Afositolo 5

Ananaiyasi vavinena Safaila buye kahihidi.

1Tu kaliva sa'eyana gimiyami ana egana Ananaiyasi ada vavinena adi egana Safaila. Bana'e yadi babi sa'eyana gikimonevedamanena. 2#Af 4:34-35Ada babi fatana tufona tauna fa'ine gisena kadu tufona afositolo agaidiya gi'aliyeni tu gigahedi vaita mani matatabuna gida'aliyeni. Tu tufona ginuwalolonena ma badi vavinena hihalamanena.

3 # Yo 13:2 Au Fita gigahena gigayo, “Ananaiyasi, gavana fa'ina Setani againe uhawahege-yo nuwaniya giluku, ada au Alu'aluwa Mahalina againe ufwaya vaita babi fatana matatabuna uda'aliyeni tu keke. Tufona tauni fa'iniya usena. 4Aimo babi keke udakimonevedamaneni againe, medema tauni ya babi, tu ahe ukimonevedamanena againe, babi fatana uvaina-ma kadu o uvehimeyena. Gavana fa'ina nuwahinageniya fwaya ufaisewani-yo ugahe vaita mani matatabuna udavele-'owoma? Keke kalivagaga agaimeya udafwaya, au kadu Yaubada againe ufwaya.”

5-6Tu Ananaiyasi Fita yana gahe ginogalini-yo babiya auhe'ama gibe'u be gi'alika. Au tubulakata hitowamidi, wowona hilifina digo hinauwena be hitauna. Ada gaveyao valeyana hinogalina medema himatauta-ve'ine.

7Himiyami bai tohiye kadu vavinena hi'ela tu gavadi moganedi againe gilakayemu-ma keke hidahalamaneni. 8Bana Fita gigahedi gigayo, “Wanavenuwa'ataku. Yami babi fatana ana tubuga ka'i hidede amine?” Ada badi higayo, “Ika, babi fatana medede amine.”

9Au Fita gigahedi gigayo, “Gavana fa'ina omi'e kadu moganemi buye wanuwanuwa vaita Kaiwabu Alu'aluwana againe wanafwaya be wana'itana ka'i fwaya fatana wananuhagana o ka'i keke? Wa'ita, badi kaliva moganemi hitauna-ma eda'awaneya hiyemu, ada omi kadu hinanauwemi.”

10Ada auhe'ama Fita agene hibe'u be hi'alika. Ada tubulakata hiluku be kwamayoku ahe hi'alika-ma hi'itadi, au hiwahidi be hinauwedi moganedi liline hitaudi. 11Ada au tovetumagana moya'aidi himatautave'ine, ada gaveyao moya'aidi valeyadi hinogalina-ma kadu himatautave'ine.

Afositolo aituha fifiwaladi hifaisewadi.

12 # Af 14:3 Tu afositolo aituha fifiwalana kadu abaveyaulowoga moya'aina manuwafo hinafadiya hififaisewadi. Ada badi tovetumagana moya'aidi Solomoni yana abamiyami againe se'eyaine hivagavaga'auta. 13Badi manuwafo hihawaveyamumuyedi ada badi keke hidavetumagana-ma himatauta be keke badi tovetumagana buye hidavaga'auta. 14Himatauta tu tova tova kaliva vevine keke sa'eyadi Kaiwabu againe hivebutu hivetuvetumagana amanadi tovetumagana yadi yo'o agaidiya hiluku. 15Ada afositolo yadi aituha fifiwalana fa'ina, kaliva yadi to'aulolo melaleya hisehobuyedi be vaya o sita againe hisedi. Hisehobuyedi be Fita ginabala againe, higa anununa to'aulolo tufoidi ginakibwa'edi be hinayamumu. 16#Mk 6:56; Af 19:11-12Kadu yo'o moya'aidi melala Yelusalema awa'awanina agaidiya hitauya, yadi to'aulolo kadu badi wayafunediyao hi'aliyedi. Ada moya'aidi hiyamumu-'owoga.

MiYuda adi tonagona afositolo hikivekoyodi.

17 # Af 4:1-3 Tu bana abaveyao ana tofaisewa adi tokaiwabu kadu tobohiyaneyao moya'aidi, higa yo'o tafatafalolodiyao adi egana Sadusi kalivai-dina, badi afositolo agaidiya higa'uma'uma-mo'a. 18Ada au hitowamidi hina afositolo hikive'avidi be deli lakahina againe hisedi. 19-20#Af 12:7-10Deliya hisedi tu bogi nafone Kaiwabu yana tovenuwa'ata deli ana wanafali giyauna be afositolo gisehobuyedi, ada gigahedi gigayo, “Wanana manuwa-tafalolo lakahina againe wanamidi be hida eda ivaguna, higa yawai-vagata ana eda fa'ina kaliva agaidiya wanagaheye-'owona.” 21Au tovenuwa'ata givehimeyedi amine hina, ada mala gilaulauni manuwa-tafalolo againe hiluku hivebutu hivehawala.

Tu bana abaveyao ana tofaisewa adi tokaiwabu ahenao badi miYuda yadi Koniselo hikovavaga'auhidi, be higa miYuda adi tonagona moya'aidi hivaga'auta-'owoga. Ahe hivaga'auta-yo yadi tuilala deliya hi'iveninisedi be afositolo hina'aliyedi. 22-23Tu yadi tuilala hiyemu againe, afositolo deliya hi'i'avadi, ada au Koniselo agaidiya hiyewadi ada hivenuwa'atadi higayo, “Deliya ayemu againe, wana hi'aifalidona-ma a'itana, kadu to'itave'avina abaluku againe hi'ita'ita. Tu wana ayauna againe, keke tamo hakwadi deli hinagene gidamiyami.” 24Ada tuilala adi tonagona kadu abaveyao ana tofaisewa kikaiwabudiyao tuilala yadi gahe hinogalini-yo nuwadi gifani, be hinuwanuwa vaita gavaimi gidalakayemu.

