LUK 10
10
Yesu sun suu dok kiɗisiya yam mbana
1Ŋgoo daganda Bu Suuna ŋgaɓ suuna dok kiɗisiya yam mba', nam sunusi u tasi mba' mba' ha fokom hu zi ma nam tuɗ huna halaŋ. 2Nam dasi ana, «Wana ka ŋgolo ndaki a feɗta. Suu feɗemma ka ŋgolɗi. Joɓogi malaŋ senena haa, nam sun suu feɗ wana ay huwa. 3Tuɗugiya, an sunugi ha ni ko gor timigiina duk bosokona na. 4Yow mbumbura cuk gursu kogiɗi lay, yow mbumbu ma ŋgol kogiɗi lay, yow tuɓuru kogiɗi lay. Cologi ha voɗ a gi deɓ saɗi lay. 5Agi selegi hu zi taa wani, di ana heɓpa li ha kay zi ndaɗta. 6Sa ma cukugi huruɗna hurum li heɓpa ni heɓ magira hin kak egem may, li kaɗi ni hoŋogi vagira ay egegi may. 7Kakagi hu zi ndaɗta, tlesuu asi hin ɦagisina agi tasi lay, cagi lay. Sa sunda fi tiimma ni u sun mamba may. Jokogi ugi hu zigini suu daŋgi. 8Agi tew hu zi ma suuna vagi varasina wa ni, tagi tlege suu asi ɦagisinana. 9Garaɗagi suu tuguɗira ki hu zi namma, dagisina ana Mul Lonara hin egegi tok. 10Agi tew hu zi ma suuna ka vagi varasiɗina wa ni, tuɗugi ki hu li ma suuna huna dasi ana, 11Gugum magi ma yow semima ami poom ki kaŋga ni kagiya. Tin boy namma kagi jiviya. Mul Lonara mba egegi wa tok. 12An dagiya, hu buu ma ɓakŋa zi namma hin wi hawra ni su zi ma Sodomma.»
Zi ma min vi boy ma vi Yesuɗina
(Matiye 11.20-24)
13«Hahawra kagiya, suu Korazinna, hahawra kagiya suu Betsaidana, dlara mbuɗta ŋgolla an laɗ varagira, an li ni laɗ ay ni hu zi ma Tir u ma Sidonna ni, suu huna njun doona hurusiya, cuk buɗna kasi may, a tak ki ana hurusi ki jokiya. 14An dagiya, hu buu ma kaɓakŋa ni, hahaw magira hin li ŋgol su zi ma Tirna u ma Sidonna. 15Aŋ Kapernaum aŋ saa ana aŋ tew kolo huulona su? Ҥawaa aŋ hin tuɗ ni duk kura.»
16Yesu di suu haɗi mamsina olo ana, «Sa humugi vunugina, humun ni an may. Sa noyogi kina noyon ki ni an may. Sa noyon kina noy ki ni sa sunun ayna may.»
Suu dok kiɗisiya yam mbana hoŋ ay voo
17Suu dok kiɗisiya yam mbana hoŋ ay vo u ayra di ana, «Bu Suuna, fulina lay ni humumi vunumi hu li ma ami ɓakasi u seŋa.» 18Yesu dasi ana, «An wi Satan ay kolo huulona ndi ay kaŋga weleɗ ko kura na. 19Humugiya, an ɦagi saɓak ma tuɗ kay guygina u huuɗura, ɦagi saɓak ma su kay babali magisina lay. Va ma hin lagi co kaɗi. 20Lagi ayra kay fulina hum ugiraɗi. Furiyugi ni kay segi ma ɓiiri kolo huulona na ɗow.»
Yesu furiya
(Matiye 11.25-27; 13.16-17)
21Hu li namma na gaw ni Musuk Lonara oy hu Yesu u furira, nam di ana, «Bunu, mul ma kolo huulona, kaŋga kay ndaŋgara layna, an gaŋ deɓpa kay aŋ ŋgay tlegeyeŋ ki ii suu wira u suu neeyna, hin takasi ki ii suu kaɗakina. Na may Bunu, aŋ min ni na.
