SOOLLA 104
104
Ŋga sa ma li tlena belna
1An gi deɓ maŋ Bu Suuna.
Yawe, Loonna, aŋ dlaŋ ŋgol cocoo.
Aŋŋi sa ma bibiŋil ma dlam ŋgolna,
2kiɗikka cuki egeŋ ko ndal barawna na,
huulona ni ko ziiŋŋa na.
3Nam cuk ziim kay mbo ma kolona,
ɗugulla ni ko pus pus mamma na,
nam tuɗ kolo kay garaŋ semeɗna.
4Nam mbuɗ babaana ni suu sun mamsina,
sin kura ni vara ka sunumba.#Heb. 1.7
5Nam min ndaŋgara eŋ cocoo,
ndaɗ ka coli tew tew ka geŋeɗɗi.
6Aŋ ŋguyuɗ ki u mbo lum ma ŋgolna
ko baraw ma taɗna na.
Mbona kak kolo kay ɦinira lay.
7Hu li ma aŋ ɓakamma nam yow liŋa,
hu li ma aŋ bayna nam ŋgay tamu.
8Ɓaɗ ay ki ga kay ɦinira,
tuɗ hu li ma aŋ ŋgaɓamma a nam tuɗ huna.
9Li ma aŋ min a mbona tok ki huna,
nam tuɗ ni hu may
kay nam li ki kay yam ndaŋgara halaŋgi.
10Aŋ law yo ma jivina ay hu goloŋina
mbona ka ɓaɗ duk ɦinira.
11Tlesuu ŋgoo bagina halaŋ ka ciya,
kor suu bagina halaŋ ka ci lay.
12Tok eg mbona laygi suu pii kolona ka lakiya,
asi ka gi soolla kolo hum ŋgusugina.
13Aŋ hu li ma aŋ ay kaki huna,
aŋ ka ɦal mbona maŋ ɦinira.
Ndaŋgara hoɓi u tlesuu aŋ lasina.
14Aŋ day usuna kolo maŋ yoorina,
wa ma sana horokomma ka fi tiimma hu may.
15Sum veŋŋa#104.15 sum veŋŋa vin. ka furi huu suu warna,
mbulna ka lasi ti ma jivina.
Funa kay a ɦasi saɓakŋa may.
16Ŋgusi suu vi Yawena
ka hoɓ u yona tew tew,
gu ma yam ana sedre ma hu Libanna,
nam zaaram ha ni namu.
17Hu li namma laygina min ziisi huwa,
jalyamba buu hu ŋgus ma yam ana siprena#104.17 siprena cypres..
18Ҥuraboyna buu ni kay ɦinira fiyekka koloo,
murgumma buu ni ga duk gogoyra may.
19Nam col tilna kolo a ŋga buu ma luuna,
faɗta a ŋga lerra may.
20Aŋ tin ndufunda may, ni njeŋgera,
tle bagi suu ay duk gugunina na
cuk ki kiɗik halaŋ.
21Dlona vi va wa ni nam gi ŋgoɓpa,
asi joɓ tiisina ni ko Lona may.
22Lina fo ki wa ni asi ŋgay tasi halaŋ,
asi tuɗ buu ki hu zulusiya.
23Sana tuɗ hu sun mamba may,
tuɗ hu li ma horokŋa ta ta tew fiɗigira.
24Yawe sun maŋga ndaɗ bolow cocoo,
aŋ laɗ halaŋŋi u yalna,
tlesuu kay ndaŋgarana halaŋ aŋ lasi ni aŋu.
25Gola mbo lumma hayam ŋgol cocoo,
vabakgina u yoorina ka tuɗ zeɗ zeɗ ka ndumbi,
suu ŋgolona u suu gorina lay.
26Lum kawina ka tuɗa, hoŋ ay lay,
aŋ li kuluf ŋgolna a luu u namba lay.#Job 40.25; Soo. 74.14; Eza. 27.1
27Tle asina halaŋ ka ni kaŋ aŋ dew,
aŋ ka ɦasi tiisina u voɗom halaŋ,
28aŋ ɦalla, asi yo wa,
aŋ mal koŋ kiyo, asi hoɓa.
29Aŋ ŋgay taŋ ki wa ni, asi halaŋ mbuɗ ndaana,
aŋ tlasi musuk masina, asi miɗa,
hoŋ ga duk ndaŋgara.
30Aŋ lasi ni u musuk maŋga,
aŋ hoŋ mbuɗ ndaŋgara ki wiliya.
31Ko bibiŋilla vi Yawera li ha na gak gak,
ko Yawe furi kay sunda nam laɗta.
32Nam gol ndaŋgara na ni ndaɗ dlaka,
nam ŋgen ɦinira wa ni ndaɗ ŋgal kiyo.
33Hu iiri manda halaŋ an geleɗ Yawe,
buu man ma hin kay ndaŋgarana halaŋ
an luu ni maŋ Lo manna.
34Ko sool manda li irim jiviya,
ko Yawe van furi manda.
35Ko suu li dla cora viɗ ki kay ndaŋgara,
ko suu ka ɗegeeɗina li hu duliyara oloɗi.
An gi deɓ maŋ Yawe cocoo.
Halleluya.
Currently Selected:
SOOLLA 104: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
