SOOLLA 103
103
Ŋga Lona kay min mamba
1Soolla vi David.
An gi deɓ maŋ Yawe,
an ŋgaam sem ma teteɗna coco u hurun halaŋ.
2An gi deɓ maŋ Yawe,
humun ka maa kay jivira nam landaraɗi.
3Nam bulumuŋ cooŋga ki halaŋ,
nam garaɗaŋ tuguɗiira laŋga ki lay.
4Nam suɗuŋ musuk maŋga ay ki hu li ma ba kina,
nam baaraŋ u min mamba u ɗegeera.
5Nam mbuɗuŋ saɓak hu maa maŋga,
nam hoŋoŋ ki gooro, saɓak ko ndal bakŋa na.
6Yawe li dlaamba ni u ɗegeera
Nam ka kaɓak ma jivina kay suu ka lasna.
7Nam tak voɗ mamba ka maŋ Moiz,
tak sunda ŋgolora duk suu Israelna.
8Yawe ni sa ma wi hahaw suuna u minda,
nam ka mbuɗ ya na zakgi,
nammi sa ma ɗegeena.#Jak 5.11
9Nam ka tuɗ fok u gaɗta gaɗ sana na ta taɗi,
ka vi ya hurumbi lay.
10Nam ka lay kay cooyra gasiɗi,
nam ka hoŋ cora u coraɗi lay.
11Ko huulona ka kolo day kay ndaŋgara,
ɗegee mamba su ki kay
suu lam ndaaramma ni na may.
12Ko u maɗiina ha ki day eg u fiɗigina,
nam cukuygi cooygira ha ki egeygi day
ni na may.
13Ko buna min goryomba na,
Yawe min suu lam ndaaramma ni na may.
14Kay nam wi va ma nam laygi u namma,
nam wi ana aygi ni gugum ndaŋgara ɦawaa.
15Sana, buu mamma ni ko ndal usuna na,
nam ɓo ni ko tlena ɓo hu senenara na,
16hu li ma semeɗna siirimma ni
nam yak ki gaw.
Li ma nam li day huna, sa ka wam oloɗi.
17Na may ɗegeera vi Yawera ka ni
tew tew a fafaɗta,
ndaɗ ka kay suu lam ndaaramma,
ɗegee mamba ka ni kay njaf suuna u goryosiya,
18kay suu may suu li u galam mambana,
suu saa a li u gaɗ mambana.
19Yawe tin dlam mamba mulla ka kolo huulona,
mul mamba ti kay suuna halaŋ.
20Gagi deɓpa maŋ Yawe,
agi suu sunda huulona,
agi gorzoŋi mamsina, lagi u min mamba.
juɓugi ni boy ma nam damma.
21Gagi deɓpa maŋ Yawe, agi suu duu mamsina,
agi suu sunum suu ka li u min mambana.
22Gagi deɓpa Yawe
agi tlesuu nam lagina halaŋ,
hu li ma nam ka ti mulla kamma halaŋ
an gi deɓ maŋ Yawe.
Currently Selected:
SOOLLA 103: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
