SOOLLA 102
102
Cenda vi sa ma ka lasna
1Cenda vi sa ma ka lasna tii tam fok Yawe.
2Yawe, humun cen manda,
ko wal manda tew ay ta ta egeŋu.
3Ŋgay taŋ ki irinɗi,
hu li ma an ka lasna, tin humuŋ ay humunu.
Buu ma an ka yaŋŋa aŋ humun ay zak.
4Kay buu manna jak ki ni ko ndoosna na,
sokon ŋgalan ha ki ko kura na.
5Ko usu ma ki kaayna na, mukulun ki sooya,
humun maa ki kay fu ma an tamma lay.
6An ka oy cocoo, bakan hin cuki kay
sokŋa ni ndaɗ ɦawaa.
7An mbuɗ ni ko laygi suu bagina na,
ni ko hik ma ŋgoo bagina na.
8An buu ni ka buu senɗi,
ni ko lay ma kaki kolo kay yam zira
vay damma na.
9Hu buuna halaŋ suu babali mansina ka ŋgulunu,
hurusi co egen halaŋ.
Asi yan dlaanda kay suuna ko fulna na.
10An ti a fuuna ni buɗna,
mbo ma an camma tlumi u simina.
11U huruŋ ma ɓeŋ kina,
aŋ tlan kolo van kaŋga wa.
12Buu manna tuɗ ko ndal ŋgusna na,
an so ki ko ndal usuna na.
13Na may aŋ, Yawe, ka tew tew,
basara basara halaŋ ka tak ki kaŋu.
14U min maŋga aŋ col kolo kay Siyon,
kay buuna ndak wa a aŋ waɗ hahawaɗta,
na daŋ may lina ndak wa.
15Ami suu sun maŋsina minni ɦini ndaɗta,
gugum ma ay kaɗna cuk kami
wami hahawamiya.
16Njaf suuna halaŋ hin li ndaa Yawe,
muli suu kay ndaŋgarana halaŋ
waŋ bibiŋil maŋga.
17Hu li ma Yawe hoŋ min Siyon kolo wa,
asi hin wam ki hu bibiŋil mamba.
18Nam mbuɗ irim hum cenda vi suu hahawra,
nam ka hinisi cen masira kiɗi.
19Ko boy namma li ka ɓiiri maŋ njafagi
ma ka daganna,
a suu hin ka daganna hin ŋga Yawe may.
20Ay kolo hu Ziim ma Teteɗna Yawe gi yam
ay ga gol suu ka kay ndaŋgarana,
21nam ka hum zamba vi suu daŋgayna,
cuk suu ɓakŋa kaay kasi a casi kina kiyo.
22Asi hin di sem Yawe ki hu Siyon,
suuna hin ŋgaam hu zi ma Yerusalemma,
23hu li ma suuna u mulla tok ki u tasi
a sun Yawena.
24Nam hoŋon saɓak manna ki dagani,
nam dagaran buu man ma kay ndaŋgarana ki lay.
25An di ana, «Loonna, tlan iiri manda
duk bay buu manna ndaki.»
Kay aŋŋi sa ma ka din dinna.
26Ay fok jew dayra aŋ min ndaŋgara,
huulona ni sunda aŋ laɗta.#Heb. 1.10-12
27Asi hin ɓeŋ kiyo, aŋ taŋga ka ni na gak gak.
Asi ɓeŋ ki ko ndal barawna na,
aŋ mbuɗusi ko ndal barawna na,
asi hin hiniŋ lina maŋ halaŋ.
28Gola aŋŋi na, basa maŋga ka daɓbi.
29Goryoŋ suu sun maŋsinana
hin yow kolo balamasiya,
njafasi hin hin ka fokoŋ na gak gak.
Currently Selected:
SOOLLA 102: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
