VUN ŊGOLNA 10
10
VUN ŊGOL SALOMONDA
Vun ŋgolna kay poyra ɗegeera
1Vun ŋgolna vi Salomon.
Goo ma wi dlara ɦayna furi huu bumu,
goo ma laɓana sum huruɗ ɓalak ki cocoo may.
2Begera faɗ u li iira ka mbuɗuŋ vaɗi,
may va ma fam u zamalaŋŋa
mbuɗuŋ a kak iiri din din.
3Yawe ka hin sa ma ɗegeena a mayra cambi,
may sa ma dlam cona va ma nam minimma
ni nam ka ɦammaɗi.
4Sa ma zolomba ndi ki ni hawra
may sa ma li sunda hin ɦiz may.
5Sa ma tok tlena ay ki kolo egem ndolna
ni sa ma wi dlara.
Sa ma buu kalafi senna hu til ma feɗ tlena vona,
ni ana suuna panamu.
6Suu ɗegeena paɗ vunna ka kasi tew tew.
Suu cona di dla ganyamba
ay duk boy masi ma asi njaɗamma.
7Sa ma ɗegeena hum suuna gasi kay sem tew tew,
paɗ vunusi ki kamu.
Sa ma cona hum suuna maa ki kay sem na zak gaw.
8Sa ma ɗilina vi u gaɗta,
may sa ma di dlara laɓara ba ki ni tamu.
9Sa ma poy u ɗilira tuɗ ni u heɓpa
may sa ma tli voɗta gunira hin kal ki ni daŋgayna.
10Sa ma ɓak boyna u cemek iiri cukŋi suuna kay tasiya.
Sa ma di dlara laɓara ba ki ni tamu.
11Vun sa ma ɗegeena ni mbo ma law iirira,
may vun sa ma dlam cona di ni dla ci maɗna.
12Gonokka mbaa ay ni honira,
may minda bulum cora ki halaŋ.#Jak 5.20; 1 Piy. 4.8
13Wira wi dlara faɗ ni fun sa ma ɗilina,
may sa ma giniŋŋa tokolora ka waɗ kay ceremu.
14Suu wi dlara
bege masira tokoɗ kolora ni yal wira,
may boy ma vi suu laɓana
mbaa dla cora ay ni na cem cem.
15Begera vi suu ɦizina gi kasi ni ko gulumunna na,
hahawra vi suu va ka kosiɗina baasi kiyo.
16Warak ma vi suu ɗegeena tuɗusi hu iirira,
warak ma vi suu cona ni sulukŋa may.
17Sa ma hum u gaɗtana
tuɗ ni hu voɗta vi iirira,
may sa ma ka vi vun saɗina
viɗ ki ni tamu.
18Sa ma ŋgay gonokka hurumma
ɓak dlara u ganyamba.
Sa ma di dlara ŋgeŋŋa duk suuna
ni sa ma laɓanna.
19Sa ma kal njaɗta cocona
hin bay kal ta co duk huɗi.
may sa ma vi vunum
min njaɗ cocoɗina ni sa ma ɗilina.
20Boy ma sa wi dlara damma jivi su doonora,
may saara vi sa ma dlam cona ka li va ŋgolɗi.
21Boy ma vi sa ma ɗegeena ɗoɓ suuna bolow cocoo,
may sa ma laɓana giniŋ mamba cami ndaɗu.
22Paɗvun ma vi Yawena ndak ɦiz sana,
lassa sana lassa ka fam va ay na ndeɗi.
23Sa ma laɓana furi ni kay sunda cora,
sa ma ɗilina saa ni kay a wi yal dlara may.
24Va ma sa ma cona lam ndaaramma,
va namma hin mbay kammi namu,
va ma sa ma ɗegeena halamma ni hin ɦamma may.
25Babaana mba wa ni sa ma dlam cona jak ki umu.
Sa ma ɗegeena ni u zira ŋgaari ga ka geŋeɗɗira.
26Ko ndal cinda dlay siina na,
ko ndoosna cuk ii tara na may,
sa ma zolomba sa ma nam sunumma
gol irimmi ko ndal tle asina na.
27Ndaa ma lam u Yawena ɦuɗuŋ buuruŋ foko,
may basara vi suu dlasi cona ka fiyekgi.
28Juɓpa vi suu ɗegeena ni furira.
Saara vi suu dlasi cona viɗ ki ni ɦawaa.
29Voɗta vi Yawera ni li ma ŋgayra vi suu ɗegeena,
may kay suu li dla cora ni ɓalakka may.
30Sa ma ɗegeena coli eŋga ni na gak gak,
ka geŋeɗɗi.
May suu li dla cora ka hin a cuk kay yam ndaŋgaraɗi.
31Vun sa ma ɗegeena di ni dlara yalna,
may vun suu di dlara bay uɗta hin seŋ kiyo.
32Vun sa ma ɗegeena di ni dlara furira,
vun sa ma dlam cona di ni dla cora sak sak.
Currently Selected:
VUN ŊGOLNA 10: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
