VUN ŊGOLNA 3
3
Gaɗta kay a hum u Lona
1Goonna, humuŋ maa ki kay haɗ mandaɗi,
hin huruŋ saa kay gaɗ manda tew tew.
2Ndaɗ hin ɦuɗuŋ buuruŋ fok kay ndaŋgara,
aŋ hin fi ni heɓpa ŋgolla.
3Ɗegeera u gasira ka tuɗ ki egeŋ dayɗi,
njunusi keleŋ na tok,
ɓiirisi ni kay magaara huruŋ kurufura.
4Aŋ hin fi oora,
seŋ hin yi jivi coco fok Lona may,
fok suuna lay.#Luk 2.52
5Hum u Yawe u huruŋ halaŋ.
Col kay neeŋ taŋgara ɦawaɗi.
6Hu poy maŋga halaŋŋi humuŋ mba gaŋ kamu,
nam hin takaŋ dlara aŋ laɗta halaŋ.
7Ŋga taŋ ko aŋ sa ma wi dla naɗi.
Li ni ndaa Yawe na ɗow,
ɦal ŋgoroŋ maŋ dla cora.#Rom. 12.16
8Ni hin li a kumu ma kay tliw taŋŋa gaw,
ni va ma hin ɦeɓeŋ mbalataŋ jivina.
9Ŋga Yawe u tlesuu ka koŋŋa,
u yam tlegeyeŋ suu ne ki fok jewna,
10vee maŋŋa hin oy ki u waleerena#3.10 waleerena Ble.,
sum veŋŋa hin oy ki hu vaaŋ ma em summa na kus.
11Goonna, noy haɗta vi Yawera kiɗi,
huruŋ ɓeŋ kay gaɗta nam ka gaɗaŋgaɗi.#Job 5.17#Heb. 12.5-6
12Kay Yawe gaɗ ni sa ma nam minimma,
ko ndal buna gaɗ gorom
ma nam minim ɦayna na may.#Wira 3.19
Furira vi sa ma wi dlara
13Furira ka kay sa ma fi yal kina
u sa ma di gasira tew tewna.
14Kay fira fi gursura ŋgolla
u gi lorra ka ndak a li furi sana ko ndaɗta naɗi.
15Wira jivi su ɦeɗew mayra jivi ta suuna miniɗ ɦayra.
Tlesuu jivi su suuna halasi ɦayna
ma nja fun tam u wira kaɗi.
16Buu ma ɦu duliyara cocona ka hu kok ma njufna,
begera cocora ka hu kok ma ŋgulna lay.
17Ndaɗ tuɗummi hu voɗta jivira,
ni voɗta heɓpa ka hura.
18Ndaɗ ni guna vi iirira kay suu vaɗ ki kosina,
furira ka kay suu vaɗ kosina.
19Yawe min ndaŋgara ni u yalna,
nam vi huulona kolo eŋga ni u gasira may.
20Wiimba yal ndaɗta nam li zul ŋgolla uɗ ka doɗira,
li ɗugulla a ndaɗ si mbo lona ay kaŋgara may.
Yawe njun kay sa ma wi dlara
21Goonna, hin nera u saara jivira
a tuɗ ki iriŋ dayɗi, li usi jiviya.
22Asi hin li ni a iirira vi ŋgus maŋga
a oora njuni keleŋga.
23Ni aŋ hin tuɗ hu voɗ maŋga ni va ma ŋgeneŋ kaɗi,
gu ka daɓaŋ seŋgi lay.
24Lini aŋ a buu gaa ni va ma laŋ taŋ ndaa kaɗi,
aŋ buu ga wa ni sen maŋŋa aŋ buurummi u jivira.
25Li ndaa ko dlara kafaŋ ay kolo na zakkaɗi,
ko ɓalakka mba kay suu conara aŋ laɗ ndaaraɗi lay.
26Kay Yawe hin li ni a sa ma njunuŋŋa,
nam goloŋ seŋ ko daw ma ka guni fokoŋŋa.
Yawe paɗ vunum ki kay sa ma min ndaram ma vok zina
27Lini tlena ka koŋu ni
hin bay a li jivira maŋ suu va ka kosiɗinaɗi.
28Dik ndaraŋ ma vok zina ana
«Tuɗa, aŋ hin hoŋ ay vini an hin ɦaŋ va namma tu wara,» ɗi,
doli va namma ka koŋ may ni, aŋ li naɗi.
29Tin huruŋ ki a li dla cora eg banaŋŋaɗi,
nam ka kaki egeŋŋi saa mamba ay tini ni kaŋu.
30Yal u sa ɦawa na gor bay u dlaraɗi,
hu li ma sa namma laŋ va ma co ka egeŋgi lay naɗi.
31Ɓeŋ huruŋ eg sa ma li yara tew tewnaɗi,
may tin saa maŋga a li ko nam naɗi kama.
32Kay suu li dla cora ki ni co ii Yawe da,
nam vi galam mamba ni u suu ɗegeena.
33Givun ma vi Yawena
ka ni kay ziŋ suu li dla cora,
may nam paɗ vunum ki kay ziŋ suu ɗegeena.
34Lini nam ka pan suu may suu pan suuna ni,
nam li oora kay suu hoŋ yasi gana may.#Jak 4.6; 1 Piy. 5.5
35Suu wi dlara hin fi bibiŋilla.
Suu laɓana hin fi ni zolona may.
Currently Selected:
VUN ŊGOLNA 3: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
