Maa 8

Blɛkpaa bilawa plaade

(Mat 15.32-39)

1I gɛ̃gɛ̃o bila ɛ̀a kã̀aaaazi lɔ. Aa pɔbleae vĩ lɔo, ɔ̃ Yesu a iwaɔ sìsi a ònɛ́: 2Gbɛ̃́piɔ kɛ̀mɛɛ wɛ̃naũ, asa a gɔɔ aaɔ̃n la kɛ́ aa kumanɔ, aa pɔe vĩ aa ble lɔo. 3Tó ma ń gbaɛ aa ta bɛ ń nɔanao, an yɛ̃ɛɛ a laa zɛ́ guuɛ, asa an gbɛ̃eɔ bɔkĩi zã̀ɛ. 4Ɔ̃ aà iwaɔ aà là aa mɛ̀: Makĩi wa blɛ eu sɛ̃gbãu la à gbɛ̃́piɔ kãi? 5Ɔ̃ Yesu ń lá à mɛ̀: Pɛ̃ɛ mɛn ũma á vĩi? Aa mɛ̀: Mɛn soplaɛ. 6Ɔ̃ a ò bilaɛ aa zɔ̃lɛ tɔɔlɛ. Ɔ̃ à pɛ̃ɛ mɛn soplapi sɛ̀, à saaukpà, a ɛ̀'ɛ a kpà a iwaɔwa aa kpaalɛ bilaɛ, ɔ̃ aa kpaalɛ̀nɛ́. 7Aa kpɔ nɛnaɔ vĩ yɔɔ lɔ. Kɛ́ à baaadàu, a ònɛ́ aa ɛa bee kpaalɛnɛ́ lɔ. 8Ɔ̃ aa blè wà kã̀, ɔ̃ wà a miɔna pɔ gɔ̃̀ɔ sɛ̀lɛ sɔ sopla. 9An dasi kà gbɛ̃ɔn ɔaasɔsɔo lɛɛ siiɔ̃ (4 000) taawa. Kɛ́ Yesu ń gbaɛ, 10ɔ̃ à gɛ̃̀ go'ilɛna guu ń a iwaɔ, aa gɛ̀ Damanuta busuu.

Falisiɔ seelagbɛaa

(Mat 16.1-12)

11Ɔ̃ Falisiɔ mɔ̀ aalɛ lɛkpaakɛaanɔ, aalɛ likpalɛwà, aalɛ wɛɛlɛ aà seelakɛnɛ́ ń Lua gbãao. 12Ɔ̃ à wè fɛ̀ɛɛ à mɛ̀: Bɔyãi gbãgbɛ̃ɔ lɛ́ seela wɛɛlɛai? Sĩana malɛ oɛ́, má seelae kɛ gbãgbɛ̃ɔnɛo. 13Ɔ̃ à ń tó we, à ɛ̀a gɛ̃̀ go'ilɛna guu à tà baale.

14Pɛ̃ɛ kũsũa sɛa yã sã̀ aà iwaɔgu. Pɛ̃ɛ mɛndo mɛ́ gɔ̃̀nɛ́ gó guu. 15Ɔ̃ Yesu lɛdàmá à mɛ̀: Àɔ ku ń laaio. À laaika Falisiɔ ń Helodiɔ pɛ̃ɛsɛ'ɛsɛi. 16Ɔ̃ aalɛ okɔ̃ɛ aa mɛ̀: Kɛ́ wá pɛ̃ɛ vĩo yãi a òi màa. 17Yesu dɔ̃̀má, ɔ̃ à ń lá à mɛ̀: Bɔyãi álɛ o kɛ́ á pɛ̃ɛ vĩo yãiɛi? E tia á wɛ́ i kɛ̃ á dɔ̃̀oa? Á nɔ̀sɛ vĩoa? 18Á wɛ́ vĩ, ili gu'eoa? Á swã vĩ, ili yãmaoa? Yãe lí dɔáguoa?#Zel 5.21; Eze 12.2 19Kɛ́ ma pɛ̃ɛ mɛn sɔo ɛ̀'ɛ má kpà gbɛ̃ɔn ɔaasɔsɔo lɛɛ sɔoɔwa (5 000), a a miɔna sɛ̀lɛ gbi ũma ni? Aa wèwà aa mɛ̀: Gbi kuɛplaɛ.#Maa 6.43 20Yesu ɛ̀a à ń lá à mɛ̀: Kɛ́ ma pɛ̃ɛ mɛn sopla ɛ̀'ɛ má kpà gbɛ̃ɔn ɔaasɔsɔo lɛɛ siiɔ̃ɔwa (4 000), a a miɔna sɛ̀lɛ sɔ ũma ni? Aa wèwà aa mɛ̀: Sɔ soplaɛ.#Maa 8.8 21Ɔ̃ a ònɛ́: E tia á wɛ́ i kɛ̃oa?

