VUN ŊGOLNA 1
1
MAGAARA JEWRA
Sok boy ma ɓii magaa ndaɗta kamma
1Vun ŋgolna vi Salomon, goŋ Davidna, mul ma Israelna.#1 Mul. 5.12
2Ɓiirimmi a wi yalna, haɗta u nera,
u wi dlara ŋgay gaa hu vun ŋgolna cocona.
3Kay a haɗ yal ma ki kiɗik na ɗal ɗalna,
kaɓakŋa, lalamba u ɗegeera.
4Kay a ne suu giniŋŋa kiyo,
haɗ wira u ɓorowra
ɓorow ii dlara kira maŋ gorzoŋina.
5Ko suu wi dlara huma, zul u wiisira foko,
sa ma neeyna haɗ yal ma tuɗ fok suuna may.
6Ɓiirimmi a haɗ mbeleŋŋa,
vun ŋgolna u ndal boyna,
boy ma vi suu wi dlara u mbeleŋ masina halaŋ.
7Ndaa ma lam u Yawena ni sok wira ŋgolla gaw.
Yalna u haɗta,
suu laɓana san u dla ndaɗta ni asi hol.#Job 28.28; Soo. 111.10; Vun 9.10
Nera kay goozoŋ ma dlam cona
8Goonna, hum u gaɗta buŋ ka daŋgara,
noy haɗta suŋ haɗaŋgara kiɗi may.
9Haɗ ndaɗta hin mbuɗ ni ko ndal jumba mulla kuluɓi kaŋga na,
ko ndal ɦeɗewra cuki keleŋga na.
10Goonna, lini gor njufii suu dlasi cona hal a ganaŋ yaŋu ni aŋ minɗi.
11Lini asi daŋ ana,
«Mbay umiya, buuruygi voɗ caygi suuna,
aygi tuɗ nduguygi sa ma li va kaɗina.
12Aygi likim ki u iiri tam ko ndal maɗna ka cira na.
Ay gam ki ga hu zulla ko aygi ni maɗ ma ci suunana na.
13Aygi hin fi tlesuu jivina cocoo,
aygi hin oyoygi ziiygi ki u tlesuu vi suunana.
14Aŋ hin tli tiliŋŋi u ami dew,
warak maygina hin col ay ni ko tam dew.»
15Ҥawaa, goonna, tuɗ ko taŋ u asiɗi,
ɦuɗ taŋ ki eg voɗta asi tuɗ huruɗta na day.
16Kay sesi liŋŋi kay a li dla cora sak sak,
asi ɓaɗ tasi ni a vo busuna kira.
17Na daŋ may,
lini layra wi bay ma sa ma ndoonda gunumma ki wa ni,
sa ma ndoonda gunummi loɓ tam ki ni ɦawaa.
18Na may asi buu suuna kaŋga ni buu ni tasira tok.
Asi ba ki ni iiri masira taɗta tok.
19Ni ko ndaɗta na suu kulla ka kul iirira vi suuna,
na may asi ba iiri masi tasirara kiyo.
Yira u nera kay wi dlara
20Yalna ka yi kolo hu voɗ bulna,
nam ka oo um kolo eŋga yiya.#Vun 8.1-3
21Kolo hu garak voɗta ndaɗ ka yiya.
vun grek ma kay ɦoŋzi ŋgolnana
ndaɗ ka paɗ bolla ana,
22«Agi suu giniŋŋa
hin hinigi giniŋ magira ki ni saɓage?
Suu pan suuna hin hin panda pananda ki ni saɓage?
Suu laɓana hin hin noyra noy yalna ki ni saɓage?
23Mbaagi ay humungi gaɗ manda.
Gola an min kalagi saa manda ha hurugiya,
an min takagi boy manna.
24Kay an yagiya, agi humun kaɗi,
an feɗegegi ha lay ni,
sa ma caa yam a golon kon kaɗi.
25Kay agi van gaɗ manda kaɗi.
Agi ka min a humun boy mannaɗi.
26An may ni hin san u hahawra mba kagira ni saniya.
Hu li ma dlara ndaana mba kagira an hin panagi ni paniya.
27Hu li ma dlara ndaana mba ndugugi ko babaa ma ŋgolna na,
hu li ma hahawra si ay kagi ko kura nana,
hu li ma yoora u lassa hin mba kagina...
28Asi hin yan lay ni an ka humusiɗi,
asi hin halan lay ni, ka fanɗi lay.
29«Kay ana asi noy wira kiyo.
Asi man ndaa ma lam u Yawena kaɗi.
30Asi min ka a hum u gaɗ mandaɗi.
Dlara an daɗta halaŋ asi goloɗ ki ni ɦawaa.
31Na ni asi hin ti ni vuɗ poy masira may,
dlaasira cora asi laɗta hin hoɓosi ni ndaɗ may.
32Wira ka min a wi vaɗira ci suu giniŋŋa kiyo.
Tara ka tuɗuŋ ko dlaɗira ɓalak suu giniŋŋa kiyo.
33Sa ma humun vununna hin koɗ tamu, va ka lambi,
nam ka li ndaa dla cora mbaraɗi.»
Currently Selected:
VUN ŊGOLNA 1: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
