Zlr 39

Nzakwa Yusufu ma Masar

1Tsa la Yismaghel ta kladaptá Yusufu da Masar ya kay, ka skwanaptá həŋ ta tsa Putifar mnda la Masar, zwira Firʼawna, mali ta ghəŋa gwal ta ngha həga ni. 2Kawadaga Yawe nda Yusufu, mamu tsəha tida. Ka nzaku tsi ma həga ga daŋahəga ni mnda la Masar. 3Kəʼa ka daŋahəga ni nghadapta ná, kawadaga Yawe nda tsi, inda skwi ta magaŋta tsi nda dzva ni ná, vlaŋ vla Yawe ta tsəha. 4Ka mutsaftá Yusufu ta zɗakatahuɗi da daŋahəga ni, ka klaftá Putifar ŋa maga slna ni, ka fatá tsi ka mali ta ghəŋa gwal ta maga slna ma həga ga taŋ, ka fanaghata tsi ta ghəŋa inda skwiha ni. 5Ka nzaku tsi daga ka yawu fanamta ni ta həga ni ma dzva ni, nda ya ta ghəŋa inda skwi ka ŋa ni ná, ta tfa wi Yawe ŋa həga tsa mnda la Masar ya ta ghəŋa gwaɗa ta Yusufu. Ka nzakw tfa wa Yawe ta ghəŋa inda skwiha ka ŋa ni, ma həga ga taŋ, nda ya ma vwahha tani. 6Tsaya tama kəl Putifar ka fanamtá inda skwa ni ma dzvu ta Yusufu, kawadaga nda tsi, haɗ sana skwi ta nghəglapta tsatsi ɗekɗek wu, ba za ɗafa ni kweŋkweŋ. Ɗina tsatá Yusufu, nda mbaza ma kuma guli.

Zbay markwa Putifar ta hanata nda Yusufu

7Tahula tsa, ma sana fitik, ka nghə markwa daŋahəga ni ta Yusufu nda ira mbəzləh, kaʼa nda tsi mantsa: « Hana hana nda iʼi, » kaʼa. 8Ka kwalaghutá tsi. Kaʼa nda markwa daŋahəga ni mantsa: « Iʼi kawadaga nda tsi, ta haɗ daŋahəga ɗa ta nghəglapta ka sana skwi ma həga ni wa. Inda skwiha ni ná, fiɗim fa ma dzva ɗa. 9Malaghu a tsatsi nda ga mgham ma na həga na ka iʼi wa. Haɗ sana skwi pyaf tsi ta iʼi wu, ba kagha, kabga markwa taŋ ka. Waká yu dzaʼa magatá mndərga tsa ma ghwaɗaka skwi, ka gatá dmaku ta wa ira Lazglafta? » kaʼa. 10Inda fitik, ka gɗata tsi ta gwaɗa tsa gwaɗa ya nda Yusufu, ama ka kwalaghutá tsi ta hanata nda tsi, ka nzata nda tsi.

11Ma sana fitik, ka lam tsi da həga da maga slna ni. Haɗ sanlaha ma gwal ga taŋ ma həga baɗ tsa fitik ya wa. 12Ka ksaftá tsa markwa Putifar ya ta Yusufu ta lguta ni, kaʼa nda tsi mantsa: « Sawi da hanata nda iʼi, » kaʼa. Ka zlanaŋtá Yusufu ta tsa lgut ya ma dzva ni, ka hwayagapta dzibil. 13Manda nghanata ni ta zlanaŋta ni ta lguta ni ma dzvu ka hwayaghuta dzibil, 14ka hagadamtá tsi ta gwal ga taŋ, kaʼa nda həŋ mantsa: « Nghawa ɓa, ka kləgamaghata lu ta mnda la Hebru ná, ŋa ghuɓasa u. Iʼi ndiɗis tsi, ŋa hanata nda iʼi, ama ka dzatá yu ta lawlaw. 15Na snay ni ta dzata ɗa ta lawlaw, ka zlaŋtá tsi ta lguta ni ta vata iʼi, ka hwayaghuta dzibil, » kaʼa. 16Ka fatá tsi ta tsa lguta Yusufu ya da tsi, ha ka vradaghata zəʼala taŋ dzagha. 17Ka mnanaftá tsi ta zəʼala taŋ, manda va tsa mnanaf tsi ta kwalvaha ya, kaʼa mantsa: « Tsəna vuʼa, mnda Hebru kləgamagha ka na, ta ndiɗista ŋa ghuɓasa iʼi. 18Ama ka klaŋtá yu ta lwi ka wahata, kəl tsi ka zlanavatá lguta ni ta vata iʼi, ka hwayaghuta dzibil, » kaʼa. 19Manda snanata daŋahəga ni ta tsa gwaɗa markwa taŋ ta mnanata kazlay na: « Tsaya skwi maga kwalva gha nda iʼi, » kəʼa ya, ka gufaftá ŋuɗufa ni katakata, 20ka ksaftá tsi ta Yusufu ka hamta ma gamak, ma vli ta hamta lu ta vuʼaha mgham. Ka nzakw Yusufu hada ma gamak. 21Kawadaga Yawe nda Yusufu, ka maranaŋtá tsi ta zɗakwa ni, ka vlaŋtá tsi ta zɗakatahuɗa ni ta wa ira mali ta ghəŋa gamak. 22Ka fanamtá tsa mali ta ghəŋa gamak ya, ma dzva Yusufu ta inda vuʼaha. Inda skwi ŋa magay hada ná, ta lab nda da tsatsi. 23Haɗ tsa mali ta ghəŋa tsa gamak ya ta nghəglapta ka tsa skwiha ta fanamta tsi ta Yusufu ma dzvu ya wu, kabga kawadaga Yawe nda tsi, ta vlaŋ vla Yawe ta katsaftá inda skwi ta mag tsi.

Currently Selected:

Zlr 39: xed

Highlight

Copy