VUN ŊGOLNA 8
8
Yira u nera kay a wi dlara
1Yalna ka yi ay koloo,
nera ka sawalla kolo u deleɗta eŋga,
agi ka humbi su?#Vun 1.20-21
2Ndaɗ col ki kolo kay ɦinira fiyekka
hu li ma voɗta jak huna,
col ki hu garak voɗta may.
3Hu voɗta tuɗ hu ɦoŋzi ma ŋgolnara may,
keŋ vun grek ma ɦoŋzinana may, yalna ka di ana,
4«An yagi ni agi suu warna,
an ɓak ha ni maŋ suuna halaŋ.
5Agi suu giniŋŋa haɗagi yal dlara kiyo,
agi suu laɓana, neegi tagi kiyo.
6Humugi dlara an daɗta, dlaɗ ŋgol cocoo,
an min dagi ki na ɗal ɗal, ka ŋgay vaɗi.
7Vunun di ha ki ni gasira,
boy ma kaboyna an ka minimbi.
8An di ni boy ma eg liimma.
Ma kaboy ka huɗi lay, ma ganyambi lay.
9Sa ma neeyna wammi u boy ma gasina,
suu ki haɗina wam ana
ni boy ma u voɗomma daŋ may.
10Hinigi dlara hal gursura tani,
halangi ni haɗ manda.
Wira ni jivi su lorra jivi ɦayra.»
11Kay ana wira
ni jivi su ɦeɗew mayra suuna miniɗ cocora.
Va ma jivi ko ndal wira na kaɗi.
Yalna ka tak taɗ kiyo
12An yalna, saara wi dlara ka ni egenu.
An wi yal ma li dlaanda u jivira.
13Li ndaa Yawe ni aŋ noy ki ni dla cora gaw.
Vun ma ŋga tara u kaboyna an ka minimbi,
sunda cora halaŋ an ka miniɗɗi.
14Anni cara gaɗ suuna,
neesi ki kay dlara ha fokka.
Gola ni sun manda, anni nera taɗta gaw,
an ɦal saɓakŋa ay ni anu.
15Muli suu ŋgolona ti mulla ni unu,
suu ŋgolo suu kaɓakŋa
ka ɓak ma ɗegeena ni unu.
16Muli
u suu kaɓakŋa vi mulinana halaŋ ka ni unu.
17Suu mininna an minisi may.
Suu halanna wi ki gasi ana asi hin fan may.
18Ҥiza u bibiŋilla ka laki ni egenu,
begera u basara kay ndaŋgara ŋgolla
u fira fi tlena halaŋ ka ni egenu.
19Ҥal manda jivi su lorra,
su lor mayra ki yoorira.
Tlesuu an lasina jivi su doonora suuna miniɗ ɦayra.
20An tuɗ ni hu voɗ mayra ɗegeera
ni hu voɗta suuna li huruɗ u ɗigillara.
21Hu li namma an li jivira kay suu mininna,
an oyosi zanduk masira ki u begera.
22Yawe vuɗunni namu,
anni vuɗ sun mamba jewra.
Ni sun mamba nam laɗ ay ki fok jew day dayra.#Wira 3.14
23An ay ki tinira ni fok jew day,
ni jew bay duliyara li tu day day.
24Hu li ma an vuɗna ni,
mbo lum ma ŋgolona bay li tu wa,
li ma mbona a ɓaɗ ay hurum ka tuɗi lay.
25Jew ɦinira bay li tura,
jew mayra lii kolo mbuyna kaɗi layra ni an vuɗiya.
26Ni Yawe bay li ndaŋgara u huulona tuwa,
tlesuu a min duliyara u asina bay taa tu lay.
27Hu li ma nam li huulona
u yam gura ndulla kolo kay mbo lum ŋgolona na ni an kaa.
28Nam li ɗugulla kolo huulona,
mbo ma ay ga hu gaalinana tak saɓakam kiyo.
29Nam ŋga ii li ma mbo lum ma ŋgolna do huna kiyo,
nam ŋgaa u ndaŋgara kaŋgaa.
30Hu li namma ni an ka njunum u sunda
ko sa wi yalna na.
Buuna u buuna ni an li ni dlara furiyum hurumba,
an ka luu fokom tew tew.
31Kay ndaŋgara hu duliyara nam laɗta col ay na day ni
furi manda ka duk suu warna tew tew.
Furira ka kay sa ma hum u wira yalnana
32Cemi ni agi, goroyonu, humugi haa,
lini agi hum u gaɗ manda ni furira ka kagiya.
33Hinigi nera an neegi wanda kiɗi,
saaragi kaɗ tew tew agi hin mbuɗ suu wi dlara.
34Furira ka kay suu humun vununna,
suu ka coli vun grek manna hu buuna tew tewna,
suu ka juɓ a cuk kalaf vo varanna.
35Sa ma fanna fi ni iirira,
Yawe hin li oo mamba kamu.
36Sa ma li cora egenna,
li hawra ni maŋ tamba na ɗow.
Sa ma ka mininɗina ŋgaɓmi miɗna.
Currently Selected:
VUN ŊGOLNA 8: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
