URA TIN AYRA 13
13
Abram ɓorow ki u Lot
1Abram col ay Egipte hoŋ balamam Negeb u caamba u tlegeyem halaŋ. Lot hoŋ ay um may. 2Abram ɦizi cocoo, yoorina u gursura u lorra. 3Nam col ha Negeb jok um ha nde nde tew ki Betel, hu li ma nam cuk ay hu jewna, duk ɦoŋ Betel u Ai. 4Ni givin ma togolla ma nam hin li ɓivunna ay hu jewna, Abram cen Lona u sem Yawe.
5Lot sa ma ay umma yoori mamsina ka may, timigiina, u mbutlina, u mbutluɓ mamma cilina kam lay. 6Ndaŋgara asi cuk kaɗta ndakasi ka a asi cuk hu halaŋgi kay asi zuli cocoo, yoori masisina zuli coco lay. 7Ciwayra col duk ɦoŋ suu taa yoorina vi Abram u suu vi Lotna. Hu li namma ni suu Kanaanna u suu Perizna cuki hu mbas ndaɗta. 8Abram di Lot ana, «Kaa ci wayra li duk ɦoŋoyɗi, duk ɦoŋ suu manna u suu maŋsinaɗi lay, kay ay ni waya taya. 9Ndaŋgara ha fokoŋ widik widikŋi ka ndaɗɗi su? Ɓorow dukuŋ ha ki u an ɗaŋ, aŋ tuɗ bik gulu wa ni an hin tuɗ bik njuf may. Aŋ tuɗ bik njuf wa ni an hin tuɗ bik gulu may.» 10Lot gol com commi wi ana li ma ii Yurdanna jivi cocoo, yona ka ŋgolo. Jew mayra Yawe bay beŋ Sodom u Gomor ki tura, ni li namma ay ni ko sene ma vi Yawena ta ta Soar. Ni ko ndaŋgara Egiptera na may.#Ura 2.10 11Lot manni li ma ii Yurdanna, hoŋ irim u maɗiina na. Asi ɓorow ki ni ko ndaɗta na. 12Abram kak hu mbassa Kanaanda, Lot tuɗ kak tok eg ɦoŋzi ma ŋgolna fun Yurdanna, cuk ziim ta ta tew ay Sodom. 13Suu hu ɦoŋzi ma Sodomma ni suu ci maɗna, asi li dlara cora eg Yawe ɦay.
14Lot ɓorow ki u Abram ɓorow ni, Yawe di Abram ana, «Tli iriŋ kolo gol li aŋ huna mbayawi, daliya u maɗiina u fiɗigina. 15Ndaŋgara aŋ waɗ wanda halaŋ an hin ɦaŋga ni maŋu u njafaŋ halaŋ a fafaɗta.#Sun. 7.5 16An hin zuluŋ ko ŋgetlna kay ndaŋgarana na may. Lini sa ndak a ndum ŋgetlna ni njafaŋ hin ndumi na may. 17Col kolo poy yam mbassa ki halaŋ, fiyekeɗ u hayaɗ lay. An hin ɦaŋga.» 18Abram jok um ki, mba pi mbutluɓ mamma ki ga u ɦoy ma Mamrena tok eg Hebron. Hu li namma nam min givin ma togolla maŋ Yawe.
Currently Selected:
URA TIN AYRA 13: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
