LUK 12
12
Li tagi jivi ko mbambara vi suu Farisenna
(Matiye 10.26-27)
1Hu li namma suuna moli bolow cocoo ɦeɓ eg tasi ko lina kaɗira. Yesu di suu haɗi mamsina ana, «Gol tagi jivi ko kuffa vi suu Farisenna, ni kay mbamba masira. 2Va yam ki baarina suuna hin wam kiyo. Boy ma ki ŋgayna um hin gi ki lay. 3Dlara agi daɗ duk njeŋgerara hin hum ki faaliya. Va ma agi hosok kam kalafna hin hum ki kay yam zira.»
Li ndaana ko gege?
(Matiye 10.28-31)
4«An dagi ni magi agi banayanna, lagi ndaana ko suu ci mbalatara ɦawa hol ka a li va daŋ ginaɗi. 5An takagi sa ma agi a li ndaana komma, lagi ndaana ko Lona na ɗow. Nammi sa ma ci mbalatara lay, gi iirira ki duk kura layna. Gasi nammi sa ma agi a li ndaana komma.
6«Agi gus layɦina vadl ni suŋgu mba'ɗi su? Taa dew ka a maa ki ko Lonaɗi. 7Agi may ni tlimiɗ yagi lay ni ki ndumiya. Lagi ndaaɗi, sa dewna ŋgol su layɦi suu bolowna.»
Di ki kay Yesu fok suuna
(Matiye 10.32-33; 12.32; 10.19-20)
8«Sa ma di ki kan fok suuna ana nammi mannana Goŋ Sanna hin di ki kam fok suu sunda huulona ana nammi mamma may. 9Sa ma tin vunum kan fok suuna ana nam ka wanɗina, Goŋ Sanna hin tin vunum kam fok suu sunda huulona ana nam ka wambi may.
10«Sa ɓak co kay Goŋ Sanna coomba hin daɓ kiyo. Sa ɓak co kay Musuk Lonara, coomba ka daɓ kiɗi a fafatɗa.
11«Asi yowogi ha hu Zira Tokka fok suu ɓakŋa u suu ŋgolona wani lagi nda ana agi hin ndaa di ni ana megeraɗi. 12Musuk Lonara hin haɗagi va ma agi a damma ni ndaɗu.»
Ndal boyna kay sa ma ɦizi ma giniŋŋa
13San dew duk suu molina di Yesu ana, «Mala Haɗta di maŋ wayanna nam ɓorowomi tlesuu bumi hinimsina kana kiyo.» 14Yesu hoŋom dira ana, «Bananna sa ma tinin a kaɓakŋa a ɓorowogi tlen ni gege?» 15Nam hin di suuna halaŋ ana, «Gologi tagi jivi kay godlom begera. Lini sana bege coco lay ka kak iirira ni kay ndaɗtaɗi.» 16Yesu tin ndal boyna ana, «Sa ɦizina dew sene mamma jivim wana cocoo. 17Nam saa hurumu, ɓak tam ana, An lini ana mege? Li ma an a cuk tlegeyen huna kaɗi. 18Nam ana, Va an a lamma ni, an to vee manna ki to ni, min ma ŋgolna. Ma namma an hin tok tlegeyen hurum halaŋ gaw. 19An hin di tan ana, An li tlena ŋgolo asi ndakan a li basara cocoo, koɗ tanu. An hin ti may, ci may, furi ɗaŋ. 20Lona dam ana, Aŋ sa ma giniŋ namma karam njeŋge wanni aŋ ka kak iiri oloɗi. Tlesuu aŋ tokosi asina hin hinisi ni maŋ gege?» 21Yesu gi boy mamma fun ɗaŋi ana, «Sa ma tok tlena kay tamma fok Lona ni nam ka bege koɗi.»
Tin huruŋ kay Lona
(Matiye 6.25-34)
22Yesu di suu haɗi mamsina ana, «Agi gola an dagiya, Vun dikigi ɓigigi kay tlesuu agi tasinaɗi, kay baraw ma agi cukum taginaɗi lay. 23Iirira ni ŋgol su ti ma funuginaɗi su? Tliw tagi ni ŋgol su baraw ma cuk taginaɗi su? 24Gologi gawgawna pii kolo gige, nam ka zaa wa a feɗembi, ka cuk wa hu veeɗi lay. Lona ɦasi tina funusi ni nambi su? Agi ni, su layaginaɗi su? 25Sa dukugi ma ɦuɗ buu mamma fokom kay tamma ni gege? 26Lini agi ka a ndak a li va kay tlesuu gorinaɗi ni hin haɗ hurugi kay tlesuu hiŋŋa ni amege? 27Gologi eg ɓo tlena hu senena, ɓo tle asina ka li sunɗi lay, ka cil barawɗi lay. An dagiya, Salomon tlena kom coco lay ni, baraw mamma jivim tew ka u ɓo tle asinaɗi lay. 28Tlesuu kura hin ŋgalasi kina, Lona lasi ɓoosi jivi coco lay. Agi suu hurugi ka tini kay Lona ŋgolɗina, nam lagi ni jivi su ɓo tle asinaɗi su? 29Viɗ ii tagi a hal tlesuu agi tasina u suu agi casina na gak gakgi. 30Suu ka goɓ Lonaɗina hal tle asina gak gakŋi asiya. Agi may ni Bugi wi tlesuu agi minisina halaŋ ni namu. 31Halagi Mul Lonara tlesuu hiŋŋa Lona hin ɦagisina.
