Zlr 41

Paslanapta Yusufu ta suna Firʼawna

1Tahula vaku his, ka fanaghatá suni ta Firʼawna. Ka nghə tsi ná, ta sladu ta wa ghwa Nil. 2Ka nghaŋtá tsi ta slaha nda uwasla nda uwasla ndəfáŋ ɗin ka nghay, ta sabi ma tsa ghwa Nil ya, ka za kuzuŋ ta wa sgam. 3Tahula tsaha ya, ka sab sanlaha ma slaha ndəfáŋ, kul ɗinaku nghay, nda saha nda saha ma va tsa ghwa ya ka lagha slanaghatá tsaha taŋtaŋ ya ta wa sgam. 4Lagha tsa slaha kul ɗinaku nghay nda saha nda saha ya, ka zavatá tsa slaha nda uwasla nda uwasla, ɗina ka nghay ya kay, ma tsa fitik ya, ka sliʼaftá Firʼawna.

5Ka dzəglatá hani, ka fəglanaghatá suni ka mahis. Ma tsa suna ni ya, ka nghaŋtá tsi ta ghəŋa alkama ndəfáŋ, nda uwasla, ɗina ta dzuslu ta slka ni turtuk. 6Ka nghaŋtá tsi guli ta ghəŋha miɗiɗa ndəfáŋ, ghwaliŋ falaka silwa, ta ɗyafta tahula tsaha taŋtaŋ ya. 7Ka ndandutá tsaha miɗiɗa ya ta tsaha nda uwasla nda uwasla, ɗina ɗina ya kay. Ka sliʼaftá Firʼawna, kəʼa kəʼa ná, suni ya ta fanaghata.

8Tsaɗata vli, ta ndan Firʼawna. Ka hagaktá tsi ta inda ɗəghaha ni, nda inda gwal nda ɗifil ma ghəŋa taŋ ma Masar. Ka rusanaftá tsi ta həŋ ta tsa suniha ni ya. Sew haɗ mndu ta laviŋta paslanaptá tsa suniha ni ya wa. 9Ka tsa mali ta ghəŋa skwa say ya nda Firʼawna mantsa: « Ta havak hava yu gita ta dmakuha ɗa ya maga yu ghalya. 10Ma sana fitik, ka gufaftá ŋuɗufa Firʼawna ta ghəŋa kwalvaha ni, ka hamtá tsi ta aŋni ma gamak ga mali ta ghəŋa gwal ta ngha mgham, iʼi nda mali ta ghəŋa buradi. 11Ka faŋnaghatá suni his his ta va tsa rviɗika turtuk ya, tsa suna ŋni ya guli kavghakavgha paslata ni. 12Ma tsa vli ya mamu sana duhwal la Hebru kawadaga nda aŋni, ta nzakway ka vuʼa mali ta ghəŋa gwal ta ngha mgham. Ka rusanaftá ŋni ta tsa suna ŋni ya, ka paslanaptá tsi ta dər wa ta klaŋta ghəŋa suna ni. 13Ka lutá tsi manda va tsa paslaŋnap tsi ya. Ka vriɗimtá lu da slna ɗa, ka hagatá lu ta tsa sani ya, » kaʼa.

14Ka ghunaftá Firʼawna ta mndu ŋa hgakta Yusufu. Ka kligiŋtá lu misimmisim ma gamak. Ka htsinistá lu ta swidi, mbəɗanapha lu ta lgut, ka lagha tsi ta kəma mgham. 15Ka tsatsi nda Yusufu mantsa: « Mamu suni ta faɗighata, sew haɗ mndu ŋa pasliɗipta wu, ka snaŋtá yu kazlay na ka rusaghaf rusa lu ta suni ná, ta paslay kagha ka həŋ, » kaʼa. 16Ka Yusufu nda Firʼawna mantsa: « Iʼi a wu, Lazglafta ya dzaʼa mnanatá Firʼawna ta klaŋta ghəŋa ni manda ya ta zɗəganata, » kaʼa.