25Hinuwanuwa tu kaliva sa'eyana gi'ela gigahedi gigayo, “Wanogali! Badi kaliva deliya wasedi-ma manuwa-tafalolo lakahina againe himidimidi yo'o hivehavehawaledi.” 26Au tuilala adi tonagona yana kalivamomo buye hina afositolo hivega'auledi tu keke hidamunudi, fa'ina himatauta ka'i yo'o kuga againe hinafihafihadi.

27Hiyemu-yo afositolo hilukuwedi, Koniselo agaidiya hikivemidididi be abaveyao ana tofaisewa adi tokaiwabu ginavedewayaugidi. 28#Af 4:18-19; Md 27:25Bana gigahedi gigayo, “Ime hawata lakahina agaimiya asena, higa hida kaliva ana eganeya keke-mo'a wanavehawala tu hida gavaimi waga? Au yami vehawala wanunauwena be gina Yelusalema giluyabuna. Ada nuwanuwami hida kaliva yana alika ana vita ime agaimeya wanasena.”

29Tu Fita kadu afositolo velugadiyao higahedi higayo, “Ime keke kaliva bonana ana'abini, au nagona Yaubada bonana ana'abina. Hidedemi ama vehimeya. 30Bana Yaubada, bwanenedeyao yadi Yaubada, Yesu alikeya gisivemididina, Bana omi ai againe watutuvefosena be hidedemi waluve'alikana. 31#Ef 1:20; Hi 12:2E, Yaubada gisivemididina be i'atagine gikilakahina, ada Bana'e yada Tovehimeya Lakahina kadu ada Tokibababala gisena. Tokibababala gisena be Bana'e omi miIsileli ginavelugami be amifaiweya wananuwavilana, ada yami koyona ana aiyawela wananuhagana. 32#Af 1:8Ada ime hida gaitoma fa'ina a'awatalatalaina, ime'eyao kadu Alu'aluwa Mahalina buye a'awatalatalaina, Bana'e ma badi gaveyao Yaubada bonana hi'abi'abina, medema agaidiya gihawahegena.” Hidedemi afositolo higahe.

Gameliyela afositolo gilugolegoledi.

33Tu badi Koniselo hida gahe hinogalini-yo hi'ila'a-mo'a be nuwanuwadi afositolo hinaluve'alikadi. 34Tu kaliva sa'eyana Koniselo agaidiya ana egana Gameliyela, badi Falisi yadi yo'o kalivana, Koniselo hinafadiya gitowamidi. Bana Gameliyela higa Mosese yana vehimeya ana tovehawala, ada kaliva moya'aidi hive'amohimohinena. E, bana gitowamidi givehimeya be afositolo kabu'avane hinasehobuyedi. 35Badi hihobu tu bana Koniselo agaidiya givebutu gilukahihi gigayo, “Omi ide miIsileli, hida kaliva fa'idiya wananuwanuwa-hagihagi. Ka'i wanaluve'alika-kawowodi digo, medema keke ginalubodani. 36Malamala gavaiyehi kahegedi againe, kaliva sa'eyana gilakayemu, ana egana Tiudasi, ada gigahe vaita bana tonagona lakahina, ada kaliva adi yo'o fowa hanaledi (400) amine himuliyena. Tu muliya badi gaveyao hiluve'alikana, ada ana tomuliyamomo hi'abinauna be yana vehimeya gihavaina. 37Kadu muliya kabemani adi eganayaudi ana toveya kaliva sa'eyana gilakayemu, ana egana Yudasi kwanaGalili, ada kadu kaliva moya'aidi ginuwa'abiyedi. Kadu meda anafaiweya badi gaveyao hiluve'alikana, ada ana tomuliyamomo hi'abinauna be gihavaina. 38Ada adamoya kadu hida kalivai-dina fa'idiya ganagahe. Au wanaki'ilovedi be hinana. Bana Yesu medema yadi tonagona gi'alika-ma fa'ine hivehavehawala. Ka'i yadi vehawala yadi faisewa inubana kaliva agaidiya, au ginahavaina. 39Tu ka'i inubana Yaubada againe, au keke amifaiweya wanahawatadi. Aimo wanahalamanena Yaubada againe walulugaviya.” Hidedemi Gameliyela gigahe be badi Koniselo bonana hivenogalena. 40#Af 4:18Au afositolo hikovadi be hiluku'ela, ada tuilala hivehimeyedi be hilaudi. Hilaudi gihavaina kadu hihawatadi higayo, “Au wanana tu keke-mo'a Yesu ana eganeya wanalaumamala-havagi.”

41 # Md 5:10-12; 1Fi 4:13 Tu afositolo Koniselo hihegedi, tu yadi wavemwamwala hina. Hinuwanuwa higa vaita badi yamumudiyao Yaubada matane fa'ina gihawahegedi be Yesu ana egana fa'ina kaliva matadiya wowomumu hinuhagana. 42#Af 17:3Ada au aiyeta sa'eyana sa'eyana Venuwa'ata Yamumuna Yesu Keliso fa'ine hilulumamala kadu hivehavehawala. Manuwa-tafalolo lakahina againe kadu kaliva yadi manuweya hidedemi hinunauwena, keke hida'ilova.

Currently Selected:

Afositolo 5: viv

Highlight

Copy