VUN ŊGOLNA 9
9
Yalna ka yi ay koloo
1Yalna min ziiɗta wa,
nam li garak ma dukŋa na kiɗisiya.
2Nam ŋgaɗ yoorina,
nam li sum veŋŋa,
min tlena ki kay tabulla halaŋ.
3Nam sun suu maɗ suu li sunda,
nam yi kolo eŋga hu ɦoŋzi ma ŋgolna di ana,
4«Agi gegelay ma ka wi dlaɗina mbay tani.»
Nam ka yi ni suu giniŋŋa.
5«Mbaagi aya tagi kay tabul manda,
cagi sum veŋ ma an lamma may.
6Hinigi suu ka wi vaɗina ha kiyo,
ni agi hin lak iiriya.
Tlagi voɗ mayra nera ka tuɗ huruɗta.»
Sa ma wi dlara u sa ma ŋga tamma
7Sa ma gaɗ sa ŋga tam kay coombana
ni nam tinim irim kiyo.
Sa ma gaɗ sa hurum cona ni fi ŋgulla cocoo.
8Di sa ma ŋga tamma kay coombaɗi nam tiniŋ iriŋ kiyo.
May gaɗ sa ma wi dlara nam hin miniŋŋi min ii na ɗow.
9Va ma aŋ dam maŋ sa wi dlara
ɦuɗummi wiimba fok na ɗow.
Nera aŋ daɗ maŋ sa ma yalnara
jokom wiimba ha ni fok na ɗow.
10Ndaa ma lam u Yawena ni gijaŋŋa vi yalna gaw.
Nera ni haɗta ŋgolla vi suu teteɗna.#Job 28.28; Soo. 111.10; Vun 1.7
11An wira ɦuɗuŋ buu maŋ ma kay ndaŋgarana foko.
Basara aŋ a basa kay ndaŋgarara
zul ha fokŋi zuli na ɗow ɗow.
12Lini aŋŋi sa ma wi dlara ni,
jivi ndaɗta ni maŋ aŋu.
Lini aŋŋi sa ma ŋga tamma ni,
aŋ hin fi warak ŋga taaŋ ndaɗta ni aŋ may.
Laɓara ka yi ay koloo
13Laɓara ni ko cara ɗeɗ cocora na,
ka wi vaɗi lay, zolo ka iriɗɗi layra na.
14Ndaɗ ka kaki kay guuɗ ma kakŋa fun ziiɗna na nje
kolo hu ɦoŋzi ma ŋgolna
15kay a yi suu jak tuɗtana.
Suu may suu ka tuɗ hu voɗta ɗegeerana.
16«Agiya sa ma laɓa
ma hoŋ irim ay egen tani kaɗi su?»
Ndaɗ yi ni suu may suu ka wi dlaɗina.
17«Yo ma kulum ay kulina jebet cocoo,
fu ma tam ki ŋgay gumunna jivi ɦay.»
18Suu tuɗ ha u yiiɗ ndaɗtana
ka wi ana ŋgus suu miɗina ka hu waraɗi.
Sa ma kal ha vo varaɗna
kal ni hu lina vi suu miɗina.
Currently Selected:
VUN ŊGOLNA 9: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
