URA TIN AYRA 11
11
Zira fiyekka Babella
1Jewni suu hu ndaŋgarana halaŋ ɓakŋi vun ma dewna, boy masina ni dew lay. 2Jokka asi jok usira ni asi fi li ma jivina ii u maɗiina hu mbassa Sinearra, asi kak huwa. 3Asi ɓak duk tasi ana, «Mbaygi hu sunda, caygi birikka cini gaygira ki u kura.» Asi li sunda u birikka a min zina ni ko ɦinira na. Asi tiniɗ u bitumma#11.3 bitumma Ni va ma dabaŋ ma suuna mbu voɗ bulna u namma., ni ko simora na may. 4Asi di duk tasi ana, «Tuɗuygi, laygi sunda, miniygi zira fiyekka, yaɗ tuɗ do ay ki kolo huulona, ni aygi hin fi ŋgara. Ni aygi ka hin njay ki kay ndaŋgara oloɗi.»
5Yawe cuk ay kaŋga a gol ɦoŋzi ma ŋgolna u zira fiyekka suuna miniɗta. 6Ŋgoo dagan Yawe di ana, «Suuna ca ni suu dewna, ɓakŋi vun ma dewna lay, ni sun masira jewra ɦawaa, va ma asi min a lamma ŋgoo dagan va doorosi kaɗi. 7Ɓaygi kaŋga mbuɗuygisina vunusi ki zeɗ zeɗ, hin a gege lay hum vun ma vi ndarammana oloɗi.» 8Yawe njaysi ki kay ndaŋgara halaŋ, asi hin minda min zira fiyekka u ɦoŋzina ni na gaw. 9Kay ndaɗta sem zi namma asi mbuɗ yam ana Babel, ni li ma Yawe mbuɗ vun suuna ay ki zeɗ zeɗ huna. Ay hu li namma Yawe njay suu warna ki kay yam ndaŋgara halaŋ.
Sem njaf suu vi Semma ta ta Abraham
10Gola wanni sem njaf suu vi Semma. Sem li basara kis vuɗ go njufna yam ana Arpaksad, ni basara mba' dagan mbo ŋgol ma tli kay ndaŋgarana. 11Ŋgoo dagan vuɗta vi Arpaksad ni Sem li basara kis kis vadl, nam vuɗ gor njufiina u gorɓiina.
12Arpaksad li basara dok-hindi yam vadl ni nam vuɗ go njufna sem ana Sela. 13Ŋgoo dagan vuɗta vi Sela, Arpaksad li basara 403 nam vuɗ gor njufiina u gorɓiina.
14Hu li ma Sela li basara dok-hindi ni nam vuɗ go njufna sem ana Heber. 15Ŋgoo dagan vuɗta vi Heber, Sela li basara 403 ni nam vuɗ gor njufiina u gorɓiina.
16Hu li ma Heber li basara dok-hindi yam fiɗi ni nam vuɗ go njufna yam ana Peleg. 17Ŋgoo dagan vuɗta vi Peleg, Heber li basara 430 ni nam vuɗ gor njufiina u gorɓiina.
18Peleg li basara dok-hindi vuɗ go njufna sem ana Reu. 19Ŋgoo dagan vuɗta vi Reu, Peleg li basara 209 ni nam vuɗ gor njufiina u gorɓiina.
20Reu li basara dok-hindi yam mba' ni nam vuɗ go njufna yam ana Serug. 21Ŋgoo dagan vuɗta vi Serug, Reu li basara 207 ni nam vuɗ gor njufiina u gorɓiina.
22Hu li ma Serug li basara dok-hindi nam vuɗ go njufna sem ana Nahor. 23Ŋgoo vuɗta vi Nahor, Serug li basara kis kis mba', ni nam vuɗ gor njufiina u gorɓiina.
24Hu li ma Nahor li basara dok-mba' yam tleeŋe nam vuɗ go njufna sem ana Tera. 25Ŋgoo vuɗta vi Tera, Nahor li basara 119 ni nam vuɗ gor njufiina u gorɓiina.
26Hu li ma Tera basaɗam li dok-kiɗisiya ni nam vuɗ gor njufiina hindi, Abram, Nahor, Haran. 27Gola ni njafna vi Tera bu Abram, Nahor u Haran. 28Haran vuɗ goona dew yam ana Lot. Haran miɗni bum Tera ka iiri tuwa, ni hu li ma nam vuɗ ay huna, hu mbassa Ur hu Kaldera. 29Abram ɗum caamba Sarai, Nahor ɗum Milka ni goŋ Haranda may. Haran vuɗ Yiska lay. 30Sarai vuɗ goo kaɗi kay ndaɗ ki gediya.
31Tera tay goromma, Abram, u goŋ ŋgolo mamma, Lot, ma goŋ Haranna, u Sarai, caŋ goomma, Abramba. Nam col ay u asi Ur hu mbas Kaldera a tuɗ Kanaan. Asi tuɗ ta ta tew Haran hin lak huwa. 32Hu li ma Tara li basara 205 nam miɗ hu Haran.
Currently Selected:
URA TIN AYRA 11: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
