Maa 9

Yesu lia

(Mat 16.28–17.13; Luk 9.28-36)

1Ɔ̃ a ònɛ́: Sĩana malɛ oɛ́, gbɛ̃́ pɔ ku laeɔ gaga kia pɔ Lua kpà mɔa ń gbãao esaio.

2Gɔɔ soolo gbɛa Yesu Piɛɛ ń Zakio ń Zãao sɛ̀ dɛ̀dɛńnɔ gbɛsĩsĩ lɛsĩwa ntɛ̃ɛ. Ɔ̃ à lì ń wáa, 3aà pɔkasaɔ lɛ́ tɛkɛ puntaitai. Gbɛ̃e ku dũniau kɛ́ a fɔ̃ pɔpi à puakũ màao. 4Bee kpɛ Ɛlia ń Mɔizio bɔ̀ aa mɔ̀má, aalɛ yã'o ń Yesuo. 5Ɔ̃ Piɛɛ ò Yesuɛ: Dii, wá kua la maaɛ. Wà lakpɛ dɔ mɛn aaɔ̃, n pɔ do, Mɔizi pɔ do, Ɛlia pɔ do. 6A dɔ̃ lá álɛ oo, asa vĩa ń kṹ maamaaɛ. 7Luabɛpuana pìla à kùńla, ɔ̃ aa yã'oe mà a guu à mɛ̀: Gbɛ̃́ɛ beeá ma Nɛ mɛndona yenzideɛ, à aà yãma.#Maa 1.11; Iko 18.15 8Kãndo gɔ̃̀ɔ kɛ́ aa gugwàgwa, aai gbɛ̃e e lɔo, sema Yesu ado.

9Kɛ́ aalɛ pila gbɛsĩsĩpiwa, ɔ̃ Yesu ònɛ́ aasu yã pɔ aa èpi o gbɛ̃e mao e Gbɛ̃nazĩn Nɛ gɛ bɔò gau. 10Aa yãpi kũa, ɔ̃ aalɛ kɔ̃lala aa mɛ̀: Bɔa gau yã bee dɛa ni? 11Ɔ̃ aa aà là aa mɛ̀: Bɔyãi Mɔizi ikoyãdanɛdeɔ ì o Ɛlia mɛ́ a dɔaa mɔi?#Mal 3.23 12A wèmá à mɛ̀: Ɛlia a dɔaa mɔ́, i yãpii kɛkɛ zɛ́zɛ, ãma kɛ́ a kɛ̃a wà mɛ̀ wa saka Gbɛ̃nazĩn Nɛgu, i taasikɛ maamaa sɔ̃ bɛ?#Isa 53.1-12; Soũ 22.1-18 13Malɛ oɛ́, Ɛlia mɔ̀ kɔ̀, ɔ̃ wà ń pɔeã dàɛ̀ lá wa kɛ̃̀ aà yãmusuwa.

Yesu nɛgɔ̃ɛ tãade gbãgbãa

(Mat 17.14-23; Luk 9.37-45)

14Kɛ́ aa sù ń gbɛ̃kĩniɔwa, aa è bila liaańzi mɛ́ Mɔizi ikoyãdanɛdeɔ lɛ́ lɛkpaakɛńnɔ. 15Kɛ́ bila Yesu è, aà yã bɔ̀ ń saɛ, ɔ̃ aa baalɛ̀, aa gɛ̀ fɔkpàwà gɔ̃̀ɔ mpii. 16Ɔ̃ à a iwaɔ là à mɛ̀: Bɔ́ lɛkpaa álɛ kɛńnɔi? 17Ɔ̃ gbɛ̃́ pɔ ku zã guue wèwà à mɛ̀: Dii, ma mɔnɛ ń ma nɛoɛ, tãa mɛ́ à aà lɛ́na nàalɛ. 18Tó à dɛ̀dɛwà, ì aà nɛ zĩlɛɛ, ɔ̃ ìɔ lɛ'ifulabɔlɛ, ìɔ swaalɔlɔkɔ̃wa, ì gbãgbã tèlele. Ma mɔò n iwaɔnɛ aa tãapi go, ɔ̃ aa fùa. 19Ɔ̃ Yesu ònɛ́: Gbãgbɛ̃ luanaaikɛnsaiɔ, máɔ kuánɔ e bɔɛ ni? Máɔ mɛnakɛánɔ e bɔɛ ni? À mɔmɛɛ ń nɛpio la.

20Kɛ́ wà mɔ̀oɛ̀, kɛ́ tãapi Yesu è gɔ̃̀ɔ, ɔ̃ à nɛpi zĩ̀azĩa à aà pã̀lɛ zĩlɛ kpɛ̃baũ. Ɔ̃ àlɛ gbeembo, àlɛ lɛ'ifulabɔlɛ. 21Yesu nɛpi mae là à mɛ̀: Zaa kpeletaa à aà lè màai? A wèwà à mɛ̀: Za aà nɛfɛ̃nɛngɔɔɛ. 22Ìɔ aà zu tɛ́ ń ío guu mɔɔmɔɔɛ, ìɔ ye à aà dɛɛ. Tó ńyɔ̃ fɔ̃ ǹ pɔe kɛ, wá wɛ̃nagwa, ní dɔwálɛ. 23Yesu òɛ̀: N mɛ̀ tó má fɔ̃́ ló? Yãpii zɛ́ vĩ ma naaikɛnaɛ. 24Ɔ̃ nɛpi mae ò gɔ̃̀ɔ: Má n naai vĩ. Ǹ n naai pɔ lɛ́ kɛ̃sãa kãfĩmɛɛ. 25Kɛ́ Yesu è bila lɛ́ naɛmá, à gì tãapiɛ à mɛ̀: Tãa swãdo, malɛ onɛ, go nɛpiwa. Nsu ɛa ǹ suwà lɔo. 26Ɔ̃ tãapi wiilɛ̀, à aà zĩ̀a pãsĩpãsĩ, ɔ̃ à gòwà. Nɛpi gɔ̃̀ lan gɛwa, ɔ̃ gbɛ̃́ daside mɛ̀, à gàɛ. 27Ɔ̃ Yesu aà kũ̀ a ɔwa à aà fɛ̀lɛ, ɔ̃ à gɔ̃̀ zɛa.

