Zlr 40

Paslapta Yusufu ta suniha maliha ta ksa slna ga mgham

1Tahula tsa skwiha ya, ma sana fitik, ka ganatá maliha his ta ksa slna Firʼawna mghama Masar i mali ta ghəŋa skwa say, nda mali ta ghəŋa buradi ŋa mghama Masar ta dmaku, ta krughuvi ta mgham. 2Ka ɓasaftá Firʼawna ta ŋuɗuf ta ghəŋa tsa maliha ya, i mali ta ghəŋa skwa say, nda mali ta ghəŋa buradi ŋa mgham ya. 3Ka hamtá tsi ta həŋ da gamak ma həga ga mala gwal ta ngha mgham, ma tsa vli tsam lu ta Yusufu ya. 4Ka pghamtá tsa mali ta ghəŋa gwal ta ngha mgham ya ta həŋ ma dzva Yusufu ŋa maganata ni ta slna ta həŋ. Ka nzəɗavata həŋ ma gamak tsəɓakw fitik.

5Ka fanaghatá suni ta tsa mali ta ghəŋa skwa say, nda tsa mali ta ghəŋa buradi ŋa mghama Masar haham lu ta həŋ ma gamak ya, ka fanaghatá suni ta həŋ. Dər wa nda ŋa ni ma suni ta va tsa rviɗika turtuk ya. Tsa suni ya guli, kavghakavgha paslata ni. 6Ga sərɗək, ta lagha Yusufu da həŋ, sasgwama kuma taŋ. 7Ka ɗawaŋtá tsi da tsa maliha ta maganatá slna ta Firʼawna kawadaga nda tsi ma gamak, ma həga ga daŋahəga ni ya. « Nya kəl kuni ka nzata sasgwama gita na? » kaʼa nda həŋ. 8« Suni ta faŋnaghata his his, tsaw haɗ mndu ŋa paslaŋnapta wu, » ka həŋ. Ka Yusufu nda həŋ mantsa: « Lazglafta a dzaʼa paslay ra? Rusaɗifwa rusa ta tsa suna ghuni ya, » kaʼa.

9Ka rusaftá tsa mali ta ghəŋa skwa say ya ta ŋa ni ma suni ta Yusufu, kaʼa mantsa: « Ma suna ɗa na: Mamu sana fwa inabi ta kəma ɗa. 10Ta tsa fwa inabi ya, hkən zligama tida, dzafta tsa sləmaha ya, gi ka magaftá tsi ta vzlizla, gi ka pghaftá zuŋura yakwa inabi ka ndəhafta. 11Ma dzva ɗa, mamu leghwa Firʼawna, ka ɗagata yu ta tsa yakwa inabi ya ka ɗitsamtá yu ma tsa leghwa Firʼawna ya. Ka klaftá yu ta tsa leghwa ya ka fanamta ma dzvu ta Firʼawna, » kaʼa.

12Ka Yusufu nda tsi mantsa: « Wya paslatá tsa suna gha ya: Tsa zligamaha hkən ta tsa fwa inabi ya ná, fitik hkən ya. 13Ma tsa fitikha hkən ya, dzaʼa kapaghaf kapa Firʼawna, ŋa vraghamta ni ma slna gha, ŋa fanamta gha ma dzvu ta tsa leghwa ya ta Firʼawna, manda va ya si ta mag ka ghalya ma fitika nzakwa gha ma slna gha. 14Ama ma laghafta zɗaku ya, havap hava ka iʼi, kdəkkdək, mbəɗa mbəɗa ta gwaɗa ɗina ta iʼi da Firʼawna, ŋa klagipta ma na gamak na. 15Ghalagap ta haɗika la Hebru lu ta iʼi. Hadna guli, haɗ sana skwi maga yu prək ka famtá iʼi ma gamak wu, » kaʼa.

16Nghanata tsa mali ta ghəŋa buradi ŋa mgham ya, zɗa paslatá tsa suni ya, kaʼa nda Yusufu mantsa: « Wya ŋa ɗa guli. Ma tsa ŋa ɗa suni ya, mbaɗa yu ka kla tughba buradi ka ŋusliŋ hkən ta ghəŋa ɗa. 17Ma tsa tughba nda ta ghəŋ ya, mamu inda mndərga gatuha Firʼawna. Ama ka sagha zarakha za tsa gatuha ma tughba si ta ghəŋa ɗa ya, » kaʼa.

18Ka Yusufu nda tsi Mantsa: « Wya paslatá tsa suna gha ya. Tsa tughbaha hkən ya ná, fitik hkən ya. 19Ma tsa fitik hkən ya dzaʼa kapanaf kapa Firʼawna ta ghəŋa gha, ta vgha gha. Dzaʼa hbagagha hba lu ta fu, ŋa sagha zarakha da za sluʼa gha, » kaʼa.

20Tahula fitik hkən, ka skalu lu ta fitika yakwa Firʼawna, ka maganatá tsi ta skwa zay ta inda kwalvaha ni. Ta wa ira taŋ, ka kapanaftá tsi ta tsa mali ta ghəŋa gwal ta da skwa say, ka kapanaftá tsi guli ta mali ta ghəŋa gwal ta da buradi. 21Ka vranamtá tsi ta tsa mali ta ghəŋa skwa say ya da slna ni, ŋa fanamtá leghwa ma dzvu ni. 22Ka hbagatá tsi ta fu ta tsa mali ta ghəŋa gwal ta da buradi ya, manda ya paslanap Yusufu ta həŋ ya. 23Ama havap a tsa mali ta ghəŋa skwa say ya ka Yusufu wu, ka zanaptá tsi.

Currently Selected:

Zlr 40: xed

Highlight

Copy