VUN ŊGOLNA 2
2
Yalna ni bege ma ŋgayna
1Goonna, lini aŋ van boy manna,
lini gaɗ manda iriŋŋi ko ndal begera na,
2lini aŋ tin humuŋ jivi a haɗ yalna,
aŋ tin huruŋ kaŋga en a hum gasira,
3na daŋ may, lini aŋ li dlara ɗilira
lini aŋ cenni gasira,
4lini aŋ halaɗ ko suuna hal gursuna na,
lini aŋ vegeɗ ko ndal suuna veg doonora ay gara na,
5na ni aŋ hin wi ndaa may ma lam u Yawena,
aŋ hin fi wira vi Lonara may.
6Kay Yawe ɦal yalna ay ni namu,
yal ma wira u gasira cuk ay ki ni funumu.
7Suu may suu ɗegeena nam ɗokosi fira ha ni masiya,
ko ndal mbarina ii sa ma poy ɗegeena na.
8Nam njun kay sa ma tuɗ hu voɗta ɗegeera.
Nam ka ŋgom poyra vi suu mam suu ɗegeena.
9Ni aŋ hin hum u dla mayra di ana,
jivira, lalamba u ɗegeerara kiyo,
u tlesuu tuɗ hu furirana halaŋ.
Yalna suɗ sana ko dla cora
10Yalna hin kal huruŋu,
wira ndaɗta hin laŋ huruŋ furira.
11Ɓorow mayra ɓorow ii dlara kira hin goloŋu.
Gasira hinni vara a ŋgomoŋ gak gakka.
12Yalna suɗuŋ ay ki hu poyra cora
ko suu a daŋ dla cora kaŋŋa halaŋ.
13Maŋ suu may suu hin voɗta ɗegeera tani
tuɗ ki hu voɗta ndufundana,
14suu hurusi furi kay dla corana,
mbeleŋ ma li dla cora furuyusi hurusi ni namu,
15voɗta asi tuɗuɗta ki guniya,
asi poy ni hu voɗta gunira.
16Kay ndaɗta aŋ suɗ taŋ ki ko cara li dlara zoŋga
ta ka ganaŋ yaŋ u boy ma jivinara.
17Ndaɗ hin banaɗ ma ay u way taɗna kiyo.
Humuɗ maa galamba asi vaɗ fok Lona
hu ɗum masirara kiyo.
18Voɗta tuɗ varaɗta ni voɗta vi miɗnara,
sa ma tuɗ varaɗna kal tammi fun miɗna.
19Sa ma tuɗ ha varaɗna ka hoŋ ay ki daganɗi,
ka fi voɗta tuɗ hu iirira oloɗi lay.
20Poy maŋga mba li ni poyra vi suu gaaraŋŋa,
aŋ gol ni poyra vi suu ɗegeena.
21Suu ɗegeena hin hin kay yam ndaŋgara ni asiya.
Suu ɗilina hin lak hu ni asi hol.
22Suu dlasi cona hin yowosi ki kay yam ndaŋgara.
Suu boyosi ka jiviɗina hin paɗasi ki ko ndal guna na.
Currently Selected:
VUN ŊGOLNA 2: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