28Kɛ́ Yesu gɛ̃̀ ua, zĩloe kuńnɔ lɔo, ɔ̃ aà iwaɔ aà là aa mɛ̀: Bɔyãi wa fua tãapi goi? 29Ɔ̃ a wèmá à mɛ̀: Wabikɛa ado mɛ́ ì fɔ̃ à tãa bee taa go.

30Kɛ́ aa bɔ̀ we, ɔ̃ aa pã̀ Galilea. Yesu ye wàɔ a kukĩi dɔ̃o, 31asa àlɛ yãdada a iwaɔnɛɛ. A ònɛ́: Wa Gbɛ̃nazĩn Nɛ kpamá, wi aà dɛ, i vu a gɔɔ aaɔ̃dezĩ. 32Aai aà yãpi mi dɔ̃o, mɛ́ aa yãpi laawà vĩakɛ̀.

Tɛa Yesuzi lan nɛɔwa

(Mat 18.1-9; Luk 9.46-50)

33Ɔ̃ aa kà Kapɛnaũ. Gɔɔ pɔ a ku bɛ, à a iwaɔ là à mɛ̀: Bɔ́ lɛkpaa álɛ kɛ zɛ́ guui? 34Aa nì kpãuu, asa zɛ́ guu aalɛ lɛkpaakɛ dɛnla yãmusuɛ. 35Ɔ̃ à zɔ̃̀lɛ à a gbɛ̃ɔn kuɛplapiɔ kã̀aa à mɛ̀: Tó gbɛ̃́ ye kɛ mide ũ, aàɔ kɛ̃sãa gbɛ̃piizi, i kɛ an baade pii dɔnlɛde ũ. 36Ɔ̃ à nɛ sɛ̀ a zɛ̀ ń aɛ, ɔ̃ à aà sɛ̀ a kpà a kuɛ a ònɛ́: 37Gbɛ̃́ pɔ nɛɛ beeɔ do dìlɛ ma iwakɛ yãi, ade ma dilɛɛ. Gbɛ̃́ pɔ ma dilɛ sɔ̃ i ma dilɛ madoo, à gbɛ̃́ pɔ ma zĩ dìlɛ sɔ̃ɛ.

38Ɔ̃ Zãa òɛ̀: Dii, wa gbɛ̃e è, àlɛ tãago ń n tɔ́o, ɔ̃ wá ye wà giɛ̀, asa wá gbɛ̃́ no. 39Ɔ̃ Yesu mɛ̀: Ásu giɛ̀o, asa gbɛ̃e a fɔ̃ dabudabukɛ ń ma tɔ́o, i ɛa à ma tɔbɛ̃ɛsi gɔ̃̀ɔo. 40Gbɛ̃́ pɔ i ibɛlɛsɛwanɔo, wá baakpɛɛɛ. 41Sĩana malɛ oɛ́, gbɛ̃́ pɔ á gba imia á dɛa Kilisi pɔ ũ yãi, ade a kua a aseawao.

42Tó gbɛ̃́ tò nɛ pɔ lɛ́ ma naaikɛɛ́ɔ do fù, a maa ń adeo yãa wà wisilɔgbɛ gbɛ̃̀nɛ dɔ aà nɔɛɛ, wi aà zu isiu. 43-44Tó n ɔ mɛ́ ì to ǹ fu, zɔ̃. Gɛ̃a aizãna guu kɔ̃̀ɔ ũ maa dɛ n taa tɛ́ gasai guu ń ɔ mɛn plaola. 45-46Tó n gbá mɛ́ ì to ǹ fu, zɔ̃. Gɛ̃a aizãna guu kɔ̃̀ɔ ũ maa dɛ wà n zu tɛ́ guu ń gbá mɛn plaola. 47Tó n wɛ́ mɛ́ ì to ǹ fu, bɔ. Gɛ̃a kpala pɔ Lua kpà guu wɛdode ũ maa dɛ wà n zu tɛ́ guu ń wɛ́ mɛn plaola. 48Wekĩi kɔɔbii lí laao, mɛ́ a tɛ́ lí gao.#Isa 66.24

49Wa tɛmɔ baadeɛ an kɛkɛa ń wisio ũ.#Lev 2.13 50Wisiá pɔ naɛ. Ãma tó wìsi í na sù tà, kpelewa wa kɛ à nakũ lɔi? À to wìsi àɔ ku á guu, íɔ na ń kɔ̃o.

Currently Selected:

Maa 9: Boo2024

Highlight

Copy