A Mark Sõng 10

Pag yiisg yelle

(Mt 19,1-9; Lk 16,18)

1A Zezi sẽn yi be, b waa Zɩɩda soolmẽ, Zʋrdẽ kʋɩlga rʋʋnde. Be me, zãma tigma b sɛɛgẽ. A Zezi le sɩngame n zãmsd nebã wa rasem kam. 2Farizẽ rãmba kolgame n sok a Zezi: «Rao tara sor n yiis a pag bɩ?» Bãmb da sokda a Zezi pʋto-sokre n dat n fɛɛs-ba. 3A Zezi leok-b-la woto: «A Moyiiz kõo yãmb no-bʋg yell kãnga poorẽ?» 4#Yao 24,1-4; Mt 5,31. Tɩ b yeele: «A Moyiiz kõo sore tɩ b gʋls kãadma welgr sebre la b yaool n yiis pagã.» 5A Zezi leok-b lame: «Yaa y sũura sẽn kɩʋʋlma, la a Moyiiz gʋls no-kãng y yĩnga. 6#Bs 1,27; 5,2. Dũni sɩngrẽ, Wẽnd n zĩndig rao la paga. 7Yaa rẽ yĩng la rao na n bas a ba la a ma n zĩnd ne a paga, 8#Bs 2,24. la raoã ne pagã na n lebga yĩng a ye. 9Woto yĩnga, Wẽnnaam sẽn lagem bũmb ninga, pa tog tɩ ninsaal welg-a ye.» 10A Zezi sẽn waa n le kẽ zakẽ, karen-biisa sok-b-la yell kãnga poorẽ. 11A Zezi leok b lame: «Ned ning sẽn yiisd-a a paga n le kẽ ne pag a to, yaa yoob la a maanda. 12#Mt 5,32; 1Ko 7,10-11. Sã n ya pag n yi n bas a sɩda n tɩ rɩk rao a to, yaa yoob bal la a maanda.»

Kom-bõoneg bark ningri

13Neb wʋsg waa ne b kom-bõonego a Zezi nengẽ n kot-ba tɩ b sak n sɩɩs-ba. La karen-biisa zaba ne-ba. 14A Zezi sẽn yãe woto, b sũur puugame tɩ b yeele: «Bas-y kom-bõonegã tɩ b wa mam nengẽ la y ra rig-b ye. Yaa neb niyns sẽn wẽnd-b bãmba n na n soog Wẽnd Rĩungã. 15#Mt 18,3. Sɩd-sɩda, mam yeta yãmba tɩ ned ninga fãa sẽn ka reegd-a Wẽnd Rĩunga wala bi-bilfu, a soab kõn kẽ a pʋgẽ ye.» 16Dẽ poore, a Zezi mobga kambã, n tik ned kam fãa zug ne b nugu, n ning-b barka.

Rakãagr a ye kibare

17A Zezi sẽn dɩk sore, la rao a yembre sẽn zoe n seg-ba n wõgemd b taoore, n sokdẽ: «Karen-saamb sõngo, mam na n maana a wãn n paam vɩɩm sẽn kõn sɛ?» 18A Zezi yeel-a lame: «Yaa bõe yĩng la fo boond maam tɩ karen-saamb sõngo? Sã n pa Wẽnnaam b ye bala, ned ka be n ya sõng ye. 19#Ey 20,12-16; Yao 5,16-21. Fo mii Wẽnnaam noya la: da kʋ ned ye, da yo ye, da zu ye, da kõ kaset ziri ye, da wẽg f to ye, waoog f ba la f ma.» 20La daoã leokame: «M zu-soaba, mam sɩng n maanda rẽ al m yãadmẽ.» 21A Zezi ges-a-la ne nonglem, n yeel-a: «Bũmb a ye bala n paoog foo marsã: fo sẽn tar bũmb ning fãa, bɩ f rɩk n koos n kõ naong rãmba tɩ f na paam arzɛk arzãnẽ. Dẽ poore, bɩ f wa tũ maam.» 22La raoã sẽn wʋm woto, a sũur sãamame t'a gãnem a neng n looge t'a ra tara laog wʋsgo. 23A Zezi gesa sẽn da be-b bãmb sɛɛgẽ wã la b yeela b karen-biisã: «Wẽnnaam Rĩung pugẽ kõom na n yɩɩ toogo ne neb niyns fãa sẽn tar-b arzɛka!» 24Gomda yɩka karen-biisa pɛlenga t'a Zezi na n le yeel-ba, n paase: «M kamba, ad-y Wẽnnaam Rĩunga pugẽ kõom na n yɩɩ toogo ne arzɛk rãmba! 25Yʋgemd sẽn na n tũ supĩim yõore n loog yaa naana n yɩɩd arzɛk soab sẽn na n kẽ Wẽnnaam Rĩungã pugẽ.» 26Tɩ bãmb na n le yɛɛs n paas la b yet taaba: «Sã n ya woto, ãnda n na n paam fãagre?» 27A Zezi ges-b-la pem, n yeel-ba: «Yaa toog ne ninsaalba, la ka toog ne Wẽnd ye tɩ bãmb tõee fãa.»