Begera kolo huulonara
(Matiye 6.19-21)
32«Lagi ndaaɗi, yoori suu ewna. Bugi hurum min a ɦagi mulla ni nam daŋ may. 33Gusugi tlegeyegi kiyo, ɓorowogi begera agi faɗ u asira ki maŋ suu hawra. Minigi begera kolo huulonara. Hu li namma bege ndaɗta ka ba kiɗi, sa kul ka kuluɗɗi lay, toɓo ka taɗɗi lay. 34Lii bege maŋga huna, huruŋ tini ni hu may.
Suu juɓ u sun masira jivina
35«Lagi tagi jiviya, njunugi hurugiya maaɗi, doogi pindilla kogiya. 36Lagi ko ndal suu juɓ vok mul masina nam ay luuna nam mba daɓ vun grekŋa. 37Furira kay suu asina kay mul masina mba fasi iiriya. An dagi ha ni gasira nam u tamba hin min tamu ɦasi li kakŋa, tuɗ yow funa aya, cukusina fokosiya. 38Lini nam mbay ni duk ŋgikka lay, ŋgarapii lay, ni mba fasi ni iiri lay, asi furiya. 39Humugi dla ndaɗta ha ki jiviya, lini malaŋ zina wi li ma sa kulna mba kulumma ni, nam ka hinim a kal um voɗi. 40Minigi tagi jiviya, Goŋ Sanna hin mba ni hu faɗta agi ka saa kambira.»
Sa li sun mamba jivina u ma ka li mamba jiviɗina
(Matiye 24.45-51)
41Piyer di Yesu ana, «Bu Suuna aŋ tin ndal boy namma ni mami doy hol ɗowba maŋ suuna bel su?» 42Yesu hoŋ dira ana, «Sa li sun mamba jivi yalaɗ irimma ni gege? Ni sa bu ziimma ɦam tlesuu hu ziimma kom halaŋ, tinim a nam ɓorow tina maŋ ndarayamma mayna. 43Sa namma bu zina mba fam fun sun mamba wa ni, furira ka kamu. 44An dagi ni gasira bu ziimma hin hinim tlena halaŋ komu. 45Lini sa li sunda namma saa hurum wa ana, malanna ka a mba vo zakgi, nam gijaŋ poŋ ndarayam suu li sunda may, ti funa ki may, ci summa guruɗ tam ki may. 46Na daŋŋi malamma hoŋ ay ni, ka fammi hu buu ma nam ka a wambina, hu lerra nam ka saa kaɗɗina. Nam vamu, gam daŋgayna, dikim ha ki duk suu cona.
47«Sa sun ma wi dlara malamma miniɗta nam ka min a laɗɗira, sa namma asi waɗam cocoo. 48Olo ni sa ma sun ma ka wi dlara malamma miniɗtaɗina, nam li dlara u min mamba wa ni, asi ka poŋom ŋgolɗi. Sa ma ɦam vana kom ŋgolna, hin joɓommi ŋgol may. Sa ma tinim kay tlena ŋgolna, hin joɓommi suwa.»
Yesu njaɗ kay ɓorow ira
(Matiye 10.34-36)
49«An mba ni a gi kura kay ndaŋgara ko ndaɗ lini dooy gaw. 50An a fi batemma wi haw manda vunuɗ a faɗ kira ni saɓage? 51Agi saa ana an mba ni heɓpa hu duliyara na su? Ҥawaa, an mba ni a ɓorow ira. 52Cem wanda ni suu u deeresi vadlna suu hindi u tasi li cora eg suu mbana, suu mbana li cora eg suu hindina may. 53Asi hin ɓorow kiyo, buna li cora eg goromma, goona li cora eg bum may. Sura li cora eg goroɗta, goora li cora eg suɗ may. Su goona li cora eg caata, cara li cora eg kunuɗta may.»
Wi dlara ŋga lina kiyo
(Matiye 16.2-3)
54Yesu di maŋ suu molina anaba, «Agi wagi ɗugulla tin ay u maɗiina wa ni, agi di ana, Lona hin siya. Nam hin si may. 55Semeɗna li hoŋ irim daliya ni agi ana, Lina karam zamali, nam hin li may. 56Agi suu hurugi mbambana, agi wi yal ma ŋga tlesuu kolo duk lonna u suu kay ndaŋgarana may ni, agi ka hum u dlara li cecemba kiɗi ni nanage?
Gi ii dlara ki u sa aŋ ɓak u namma ki jewe
(Matiye 5.25-26)
57«Agi ka gi ii dlaagira duk tagi u dlara agi laɗ ɗegeeraɗi ni amege? 58Lini sa yakaŋ wa a tuɗuŋ ki fun ɓakŋa ni, gagi ii dlaagira ha ki voɗ gaw. Li ka naɗi ni, nam ɦaŋ maŋ suu kaɓakŋa, asi ɦaŋ maŋ asgaana, asgaana gaŋ daŋgayna. 59An daŋŋi gasi, Aŋ ka kal ki bunsu bay warak dlara kaŋga kiɗi.»
Currently Selected:
LUK 12: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.