VUN ŊGOLNA 11
11
1Yawe ka min kelew ma ka tlam u voɗombina ɗi.
Nek mayra tli jivi u voɗoɗta ni irim jivi ɦay.
2Ŋga tara mba wa ni,
honira mba ni ndaɗ gaw may.
May yalna wi yal dlara ka
ni u suu hoŋ yasi kaŋgana.
3Gasira vi suu ɗegeena ka ɗegeresi hu voɗta.
May mbeleŋ ma suu hurusi mbambana lamma ɓalakasi kiyo.
4Hu buu ma yara vi Lonara ni begera ka li vaɗi,
may ɗegeera hin buɗ sana ki fun maɗna.
5Ɗegeera vi sa ma gasina mbuɗum poy mamba ɗegee,
may sa ma dlam cona ka mbusuk u dla coom ndaɗta may.
6Gasira vi suu ɗegeena buɗusi kiyo,
may suu hurusi cona hurusi ma mbaɗasi kay tlena vasi hu bayra wa.
7Miɗ ma vi sa ma dlam cona
viɗim dlara nam saaraɗ ginda ki halaŋ,
hurum ma tini kay bege mambana ki ni ɦawaa.
8Sa ma ɗegeena suɗ ay ki hu lassa,
sa ma dlam cona varak hu balamamu.
9Sa ma ka wi Lonaɗina
ɓalak ndaram ma vun grekŋa ki u vunumu.
Suu ɗegeena hin suɗ ki ni
u mbeleŋ masi ma asi wi dlara.
10Ҥoŋzi ŋgolna ka furi kay heɓpa vi suu ɗegeenara.
Bara suu dlasi cona ka ba kira asi sanni saniya.
11Ҥoŋzina min kolo ni u jivira vi suu ɗegeena,
vun suu dlasi cona bulum zi namma ki may.
12Sa ma ka ŋgaf u saam ma vok zinaɗina
ni sa ma yam kaɗina.
Sa ma wi dlara seŋ tammi na en, ka di vaɗi.
13Sa ma ŋgeŋŋa gi u dlara ga ŋgayra kiyo,
may sa ma jivina baa boyna gaa.
14Suu may suu sa ka fokosiɗina njay ki ni ɦawaa,
suɗta ka ni kay zi ma suu di gaɗta ka hu bolow cocona.
15Sa ma vi kam a warak bal
ma vi ndaryammana kina kal tammi hu lassa.
Sa ma ka taɓ tam hu dlaŋ saɗina
hin kaki ni na en may.
16Cara oora seɗ hin tii may.
Suu saɓakŋa ɦayna hin fi begera may.
17Sa ma ɗegeena li jivira ni eg tliw tamba,
sa ma ka hum vun saɗina
li cora ni eg tliw tamba may.
18Sa ma dlam cona fi ni warak ma um kaɗina,
sa ma di dlara ɗegeera
wi ki kam gasi ana warak mamma kaa.
19Na daŋ may ɗegeera tuɗuŋ hu iirira,
sa ma li dla cora tuɗ ni hu miɗna.
20Yawe ka min suu hurusi conaɗi,
nam minni suu ɗili suu poy masira ɗegeena.
21Yam boyna a daɓpa ni suu dlasi cona
ka hin bay kaasi ɓakŋa kasiɗi.
May ni suu ɗegeena hin suɗ kiyo.
22Cara jivi coco may dlaaɗta ka jiviɗira ni
ko ndal walak lorra gaɗ ki kel kosoŋŋara ɦawa na.
23Suu ɗegeena ka juɓmi jivira,
may suu dlasi cona ka juɓmi yara vi Lonara may.
24Sa ma daŋŋa ɦal tlena maŋ suuna cocoo.
nam fi ay coco may,
sa ma hiniŋŋa eŋ cocoo, ka bas vaam kiɗi,
may nam ndi ki ni hawra na ɗow.
25Sa ma oora wi hahaw suuna,
tlena hin oy kommi oy na ɗow.
Sa ma ɦal yona maŋ suunana,
laa ka cambi may.
26Sa ma ka min a gus waamma kiɗina,
suuna gam vunna.
Sa ma gus waamma ha ki maŋ suunana
asi paɗ vunusi ki kam may.
27Sa ma hal a li jivira hal ni oora vi Lonara,
sa ma hal dla cora nam hin faɗ may.
28Sa ma tin hurum kay bege mambana hin puk ki gaa,
sa ma ɗegeena ni ko hum ŋgus ma ka ɗufna na.
29Sa ma mbaa dlara vunna vo taraŋ hu ziim tew tew na
hin fi a warak mamma ni jak ki u semeɗna ɦawaa.
Sa ma laɓana mbuɗ ni mbaɓuna vi suu wi dlara.
30Sa ma ɗegeena vuɗ mamba ni gu ma vi iirirana.
Suu wi dlara hin vi suu daŋŋa.
31Sa ma ɗegeena fi warak mamma
ha ni ga kay ndaŋgara tani gaw.
Sa ma dlam cona u ma li sulukŋa
hin di kammi ana mege?#1 Piy. 4.18
Currently Selected:
VUN ŊGOLNA 11: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
