LUK 11
11
Yesu haɗ cenda maŋ suu haɗi mamma
(Matiye 6.9-13; 7.7-11)
1Fali taa dew Yesu a li cenda hu li maa dew. Nam daɓ cenda ki daɓmi, sa maa dew duk suu haɗi mamsina dam ana, «Bu Suuna, haɗami cenda ko Jaŋ haɗ suu haɗi mamsinara na may.» 2Yesu dasi ana, «Agi li cenna ni, dagi ana,
Bumiya,
ko seŋ tii ŋgol suu tlen halaŋ,
ko mul maŋga mbaa.
3Ҥami ti ma ami tam
hu buuna tew tewna.
4Daɓami coomira ko ami daɓ cora
vi suu lami cora egemina na may.
Hinimi hu ndembaɗi.»
5Yesu dasi olo ana, «Lini sa dukugi dew kala, banamma fam ay wa a dam ana, Bananna, ɦan pala fu ay hindi, 6banan ma dew col ay koyra mba fan wanni, va an ɦam ka konɗi. 7Banamma ay kalafi dam ana, Loɓon tanɗi. Vun ziinda ki kan dugi lay, ami ha goryon ki buuri kaŋgaa. An ka tew a col kolo a ɦaŋ fuɗi. 8An dagiya, lini nam ka col kolo a ɦambi ana nam banammara lay ni, nam hin col kolo ɦam tlesuu nam yam kasina halaŋ kay nam dogom vunum cocoo. 9An dagiya, joɓogiya agi hin fiya, halagiya, agi hin fi lay. Cagi vun goŋga, asi hin malagi lay. 10San li joɓpa ni, hin fiya. San li halla ni, nam hin fi may. Sa ma ci vun goŋga hin malam lay. 11Sa ma ana goromma joɓom kay kulufna nam ɦam guyna ni gege? 12Lini sa ma gorom joɓom kay sena wa ni, nam hin ɦam huuɗura su? 13Agi suu cona wi a ɦal tlesuu jivina maŋ goryogiya. Bugi ma kolo huulona ɦal Musuk mamba maŋ suu joɓomma ni nam ɗow.»
Yesu hoŋ dira kay yakka suuna yakamba
(Matiye 12.22-30; Mark 3.20-27)
14San dew fulna mbuɗum ki ndumuwa, Yesu dikimma ki kamu. Fulna kal ki kalni sa ay ndumuna gijaŋ ɓakŋa gaw. Suu moli cocona boy namma su ki kasiya. 15Suu ɦiw di ana, «Beelzebul ma mul fulina ɦam saɓak ma dik fulna ki ni namu.» 16Suu ɦiw mbay a duum delemba joɓom ana nam lasi dlara mbuɗta a takasi ana saɓak mamma col ay kolo huulona. 17Yesu wasi saa masira na ni dasi ana, «Ko suu kay mulla dewra li duu duk tasiya ni mul masira hin ɓeŋ kiyo, zigini masina hin bow ki kaŋga lay. 18Lini Satan ɓorow irim ki wa ni mul mamba hin li ni nanage? Agi di ana an dik fulina ki ni u saɓakŋa vi Beelzebul ni nanage? 19Agi viɗ tagi ana an dik fulina ki ni u mul masina Beelzebul ni, goryogi dikisi ki ni u me may ge? Kay ndaɗta asi hin kaagi ɓakŋa ni asiya. 20Gasira an dik fulina ki ni u ko Lona, ni ana Mul Lonara mba dukugi wa.
21«Sa saɓak cocona kagi a juɓ u ziim u ɓagi mamma komu. San ndak ka a kal varam a yowom tlegeyembi. 22Sa saɓakam suumma mba wa ni, ɓaɗam ɓagi mamma eŋem gin kamma kiyo. Nam ɓorow tlesuu nam yowosi ay varamma kiyo.
23«Sa ka tuɗ unɗina ni babali manna. Sa ka taɓ tlegeyem u anɗina ni, nam njayasi ki ni ɦawaa.»
Ful ma cona hoŋ kay sana
(Matiye 12.43-45)
24«Ful ma cona hu sana kal ay ki kalni, tuɗ ŋgoo bagiya, hal li ma nam buu huna. Nam fi li ay kaɗi, nam ana, An min hoŋ hu zi ma an hinim ha kina. 25Nam hoŋ ay wanni fi hu ziim ki tori jiviya. 26Ful ma cona hoŋ hal gorsemma ay um kiɗisiya. Suu asina dlaasira co suumu. Hoŋ ay ko tasi cuk hu zi ndaɗta. Kay ndaɗta sa namma mbuɗ ki co su jewra.»
Dlara ayra gasira
27Yesu daɓ ɓakŋa may ni, cara dew duk suu molina dam ana, «Ayra ka kay cara vaŋ wiiriŋga u cara ɦaŋ ponara.» 28Yesu hoŋoɗ dira ana, «Ayra ka ni kay suu hum boy ma vi Lonna, vi umma na ɗow.»
