SOOLLA 105
105
Lona u suu mam suu Israelna
(Ɓer. SOOLLA 105.1-15; 1 DLAŊ MULINARA 16.8-22)
1Ŋgaagi Yawe, dagi ki kay semu,
takam dlaamba ha ki duk suuna.
2Gagi soolla geleɗemba, luurugi fokomu,
di ki kay dlaamba mbuɗ mbuɗta.
3Lagi furira kay sem ma teteɗna,
agi suu hal Yawena furiyugiya.
4Halagi Yawe u saɓak mamma,
halagi li ma nam ka huna tew tew.
5Humugi gagi kay dlara mbuɗta nam laɗta,
takka u ɓak ma kal ay ki funumma,
6agi njaf Abraham saam ma sunda,
agi goryoŋ Yakob suu nam managina.
7Yawe nammi Looygina,
nam ti kay yam ndaŋgara halaŋ.
8Nam ka gi humba kay galam mamba tew tew,
gaɗ mamba ha ni kay njaf suuna fok na gak gak.
9Ni galamba nam vaɗ ay u Abraham dayra,
hin suu tam fok Isaak na olo.#Ura 12.7; 17.8; 26.3
10Nam njun galamba din dinda u Yakob,
galam ndaɗta ni kay suu Israelna a fafaɗta,#Ura 28.13
11hu li ma nam di ana,
«An ɦaŋ ndaŋgara Kanaanda,
ndaɗ hin ki ni a mbas maŋga»
12Hu li namma ni suu Israelna ka zuli ŋgolɗi,
asi cuki hu li ma namma ni a ŋgayagina.
13Asi poy kay yam mbassa ni na cow cow,
tuɗ vi mulina na zeɗ zeɗ.
14Lona ka hin sa a ŋgenem suu mamsinaɗi,
nam gaɗ muli suu lasasina,#Ura 20.3-7
15«Ŋgenegi suu man suu Lona fuurusinaɗi,
lagi dla co eg suu jok vun Lonaɗi.»
16Nam gi may ŋgolla kay suuna,
nam yowosi tlesuu tira ki kasiya.#Ura 41.53-57
17Nam sunusi sa ma ha ki fokosi dew,
ni Yosef ma asi gusum ha ki ko mbaɓuna nana.#Ura 37.28; 45.5
18Asi cukum kinjiŋŋa semu,
cukum galina kelem may,#Ura 39.20—40.23
19ta ta tew hu li ma ŋgaama
boy ma vi Yawena tukumu.
20Mulna hal voɗta ana buɗum kiyo,
mul ma kay suunana buɗum ki wa.#Ura 41.14
21Nam kakam a ŋgolla kay ziimma,
a ŋgolla kay tlegeyem suu vona halaŋ.#Ura 41.39-41
22Ҥam saɓakŋa a gaɗ suu vona halaŋ,
nam haɗ suu ŋgolo suu kaɓakŋa lay.
23Suu Israelna tuɗ ha ki hu Egipte.
Yakob mbee ha ki hu mbassa vi goryoŋ Kamma.#Ura 46.6; 47.11
24Lona zul suu mamsina cocoo,
asi mbuɗ saɓak a su suu babali masisina.#Kal. 1.7-14
25Nam mbuɗ huu suu Egiptena co eg suu mamsina,
asi gijaŋ lasasi cocoo.
26Nam sun saam ma sunda, Moiz,
u Aaron, sa nam manamma haa.#Kal. 3.1—4.17
27Boy masina mbaa takka hu Egipte cocoo,
dlara mbuɗta vi Lonara li hu mbassa vi Kamba.
28Nam sun ndufunda aya, ndaɗ mba may,
kay suu Egiptena humum boy mamma kaɗi.#Kal. 10.21-23
29Nam mbuɗ mbona ki busuna,
ci kulufna ki duk mbona halaŋ.#Kal. 7.17-21
30Mbas masira oy ki u luu gigidina halaŋ,
ta ta hu zira buuna vi muli masina lay.#Kal. 7.26—8.2
31Nam ɓak u vunum na ni
lolona u furutna oy ki hu mbas masira.#Kal. 8.12-13,16-20
32Nam si dlaŋmagina ay kasi ko mbona na,
kura si ay ga hu mbas masira.#Kal. 9.22-25
33Nam casi gu gugutlu masira u gu tulumma kiyo,
bowosi ŋgusugi suu hu mbas masirana ki gaa.
34Nam cukusi baa jeena ki hu mbas masira,
njonjoŋŋa ka ndumbi.#Kal. 10.12-15
35Asi ti tlesuu hu senenana ki halaŋ halaŋ,
tlesuu vuɗna asi tasi ki bel bel.
36Ci gor suu vuɗ jew suu hu mbas ndaɗtana ki halaŋ, ni goryosi suu vuɗ jewna.#Kal. 12.29
37Nam cuk suu mamsina ay ki
u gursura u lorra kosiya.
Asi halaŋ cuk ay ki jiviya,
va ŋgen sa ka usiɗi.#Kal. 12.33-36
38Suu Egiptena furi kay asi cuk kira,
kay asi mbuɗ ki ndaa kosi cocoo.
39Nam baarasi ɗugulla kasi ko ndal gojolina na,
njeŋge ni nam tinisi kura kolo kasiya.#Kal. 13.21-22
40Hu li ma asi joɓomma,
nam cukusi cekera ay a komba,
nam hoɓosi u fu ma col ay kolo huulona.#Kal. 16.2-15
41Nam co duk ɦinira ɦasi yona a cira,
mbona ɓaɗ ay ki hu ko mbo lumma na.#Kal. 17.1-7; Ndu. 20.2-13
42Humum gam kay boy mam ma teteɗna
ma nam dam maŋ Abraham, saam ma sundana.
43Nam cuk suu mamsina ay ki u furira,
suu nam manasina tuɗ u soolla ayra irisiya.
44Nam ɦasi mbassa vi suu daŋara kiyo,
asi ti ni vuɗ tlesuu suuna lasi kana.#Jos. 11.16-23
45Ni ana asi ŋgomom gaɗ mamba na gak gak may,
asi li u gaɗ mamba. Halleluya.
Currently Selected:
SOOLLA 105: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