22«Tlena halaŋ Bun ɦansina ni konu. Sa ka wi Goŋ Lonnaɗi, wammi Bun doy hol. Sa ka wi Lonaɗi, wammi Gorom u suu nam hin takasina kina.»
23Yesu mbuɗ irim eg suu haɗi mamsina, dasi ni asi doy hol, «Furira kagiya agi suu wi tle asina. 24An dagi ana, suu jok vun Lona u mulina min a wi tlesuu agi wasina, hin wasi kaɗi, hal a hum tlesuu asina lay, hin humusi kaɗi.»
Ndal boyna kay sa Samarina
25Mul ma wi magaara gaɗta mba ganyam Yesu joɓom ana, «Mala Haɗta, an hin li ni nana a fi iirira ka daɓ kiɗira ge?» 26Yesu hoŋom dira ana, «Ɓiiri hu gaɗ maygira ni ana mege? Aŋ ndumuɗ ni hum ana mege?» 27San hoŋom dira ana, «Aŋ min Bu Suuna Lona u huruŋ halaŋ, u musukuŋ halaŋ, u saɓakaŋ halaŋ u saa maŋga halaŋ. Min ndaraŋŋa ko aŋ min taŋga na may.» 28Yesu hoŋom dira ana, «Aŋ di na ni jiviya. Aŋ li li na ni aŋ hin kak iiri may.»
29Mul ma wi magaara gaɗta a ɗoɓ boy mamma ii Yesura ni, nam joɓom ana, «Ndaranna ni gege?» 30Yesu dam ana, «San dew col ay kolo Yerusalem a tuɗ kaŋga Yeriko. Suu kulla fam hu voɗta poŋom poŋŋi, yowom tlegeyem u barawi mamsina, asi hinim gi tok a miɗna. 31Sa li ɓivunna jak hu voɗ ndaɗta na ni, nam wi san giya, hin wak ki keŋemu. 32Ma Levina mba hu li ma san gi huna may ni wak ki keŋem olo. 33Sa Samarina ay koyra tli hu voɗ ndaɗta, nam wi sa namma na ni, hurum haɗ kam ŋgol cocoo. 34Nam ɦuɗ tam ay egemu mbusum mbilim ki u summa, doom mbulna huwa, njunumma u barawna may. Tlam kay koro mamba tani, tuɗum hu zira buu koyogina. 35Vin maɗiira ni nam ɦal gursura maŋ malaŋ zina, dam ana, Sana wanni aŋ golonna ka jiviya. An hin hoŋ ay wa ni hin warakaŋ tlesuu aŋ boɗosi kamma ki halaŋ.» 36Yesu hin di dagan hu ana, «Duk suu hindi asina ni sa tak tam ki ana nammi banaŋ sa nammana ni gege?» 37Mul ma wi magaara gaɗta hoŋ dira ana, «Ni sa lam jivina.» Yesu hin dam ana, «Aŋ tuɗ li na may.»
Marte u Mari
38Yesu u suu haɗi mamsina tuɗ hu voɗta wanni, cuk hu zina ŋgaf u cara yaɗ ana Marte. Ndaɗ vam varaɗu. 39Wayaɗta dew seɗ ana Mari kagi eg Yesu hum dlara nam haɗasira. 40Marte sunda koɗ ŋgol coco a min tlena. Ndaɗ mbay eg Yesu dam ana, «Bu Suuna aŋ ka tin yaŋ kay dlara wayanda hinin a li sunda vaydegen dewraɗi ni nanage? Daɗu ndaɗ mbay njunun ha sunda gige.» 41Bu Suuna daɗ ana, «Marte, Marte, ndak loɓ tak a hal tlena ŋgol coco na ni amege? 42Vana ka dew ni, va ma ŋgol cocona. Mari ŋgaɓmi va jivina. Sa ka tlaɗna ki koɗɗi.»
Currently Selected:
LUK 10: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.