URA TIN AYRA 12

ABRAHAM

Lona yi Abram ana nam hin mbas mamba kiyo

1Yawe di Abram ana, «Hin mbas maŋga u somoyoŋu u ziŋ buŋŋa ki tani, tuɗ hu mbassa an hin takaŋgara.#Sun. 7.2-3; Heb. 11.8 2An hin zuluŋ njafaŋ ŋgol cocoo, an hin paɗ vunun ki kaŋu.

Suuna halaŋ hin mbuɗ geleɗeŋu.

Suu daŋŋa halaŋ hin fi paɗvunna ni uŋu.

3An hin paɗ vunun ki kay suu paɗ vunusi kaŋŋa,

an hin gi vunna maŋ suu gaŋ vunna may.

Suu kay ndaŋgarana halaŋ hin fi paɗvunna ni uŋu.»#Gal. 3.8

4Abram tuɗ ko Yawe damba na. Lot tuɗ u nam may.

Cokira Abram tuɗ ki hin Haran kira na ni basaɗam li ki dok-kiɗisiya yam vadl.

5Abram tay caamba, Sarai, u goŋ wayammana, Lot, umu. Nam yow bege mamma u mborɓii suu nam gususi hu Haranna halaŋ umu. Asi tin irisi a tuɗ hu mbassa Kanaanda.

Abram hu mbassa Kanaanda u Egipte

Hu li ma asi tew ki hu mbassa Kanaanda, 6asi jak gak gak tuɗ hu Sekem, kak u ɦoy ma Morena. Hu coki ndaɗta ni suu Kanaanna cuki hu ni asiya. 7Yawe tak tam ii Abram dam ana, «An hin ɦaŋ mbas ndaɗta ni maŋ njafaŋu.» Abram min givin ma togolla maŋ Yawe hu li ma nam tak tam irim huna.#Sun. 7.5; Gal. 3.16 8Hu li ma nam jak u ɦinira ii ma u maɗiina vi Betel na, nam min mbutluɓma duk ɦoŋ zi ma ŋgol ma Betelna u fiɗigina, Ai u maɗiina may. Nam min givin ma togolla maŋ Yawe hu li namma olo, gijaŋ cen Lona u sem Yawe. 9Abram jok ziim nde nde tew ki Negeb.

10Mayra ŋgolla ndi kay ndaŋgara cocoo, Abram tuɗ ki hu mbassa Egiptera ana nam i basa ay ki hu njok tuwa. 11Nam hin tok a tew hura ni nam di caamba, Sarai, ana, «Ndak huma, an wi ana ndak jivi cocoo. 12Lini suu hu Egiptena wi ana ndakŋi caanda ni, asi hin can kiyo, hinik ndak iiri may. 13Dasi ana ndakŋi wayanda, asi hin lan jivi uku, ni an hin kak iiri ni uku.»#Ura 20.2; 26.7

14Hu li ma Abram tew Egiptena, suu Egiptena wi ana caamba jivi cocoo. 15Asgaa suu ŋgolo suu vi Farawna waɗ na ni, tuɗ njaɗ boy namma ki maŋ Faraw gaw. Asi tayaɗ tuɗuɗ ha hu taraŋga vi mulna. 16Faraw waɗ na ni, vi Abraham jivi cocoo. Nam ɦam timigiina, ɦugunina, mbutlina, ɦam suu sunda u gorɓii suu sunda lay, ɦam korra u jamballa. 17Yawe mba lassa ŋgolla kay Faraw u suu mamsina halaŋ kay boy dla Sarai caŋ Abramba. 18Faraw yi Abram ha dam ana, «Aŋ lan dla ndaɗta egen na ni amege? Aŋ dan kaki ana ni caaŋga ɗini kay mege? 19Aŋ dan ana ni wayaŋga ni kay mege? Aŋ hinin an kakaɗ ki un a cara ni nanage? Caaŋga wanna tay vaaŋga tuɗa.» 20Faraw di suu sunda ana asi tuɗ tin Abram ha ki ii hakara. Asi u caamba u tlegeyem halaŋ.

Currently Selected:

URA TIN AYRA 12: BMS

Highlight

Copy