Suuna joɓ Yesu kay dlara mbuɗta
(Matiye 12.38-42)
29Suuna mol eg Yesu molni, nam gijaŋ ɓakasi ana, «Agi suu jok cemi suu cona joɓ dlara mbuɗta ni amege? Dlara mbuɗta daŋ ta an takagira sura vi Jonassa kaɗi. 30Jonas tak tlesuu vi Lonna ay maŋ suu Ninivena, Goŋ Sanna hin a tak ki ni maŋ suu cecemina may. 31Hu buu ma kaɓakŋa wanni, ca mulla col ay dali day mba eg Salomon a hum boy ma jivi ma funumma, ni kay ndaɗta hu buu ma kaɓakŋa ndaɗ hin col kolo ɓak co kagiya. Cecemi sa su kay Salomonna ka dukugiya. 32Suu Ninivena hum boy ma vi Jonasna na ni, asi jok hurusi ki zeɗ gaw. Kay ndaɗta hu buu ma kaɓakŋa asi yow kolo ɓak co kagiya. Cecemi sa su ki kay Jonasna ka dukugiya.»
Li kiɗikŋa kay tliw tara
(Matiye 5.15; 6.22-23)
33«Aŋ sana ka do pindilla do ni, ŋgayaɗ kiɗi, ka kuluɓuɗ ki kaŋga u ŋgotnaɗi lay. A jivira ni aŋ dooɗ do ni gaɓaɗ ki ni koloo. Suu kal ha na hin wi lina ki kiɗik. 34Iriŋŋi pindilla kay tliw taŋu. Iriŋ li wi jiviya ni, tliw taŋ ki ni kiɗik may. Iriŋ li wi co ni, tliw taŋŋi duk ndufunda. 35Li kiɗik ma egeŋŋa aŋ golom um jiviya ka a nam li ndufunɗi. 36Lini tliw taŋ ki kiɗiki li ma ka hu ndufunɗi ni tliw taŋ hin mbuɗ ki kiɗik ko pindilla wi egeŋga na may.»
Yesu yak suu Farisenna u su wi magaara gaɗta
(Matiye 23.1-36; Mark 12.38-40)
37Yesu daɓ ɓakŋa ki daɓmi, sa Farisenna dew yam ana nam tuɗ ti varamu. Yesu hin kal ha a kak a ti funa u namu. 38Sa Farisenna golom na jim kay nam kak ti funa bay mbus komu. 39Bu Suuna dam ana, «Gola agi suu Farisenna ni na. Agi mbus ŋgoo ŋgotta, hurugi oyra u dlara kulna may boy ma cona may. 40Agi suu giniŋŋa, Lona li ŋgoona li huuna ni nam layɗi su? 41Mariyaɗ ni agi ɦal tlegeyegi ki maŋ suu hawra, wanni asi hin mbuɗ jivi magiya.
42«Hahawra kagiya agi suu Farisenna, derekka ganak lay ni, agi gusuɗ ki wa ni, haɗ yaɗ maŋ Lona. Agi maa ɗegeera u minda min Lonara kiyo. Aŋ li li mayra hiŋga, ta hiŋga hiniɗ kiɗi may.
43«Hahawra kagiya agi Farisenna, agi min kak hu li jivina fok suuna hu Zira Tokka. Suuna mol wani, agi min ana gagi deɓpa ko mulina na. 44Hahawra kagiya agi tli tagi ni ko ussa sa ka waɗɗi tuɗ kaɗta na.»
45Sa wi magaara gaɗta dew di ana, «Mala Haɗta ɓak maŋŋa aŋ ɓak wanna ni ŋgulumi ni amiya.»
46Yesu dasi ana, «Hahawra kagiya agi suu wi magaara gaɗta, agi njun tlesuu nek ŋgolona suu zii loɓ lay, tinisi kay domjok suuna, ni kay tagira agi ka geŋeɗesi u gorgor kogiɗi. 47Hahawra kagiya suu jok vun Lona agi minisi ususi jiviya. Suu asina ni suu somoyogi casina. 48Agi lagi ni dlara somoyogi suu jewna ci suu jok vun Lona kira. Agi hin minisi ususi may. 49Ni kay ndaɗta wira vi Lona di ki ana, An hin sunugi suu jok vun Lona u suu vovoɗta, agi hin ci suu ɦiw ki dukusiya, hin las suu daŋŋa lay. 50Ni kay ndaɗta suu ɗegee suu casi ki jewna busuusi hin hin ni kagiya. 51Tin ay busu Abel gak gak tew busu Zakari ma agi cam ki hu Ziŋ Lonara bay nam tew givin ma togolla tuna. An dagi ni u voɗoɗu, busu namma halaŋ hinni kay njaf namma.
52«Hahawra kagiya agi suu wi magaara gaɗta. Agi vagi vun zira vi wira ki kogiya, tagira ka kal huɗi lay, suu cuk huna agi ka hinisiɗi lay.»
53Yesu hin li namma ki tani, suu wi magaara gaɗta u suu Farisenna hurusi ɓeŋ ki egem cocoo. Asi joɓom kay tlena bolow cocoo. 54Asi duum delem ana nam hin di va co su.
Currently Selected:
LUK 11: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.