Bɛsaida vĩ̀a gbãgbãa

22Kɛ́ aa kà Bɛsaida, ɔ̃ wà mɔ̀ɛ̀ ń vĩ̀ao, wà wabikɛ̀wà aà ɔkãwà. 23Ɔ̃ à vĩ̀api kũ̀ a ɔwa, à bɔ̀aanɔ wɛ̃nkpɛ. À lɛ'i kɛ̀ aà wɛ́wa à ɔnàwà, ɔ̃ à aà là à mɛ̀: Nlɛ gu'ea? 24Ɔ̃ gɔ̃ɛpi wɛsɛ̀ musu à mɛ̀: Malɛ gbɛ̃́ɔ e, aa dɛ lan líɔ mɛ́ aalɛ taa'o'owa. 25Ɔ̃ Yesu ɛ̀a à ɔnà aà wɛ́wa lɔ. Kɛ́ gɔ̃ɛpi a wɛ́ wɛ̃̀, ɔ̃ aà wɛ́ kɛ̃̀, àlɛ pɔpii e sa wasawasa. 26Ɔ̃ Yesu aà gbàɛ bɛ à mɛ̀: Nsu bɔlɛ wɛ̃lɛ guuo.

Piɛɛ Yesu Mɛsikɛ oa

(Mat 16.13-23; Luk 9.18-22)

27Kɛ́ Yesu lɛ́ gɛ́ ń a iwaɔ Sezale Filipi busu zɔ̃ɛwiaɔ guu, ɔ̃ à a iwaɔ là zɛ́ guu à mɛ̀: Dé wàlɛ o má dɛ a ũi? 28Aa wèwà aa mɛ̀: Gbɛ̃eɔ ì mɛ Zãa Da'ilɛnaɛ, gbɛ̃eɔ ì mɛ Ɛlia. Wì mɛ lɔ ãnabi yãaen n ũ.#Maa 6.14-15 29Ɔ̃ à ń lá à mɛ̀: Apiɔ sɔ̃, dé i mɛ má dɛ a ũi? Piɛɛ wèwà à mɛ̀: Mɛsin n ũ. 30Ɔ̃ Yesu ń lɛpàpa aasu o gbɛ̃e mao.

31Ɔ̃ à nà yãdaanɛ́wa à mɛ̀: Sema Gbɛ̃nazĩn Nɛ taasikɛ maamaa, gbɛ̃zɔ̃ɔɔ ń sa'onkiaɔ ń Mɔizi ikoyãdanɛdeɔ giaazi, wi aà dɛ, a gɔɔ aaɔ̃dezĩ i vu. 32À yãpi ònɛ́ wasawasaɛ, ɔ̃ Piɛɛ gɛ̀aanɔ gusaɛ, àlɛ gíɛ̀. 33Kɛ́ Yesu lìli à a iwaɔ gwà, ɔ̃ à gì Piɛɛɛ à mɛ̀: Gomɛɛ we Setãu! Lua laasoo lɛ́ dɔaanɛo, sema gbɛ̃nazĩna pɔ.

Gɔ̃a Yesu iwa ũ

(Mat 16.24-27; Luk 9.23-27)

34Bee gbɛa Yesu bila ń a iwaɔ kã̀aaazi, a ònɛ́: Tó gbɛ̃́ ye kɛ ma iwa ũ, aà gi azĩai, i a lipãakɔ̃a sɛ́, i tɛmazi. 35Gbɛ̃́ pɔ ye àɔ a wɛ̃ni kũa, a piliwaɛ. Gbɛ̃́ pɔ gì a wɛ̃nizi ma yãi ń ma baona yão lɔ, ade mɛ́ a zia e. 36Tó gbɛ̃́ gɔ̃̀ dũnia bṹu vĩ mɛ́ à kùa ziawa, bɔ́ ài bee vĩi? 37Bɔ́ gbɛ̃́ a fĩaboò à zia ei? 38Tó gbɛ̃́ zɛamanɔ ge ń ma yãɔ widɛ̀ gbãgbɛ̃ duunde luanaaikɛnsaiɔ guu, Gbɛ̃nazĩn Nɛ a zɛaaanɔ widɛ sɔ̃ɛ, gɔɔ pɔ a mɔ́ ń a Mae gawio ń a malaikaɔ.

Currently Selected:

Maa 8: Boo2024

Highlight

Copy