hive'o'ola.

23Tu Fita Yoni Koniselo hihegedi tu yadi yo'o agaidiya hiyewadi, ada abaveyao ana tofaisewa kikaiwabudiyao kadu kaliva lakahidiyao gavaimi higahe ma hilukahihiyena. 24Ada badi tovetumagana hinogali-yo au moya'aidi Yaubada againe tamotamo'aine hive'o'ola higayo, “Kaiwabu lakahi, O'eni To'aibubuna, lobama babi lehaga O ububuna, kadu gaitoma moya'aidi lobameya babiya lehageya himimiyami-ma O ububudi. 25-26#Sam 2:1-2Boi tuwai-mo'ena Alu'aluwa Mahalina O bona bwanenema lakahina Devida awane gise-vagahina, ada au ya tofaisewa Devida gigahe gigayo,

Gavadi-yo yo'o tulidiyao himidi-yo hi'ila'a?

Gavai'ona-yo manuwafo koyona hivevaiye-wayoge?

Babi ana kini moya'aidi hikidewadewa

ada tovehimeya buye hivaga'auta be

Kaiwabu kadu yana Tovegida hinalugaviyadi.

Hidedemi tuwai-mo'ena Alu'aluwa Mahalina Devida awane gigaheye-vagahina. 27#Md 27:1-2Au tovehimeya yadi nuwakoyo fa'ina tuwaina gigahe amine tova adamoya velemo'ena gilakayemu, fa'ina badi kini Helodi kadu Fonitiyo-Failato badi yo'o tulidiyao kalivai-dina kadu miIsileli buye hivaga'auta, ada hivevai be Yesu hinaluve'alikana, Bana'e ya Tofaisewa Mahamahalina O uvegidena be ime miIsileli ginanagoyema amanadi. 28#Af 2:23O Tofaiwala kadu O Tovehimeya fa'ina gavaimi tuwai-mo'ena ya Tofaisewa Yesu fa'ine O uvehimeyena be ginalakayemu, au hidedemi badi higugaiyena be ahe velemo'ena gilakayemu.

29 # Ef 6:19 Ho Kaiwabu, au badi Koniselo yadi hawata unanuwenuwena ada ime ya tofaisewa unafaiwalavelema be yama wa'asevatu O bona analumamalena. 30Ime analulumamala tu O nima utune be to'aulolo hinayamumu, ada abaveyaulowoga kadu aituha fifiwalana ya Tofaisewa Mahamahalina Yesu ana eganeya anafaisewana.” Hidedemi hive'o'ola.

31 # Af 2:4 Ada hive'o'ola gihavaina, manuwa againe hivaga'auta-ma gili'uli'u, kadu Alu'aluwa Mahalina badi moya'aidi givemagadi, ada hivebutu Yaubada bonana yadi wa'asevatu hilulumamalena.

Tovetumagana yadi lokoloko taudiyao agaidiya hifolakena.

32 # Af 2:44 Tu tovetumagana moya'aidi yadi nuwanuwa au sa'eyana, kadu adi ayauna au sa'eyana. Keke tamo hakwadi gidagahe gidagayo, “Yaku gaitoma au tauku akukaibe fa'ikuya.” Au adiga yadi lokoloko yadi gava'adi taudiyao agaidiya hifolafolakena. 33Badi afositolo hifaiwala be Kaiwabu Yesu yana mididi-havagi fa'ina hi'awatalatalaina toyogina, ada Yaubada moya'aidi ginuwakabubuyedi lakahina. 34-35#Af 2:25Keke tamo hakwadi koyokoyo badi agaidiya gidamiyami. Tova be tova badi tonibabi o ka'i tonimanuwa medema yadi babi o ka'i yadi manuwa hikimokimonevedamanena, ada mani hivaivaina-ma afositolo agaidiya hi'ali'aliyena. Ada badi afositolo mani-nadi hifolafolakena. Gaveyao adiga o ka'i yadi lokoloko keke, medema agaidiya hifolafolakena.

36 # Af 11:22-26, 13:2-3 Ada tova sa'eyana Yosefa, Livai ana yo'o kalivana, hidede amine gihuluva. Bana yana melala ma himula ana egana Saifilasi. Badi afositolo kalivai-nadi hivewagana Banabasi, ada egana ana kaivila ma kaliva ase'asedi ana Tokivevatu. 37Bana Banabasi yana babi sa'eyana gikimonevedamanena, ada babi fatana gi'aliyena be afositolo giveledi.

Currently Selected:

Afositolo 4: viv

Highlight

Copy