Beoog sũ-noog pʋlengo

28A Piyɛr yeela a Zezi: «Ges-y, tõnd basa bũmba fãa n tũ yãmba.» 29A Zezi leokame: «Sɩd-sɩda, mam yeta yãmba, tɩ ned ning fãa sẽn sak-a n bas a yiri, a yaopa, a tãopa, a ma la a ba, a kamba bɩ a pʋto, mam yĩnga la Koe-nooga yĩnga, 30yẽ soab na n paama naoor koabga, marsã menga, doto, yaopa, tãopa, ma rãmba, kamba la pʋto. Namsg yẽ na naage, la zamaan ning sẽn pʋgdã, na n yɩɩ vɩɩm sẽn kõn sɛ. 31#Mt 20,16; Lk 13,30. Wʋsgo sẽn da ya pipi rãmba na n lebga poorẽ dãmba tɩ poorẽ dãmb na n lebg pipi rãmba.»

Namsga wilgr, naoor a tãab soaba

32B ra rɩka sor n dabd Zerizalɛɛm. A Zezi meng ra lʋɩɩ bãmb taoore la b fãa ra kẽnda ne pɛlen-yɩka, b fãa ra pʋgda ne yɛɛsgo. A Zezi baka Piig la a yiibã la b sɩngame n wilgd-b yɛl niyns sẽn na n paam bãmb menga: 33«Ade, tõnd dabda Zerizalɛɛm la b na n yõka Ned Biigã n kɩs maan-kʋʋdba nanamse la Sɛb-mitba; bãmb n na n kao b kũum bʋʋdo, n bas-b bu-zẽmba nusẽ, 34tɩ b na n yaal-ba, n sẽnes b neng kolkoodo, n pãb-b ne kaase, n kʋ-ba, la dasma a tãab poore, b na n vʋʋgame.»

A Zebede kamba kosgo

35A Zebede kamba, a Zak la a Zã, kolga a Zezi n yeel-ba: «Karen-saamba, d kotame tɩ y kõ-d d sẽn na n kos-y bũmb ningã.» 36T'a Zezi yeel-ba: «Yaa bõe la y rat tɩ m maan y yĩnga!» 37B leokame: «Y zɩɩra zĩigẽ, bɩ y sõng tɩ d nin-yend zĩnd y rɩtgo, t'a to wã zĩnd y goabga.» 38#Lk 12,50. A Zezi yeel-b lame: «Yãmb pa mi y sẽn kot bũmb ning ye. Yãmb tõe n yũu wamd ning b sẽn na n tugl-ma la y so koom ning b sẽn na n so-ma?» 39B leok-b lame: «Tõnd tõeeme.» La a Zezi yeel-b lame: «Mam sẽn na n yũ wamd ningã yãmb me na yũ-a. Mam sẽn na n so soob ninga, yãmb me na so. 40La sã n kella mam goabg la rɩtg zĩigã, mam pa tõe n kõ yãmb rẽ ye. Zĩ-kãens yaa b sẽn segl b rãmb yĩnga.»

41Tʋʋm-tʋmdb piiga sẽn wʋm a Zak la a Zã goama b sũur puuga ne-ba. 42#Lk 22,25-26. A Zezi boola bãmb fãa n yeel-ba: «Yãmb miime tɩ bu-zẽmba nanams rɩta naam b soolma rãmb zutu la b nin-bɛda maand-b la pãnga. 43Pa na n yɩ boto ne yãmb ye, ayoo! Yãmb sʋka, ned sã n dat n lebg nin-kãsenga, bɩ a reng n yɩ yãmb sõgne. 44#Mt 23,11; Mk 9,35; Lk 22,26. La ned ninga sẽn dat-a n yɩ pipi soaba, yãmb sʋka, bɩ a soab reng n yɩ yãmb fãa yamba. 45Ned Biiga meng ka wa tẽng zugu n dat tɩ neb maana a yam ye; a waame n na n maan neb a taab yam, la a kõ a meng vɩɩm neb wʋsg fãagr yĩnga.»

Zeriko zoang sãoogre

46B taa Zeriko. La bãmb sẽn waa n yit be ne b karen-biisã la zãma kãsengã, a Bartime, a Time biiga, sẽn ya zoanga, ra zĩi sora noor n bõsdẽ. 47A sẽn wʋm tɩ b gomd tɩ yaa Nazarɛt Zezi, a mooname: «Zezi, Daviid biiga, zoe-y mam nimbãanega.» 48Neb wʋsg da zabda ne-a, n yet t'a sĩnd a noore. La yẽ da moondame n yɩɩd pĩnda: «Daviid biiga, zoe-y mam nimbãanega.» 49A Zezi yaasame n yeel: «Bool-y zoangã!» Tɩ b bool-a n yeel-a: «Keng f pɛlga, yik tɩ b boond-f lame.» 50La zoanga loba a fuug n wudg n ta a Zezi taoore. 51A Zezi sok-a lame: «Fo ratame tɩ m maan-f bõe?» Tɩ zoanga yeele: «Karen-saamba, sõng-y tɩ m nina puki!» 52La a Zezi yeel-a lame: «Bɩ f kẽng tɩ f tẽeb fãag-f lame.» La tao-tao bala, a nina pukame, t'a ra tũud a Zezi.

Currently Selected:

A Mark Sõng 10: SSDC98

Highlight

Copy