17Ka Firʼawna nda Yusufu mantsa: « Ma tsa suna ɗa ya ná, ta sladu yu ta wa Nil, 18ma tsa ghwa ya ka sab slaha ndəfáŋ, nda uwasla nda uwasla, ɗina ɗina ka nghay, ka za kuzuŋ ta wa sgam. 19Tahula tsa, ka sab sana slaha ndəfáŋ nda saha nda saha ɗina a həŋ ka nghay wa. Ta ngha a yu ta slaha mantsa ya sahatá həŋ ta na haɗika Masar na wa. 20Lagha tsa slaha nda saha kul ɗinaku nghay ya kay, ka zavatá ta tsaha taŋtaŋ nda uwasla nda uwasla ya kay. 21Tahula ndandaghatá taŋ da huɗi, sna a lu kazlay mamu skwi ndagha həŋ kəʼa wu, ka nzaku həŋ ta manda va tsa sahatá həŋ ya, ka sliʼaftá yu. 22Ka nghaŋtá yu guli ma suna ɗa, ta pghatá ghəŋa alkama ndəfáŋ ta dzuslafta ta ya turtuk, ghərmbəts ghərmbəts ɗina ɗina. 23Ka nghaŋtá yu ta ghəŋha alkama ndəfáŋ guli ka ksubaŋ, sriɓiɓ, nda taʼuwa da falaka silwa. 24Ka ndandutá tsaha sriɓiɓ ya kay ta tsaha ndəfáŋ ghərmbəts ghərmbəts ya. Ka rusanaftá yu ta ɗəghaha ɗa, ama haɗ mndu dər turtuk ta laviŋtá paslapta wa, » kaʼa.

25Ka Yusufu nda Firʼawna mantsa: « Tsa suniha Firʼawna his his ya ná, ka skwa turtuk klatá ghəŋa ni. Ta mna mna Lazglafta ta Firʼawna ta skwi dzaʼa tsi magay. 26Tsa slaha ndəfáŋ ɗina ɗina ya ná, vakuha ndəfáŋ ya. Tsa ghəŋa alkama ndəfáŋ ɗina ɗina ya guli ná, vakuha ndəfáŋ ya. Ka skwa turtuk tsa suniha ya. 27Tsa slaha ndəfáŋ nda saha nda saha kul ɗinaku ka ngha ta sabi tahula tsaha ya guli ná, vakuha ndəfáŋ ya. Tsa ghəŋa alkama ndəfáŋ nda taʼuwa, nda ghwala hsaw da falaka silwa ya guli ná, vakuha ndəfáŋ ya, dzaʼa lu zay ma maya ya. 28Gwaɗa ta mnanata yu ta Firʼawna ná, maranaŋ mara Lazglafta ta Firʼawna ta skwi dzaʼa tsi da magay. 29Tsa vakuha ndəfáŋ ta sagha ya ná, dzaʼa mamu skwa zay nda hasla ka malaghutá mbraku ma inda haɗika Masar. 30Tahula tsa, ŋa zəglatá vaku ndəfáŋ ma maya. Haɗ lu dzaʼa havəglaktá inda tsa skwa zay nda hasla ka malaghutá mbraku ta haɗika Masar ya kay wa. Dzaʼa zaɗana zaɗa maya ta mnduha ta haɗik. 31Snəglaŋta a lu kazlay si nda hasla skwa zay ka malaghutá mbraku ta haɗik kəʼa wu, kabga dzaʼa furtu furta tsa maya ya katakata. 32Ka si fanagha fa tsa suni ya ta Firʼawna his səla katsi, nda nza ka skwi ya kura kura Lazglafta ta magay, dzaʼa maga maga misimmisim. 33Ndanana tama, ka zbaf zba Firʼawna ta mndu nda sna ta skwi nda ɗifil ma ghəŋa ni, ka fanamta tsi ta haɗika Masar ma dzva ni. 34Ka fa fa Firʼawna guli ta gwal tska skwi turtuk ma dgata ni hutaf ma skwi ya tska mndu ta haɗika Masar, ma tsa vakuha ndəfáŋ hasla skwa zay ka malaghutá mbraku ya. 35Ka tskanata həŋ ta inda nimaya ma na vakuha ndəfáŋ ta sagha na. Ka tskamtá həŋ ta alkama ma guvurha ma luwaha, mista ga mghama Firʼawna ŋa nzulay. 36Tsa nimaya ya, dzaʼa nzulay lu ŋa zay ma tsa vakuha ndəfáŋ dzaʼa sagha maya ta haɗika Masar ya. Mantsa tama, haɗ maya dzaʼa zaɗanatá haɗika wu, » kaʼa.

Nzakwa Yusufu ka guvna ta haɗika Masar

37Ka zɗəganatá tsa gwaɗaha ya ta Firʼawna nda inda kwalvaha ni tani. 38Ka Firʼawna nda kwalvaha ni mantsa: « Nana mndu na ná, nda ndəgha nda Sulkuma Lazglafta, dzaʼa mutsəglaf mutsa mu ta mndu manda tsatsi ra? » kaʼa. 39Ka Firʼawna nda Yusufu mantsa: « Manda ya maraghaŋ Lazglafta ta inda tsa skwiha ya, ta haɗ sana mndu taɓta kagha nda ghunislak, nda ɗifil ma ghəŋa ni wa. 40Kagha dzaʼa faghamta yu ta həga ɗa ma dzva gha. Da kagha dzaʼa sna inda mnduha ma dzva ɗa ta gwaɗa. Ba nda dughurukwa ga mghama ɗa kweŋkweŋ dzaʼa malaghuta yu ta kagha. 41Wana yu ta faghamtá inda haɗika Masar ma dzva gha, » ka Firʼawna nda Yusufu. 42Ka klatá Firʼawna ta halagar ta dzva ni, ka fanafta ta dzvu ta Yusufu, ka suɗanavatá liŋ kulefeɗ, hbanamha ta miziɗikwa dasu ma lwi. 43Tahula tsa, ka nzanamtá tsi ma mahisa mwata plis mista ŋa ni. Ka hlə lu ta wi ta kəma ni: « Tsawa tvi! Tsawa tvi! » ka lu. Mantsa ya fanamta Firʼawna ma dzvu ta inda haɗik Masar.

44Ka Firʼawna nda Yusufu guli mantsa: « Iʼi ná, Firʼawna yu. Ama, yaha sana mndu dzaʼa kapaŋtá dər dzva ni dər səla ni ta inda haɗika Masar, ka kagha a ta vlaŋtá tvi wu, » kaʼa. 45Tahula tsa, ka tsanaftá Firʼawna ta hgu ta Yusufu ka Safnatpaghneh. Vlaŋha ŋa markwa taŋ ta Asnat makwa Pwatifera, mnda dra skwi ŋa lazglafta ma luwa Una. Ka sliʼaftá Yusufu ka laghu da wanaftá haɗika Masar.

46Hkən mbsak ima Yusufu ta kladaghatá lu ta kəma Firʼawna mghama Masar. Ka sliʼaftá Yusufu ta kəma Firʼawna ka laghu da ranaftá haɗika Masar. 47Ma tsa vakuha ndəfáŋ nda hasla skwa zay ka malaghutá mbraku ya, ka magaftá nimaya ta haɗik ka fərtuta katakata. 48Ka tsakaktá Yusufu ta inda skwa zay ma tsa vaku ndəfáŋ ya ma haɗika Masar, ka paghamta ma guvurha ma inda luwa ta nimaya tsakak lu ma vwahha ta wanaftá inda luwa. 49Ka tsakanatá Yusufu ta alkama manda wutak ta wa drəf, furtu furta katakata ha ka zlanatá lu ta mbəɗay kabga mbəɗava a wa.

Zwana Yusufu

50Ma kɗaku tsa vakwa maya ya ka sagha, yana ya Asnat makwa Pwatifera mnda dra skwi ŋa lazglafta ma luwa Una ta zwana zgwana his ta Yusufu. 51Ka tsanaftá Yusufu ta hga zumala ni ka Mənase#41:51 Mənase nda gwaɗa Hebru na tsaya zanapta., « Lazglafta ta magata kəl yu ka zanaptá inda ghuya ɗaŋwa ɗa, nda inda la ga da ɗa, » kaʼa. 52Ka tsanaftá tsi ta hgu ta mahisa ni ka Ifrayim#41:52 Ifrayim nda gwaɗa Hebru na tsaya vliha vla Lazglafta ta zwani., kaʼa mantsa: « Vliha vla Lazglafta ta zwani ma na haɗika ghuya ɗaŋwa ɗa na, » kaʼa.

Slata maya

53Ka kɗaghutá tsa vakwa ndəfáŋ haslu nimaya ta fərtuta katakata ta haɗika Masar ya. 54Ka zlraftá tsa vakwa ndəfáŋ ŋa maya ya, manda va ya mna Yusufu. Ka slata maya ta inda haɗikha, ama ma inda haɗika Masar yeya skwa zay. 55Ka zlraftá maya ta dza mnduha ta haɗika Masar. Ka taw mnduha ta taw ka ɗawa skwi ŋa zay da Firʼawna. Kaʼa Firʼawna nda inda la Masar mantsa: « Lawa slanaghatá Yusufu, ka maga kuni ta skwi dzaʼa mnaghunata tsi, » kaʼa. 56Ma fitika tutá tsa maya ya ta tsa haɗik ya, ka gwananaftá Yusufu ta guvur ma inda vli pagham lu ta zimi, ka dzawanaptá tsi ta alkama ta la Masar. Ka sgaku maya nda sga ta haɗika Masar. 57Ka sliʼaftá mnduha ta inda haɗikha, ka sliʼadaghata da Masar slanaghatá Yusufu, ŋa skwa a ta alkama, kabga ta kəbakw nda kəba tsa maya ya ta ghəŋa haɗik demdem.

Currently Selected:

Zlr 41: xed

Highlight

Copy